ដំណឹងថ្មីៗ
ព័ត៌មានថ្មីៗ

លោកជំទាវ ល្វីស មូស៊ីគីវ៉ាបូ លើកទឹកចិត្ត ឲ្យកម្ពុជា ចូលរួមកាន់តែខ្លាំងឡើង ថែមទៀត ក្នុងកិច្ចប្រតិបត្តិការ ថែរក្សាសន្តិភាពក្រោមឆ័ត្រ អង្គការសហប្រជាជាតិ

ដោយ សៀមរាបប៉ុស្ដិ៍ ថ្ងៃទី 03 ខែ ធ្នូ ឆ្នាំ​ 2019 ម៉ោង 02:08 ល្ងាច អ្នកអាន 191

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី នៅវិមានសន្តិភាព នៅព្រឹកថ្ងៃទី០៣ ខែធ្នូ ព្រឹកមិញ បានទទួលជួបពិភាក្សាការងារជាមួយ លោកជំទាវ ល្វីស មូស៊ីគីវ៉ាបូ (Louise Mushikiwabo) អគ្គលេខាធិការនៃអង្គការអន្តរជាតិនិយាយភាសាបារាំង។
លោកជំទាវ Louise Mushikiwabo បានជម្រាបជូនសម្ដេចតេជោ ហ៊ុន សែន អំពីសកម្មភាពរបស់កម្ពុជានៅក្នុងអង្គការនិយាយភាសាបារាំង និងមានប្រសាសន៍ថាកម្ពុជាពិតជាមានសកម្មភាពយ៉ាងសកម្មជាទីបំផុតក្នុងនាមជាបិតាស្ថាបនិកនៃអង្គការនិយាយភាសាបារាំងនេះ។ ជាមួយគ្នានេះលោកជំទាវសូមគោរពថ្លែងអំណរគុណចំពោះសម្តេចតេជោនាយករដ្ឋមន្ត្រី ហើយក៏បានស្នើសុំធ្វើយ៉ាងណាឲ្យកម្ពុជាយើងមានសកម្មភាពកាន់តែខ្លាំងឡើងថែមទៀតនៅក្នុងកិច្ចការងារនេះ។ទន្ទឹមនឹងនេះ លោកជំទាវបានមានប្រសាសន៍ថាដំណើរទស្សនកិច្ចរបស់លោកជំទាវមកចូលរួមក្នុងកិច្ចប្រជុំជាមួយបណ្តាប្រទេសនិយាយភាសាបារាំងនៅពេលនេះគឺដើម្បីធ្វើយ៉ាងណាជំរុញទំនាក់ទំនងរវាងកម្ពុជា និងអង្គការអន្តរជាតិនិយាយភាសាបារាំងឲ្យមានកិច្ចសហប្រតិបត្តិការកាន់តែខ្លាំងឡើងថែមទៀត ហើយនិងជំរុញនូវគម្រោងទាំងឡាយឲ្យមានភាពជាក់លាក់។ លោកជំទាវ ក៏បានស្នើឲ្យកម្ពុជាចូលអនុវត្តគម្រោងដែលមានភាពជាក់លាក់ទាំងឡាយនោះរួមមាន៖ ១)ការលើកស្ទួយការបង្រៀនភាសាបារាំង ២)ការលើកស្ទួយពាណិជ្ជកម្មរវាងប្រទេសនិយាយភាសាបារាំង និង ៣)ដើម្បីរៀបចំនូវខួបទី៥០ឆ្នាំនៃការបង្កើតអង្គការអន្តរជាតិនិយាយភាសាបារាំងនេះនៅឆ្នាំ២០២០ខាងមុខ។
លើសពីនោះទៅទៀត លោកជំទាវក៏បានសម្ដែងនូវការអបអរជូនដល់កម្ពុជាយើងដែលបានប្រែក្លាយពីប្រទេសមួយដែលធ្លាប់ទទួលកងទ័ពមួកខៀវពីអង្គការសហប្រជាជាតិ មកជា
ប្រទេសមួយដែលបញ្ជូនទ័ពទៅជួយក្នុងក្របខណ្ឌក្រោមឆ័ត្រអង្គការសហប្រជាជាតិឡើងវិញ។ជាមួយនោះដែរ លោកជំទាវក៏បានលើកទឹកចិត្តជាថ្មីម្ដងទៀតឲ្យកម្ពុជាយើងចូលរួមកាន់តែខ្លាំងឡើងថែមទៀតក្នុងកិច្ចប្រតិបត្តិការថែរក្សាសន្តិភាពក្រោមឆ័ត្រអង្គការសហប្រជាជាតិ។
សម្ដេចតេជោ ហ៊ុន សែន បានមាន ប្រសាសន៍ថា កម្ពុជាក្នុងនាមជាស្ថាបនិកមួយនៃការបង្កើតអង្គការអន្តរជាតិនិយាយភាសាបារាំងនេះនឹងបន្តធ្វើសកម្មភាពយ៉ាងសកម្មនៅក្នុងក្របខ័ណ្ឌអង្គការនេះ ហើយកម្ពុជាក៏នឹងចូលរួមរៀបចំខួប៥០ ឆ្នាំ របស់អង្គការអន្តរជាតិនិយាយភាសាបារាំងនេះ។ តាមគោលការណ៍ និងការរៀបចំឡើងរបស់អង្គការនេះ នឹងអាចរៀបចំឲ្យនិស្សិតកម្ពុជាដែលរៀនភាសាបារាំងនៅប្រទេសបារាំងរៀបចំសកម្មភាពផ្សេងៗដើម្បីចូលរួមអបអរនៅក្នុងខួប ៥០ឆ្នាំនេះផងដែរ។
សម្ដេចតេជោនាយករដ្ឋមន្ត្រី បានមានប្រសាសន៍លើកឡើងថាចំពោះកិច្ចសហការរវាងបណ្ដាប្រទេសនិយាយភាសាបារាំងនេះ យើងគប្បីណាពិនិត្យឲ្យបានជាក់លាក់លើគម្រោងមួយចំនួនដែលអាចធ្វើទៅបាន។ ជាមួយគ្នានេះ សម្ដេចតេជោចង់ធ្វើយ៉ាងណាដើម្បីលើកស្ទួយទំនាក់ទំនងលើវិស័យសេដ្ឋកិច្ច វិស័យពាណិជ្ជកម្ម និងវិនិយោគរវាងបណ្ដាប្រទេសនិយាយភាសាបារាំង ព្រោះថាទំនាក់ទំនងនយោបាយគឺចាប់ផ្ដើមឡើងពីទំនាក់ទំនងសេដ្ឋកិច្ច៕SR

ដំណឹងផ្សេងៗទៀត


ចំនួនអ្នកចូលទស្សនា

​​​​​ ថ្ងៃនេះ : 35,464 នាក់
ម្សិលមិញ : 102,862 នាក់
សរុប : 87,458,425 នាក់