ខេត្តសៀមរាប៖លោក អែល សៀត សមាជិកក្រុមប្រឹក្សាខេត្តសៀមរាបនិងជាអនុប្រធានសាសនាឥស្លាមខេត្តសៀមរាប នៅរសៀលថ្ងៃទី២៩ ខែមេសា ម្សិលមិញ បានអញ្ជើញជួបសំណេះសំណាល និងបាននាំយកអំណោយរបស់ សប្បុរសជនម៉ាឡេស៊ី ដែលជាកញ្ចប់អាហារសម្រាប់ស្រាយបួសដល់សានិកឥស្លាមក្នុងខែរ៉ម៉ាឌន យកមកចែកជូនដល់សាសនិកឥស្លាមចំនួន២៣គ្រួសារ រស់នៅក្នុងភូមិគោកគ្រើល ឃុំលាងដៃ ស្រុកអង្គរធំ ខេត្តសៀមរាប។ដោយក្នុងមួយគ្រួសារទទួលបានអង្ក១០គីឡូ ប្រេងឆា១ដប មី៥កញ្ចប់ ត្រីខ៥កំប៉ុង ទឹកក្រូច១ដប ស្ករស ១គីឡូក្រាម និងផ្លែល្មើ១កញ្ចប់ ផងដែរ។
លោក អែល សៀត បានមានប្រសាសន៍ ថាគណៈអ៊ីម៉ាំសាសនាឥស្លាមក្នុងខេត្តទាំងអស់ តែងតែយកចិត្តទុកដាក់ គិតគូរពីសុខទុក្ខក្នុងការរស់នៅរបស់បងប្អូន នៅតាមសហគមន៍ខ្មែរឥស្លាមជានិច្ច ហើយ នៅក្នុងកាលៈទេសៈដ៏លំបាកនេះ ក្រោមការគិតគូរយ៉ាងយកចិត្តទុក្ខដាក់ពីប្រមុខរាជរដ្ឋាភិបាល ក្នុងការបញ្ចប់ ព្រឹត្តិការណ៍២០កុម្ភៈនេះបាន គឺត្រូវទាមទាឲ្យមានការចូលរួមពីសំណាក់បងប្អូនទាំងអស់គ្នា ដើម្បីឲ្យស្ថានភាពបិទខ្ទប់នេះវិលមករកស្ថានភាពធម្មតាវិញ។
លោកក៏បានមានប្រសាសន៍លើកពីការបូជាសព ចំពោះអ្នកស្លាប់ដោយសារកូវីដ១៩ នៅកម្ពុជា គឺតម្រូវឲ្យបូជាសពទាំងអស់តែដោយឡែកខាងសហគមន៍ឥស្លាម សម្តេច ហ៊ុន សែន បានអនុញ្ញាតឲ្យបញ្ចុះតាមក្រិតក្រមសាសនា ដោយអនុវត្តន៍តាមវិធានការនានារបស់ ក្រសួងសុខាភិបាល។ ចំពោះទីតាំងដែលត្រូវបញ្ចុះសពសាសនិកឥស្លាមដែលបានស្លាប់ដោយសារជម្ងឺកូវីដ គឺស្ថិតនៅក្នុងភូមិគោកក្រើល ឃុំលាងដៃ ស្រុកអង្គរធំ ខេត្តសៀមរាប។
លោកបានសំណូមពរឲ្យប្រជាពលរដ្ឋ ក៏ដូចជាសាសនិកឥស្លាមទាំងអស់ សូមមានការអត់ធ្មត់ និងគោរពតាមវិធានការ ៣ការពារ និង៣កុំ និងអនុវត្តឲ្យបានតាមសេចក្តីសម្រេច ស្តីពីវិធានការដែលត្រូវអនុវត្តក្នុងអំឡុងពេលបិទខ្ទប់ក្នុងភូមិសាស្រ្តមួយចំនួន ក្នុងខេត្តសៀមរាបនិង ដើម្បីទប់ស្កាត់ការឆ្លងរីករាលដាលកូវីដ១៩ និងកាត់ផ្តាច់ នៃការឆ្លងនៃព្រឹត្តិការណ៍ ២០កុម្ភៈផងដែរ៕SRP
