ខេត្តសៀមរាប៖រដ្ឋបាលឃុំសង្វើយ នៅថ្ងៃចន្ទនេះ បាននាំយកអំណោយមួយចំនួនប្រគល់ជូន ឈ្មោះ ស៊ាង វី ដែលកំពុងជួបការលំបាកលើជីវភាព។
ស្ត្រីរូបនេះ ឈ្មោះ ស៊ាង វី ភេទស្រីអាយុ 60 ឆ្នាំទីលំនៅបច្ចុប្បន្ន ភូមិព្រៃប្រស់ ឃុំសង្វើយ ស្រុកជីក្រែង ខេត្តសៀមរាប។
ការចុះសួរសុខទុក្ខនិងនាំយើងអំណោយជូនស្ត្រី ខាងលើ តបតាមការណែនាំរបស់ លោកបូ ម៉េង ទ្រី អភិបាលស្រុកជីក្រែង។
អាជ្ញាធរឃុំសង្វើយ បានឱ្យដឹងថា ឈ្មោះ ស៊ាង វី អតីតមកពី ភូមិតាជំនាញ ឃុំកំពង់ឃ្លាំង ស្រុកសូទ្រនិគម ខេត្តសៀមរាប ដែលមានស្វាមី ឈ្មោះ ថៃ បានមករស់នៅក្នុងភូមិព្រៃប្រស់ តាមប្ដីមកដាក់ទ្រូព្រៀង ក្រោយមកមនុស្សនោះ មានសតិវិកលចរិតហើយប្ដីក៏បានបោះបង់ចោល នៅសល់តែប្រពន្ធរស់នៅទីនេះរហូតមកដល់បច្ចុប្បន្ន។
អាជ្ញាធរបន្តថា បន្ទាប់មកអាជ្ញាធរភូមិ.ឃុំ បានជួយកសាងផ្ទះមួយខ្នងមដែលមានទំហំ ៣x៤ ក្រោយមកបុគ្គលខាងលើនេះមក៏បានវ៉ៃបំផ្លាញផ្ទះហែកស័ង្កសីយកទៅធ្វើខ្ទមមនៅខ្លួនឯងផ្សេង។ មិនត្រឹមតែប៉ុណ្ណឹងអាជ្ញាធរភូមិឃុំ បានយកចិត្តទុកដាក់ផ្ដល់នូវប័ណ្ណក្រីក្រជូន គាត់ក៏បានហែកប័ណ្ណក្រីក្រចោល ទៅទៀត។
លោកបូ ម៉េង ទ្រី អភិបាលស្រុកជីក្រែង បានឲ្យដឹងថា នៅថ្ងៃទី១៨ ខែកញ្ញា ឆ្នាំ២០២៣ ចូលរួមចុះសំណេះសំណាល សួរសុខទុក្ខ គ្រួសារក្រីក្រងាយរងគ្រោះមានជម្ងឺវិបល្លាសផ្លូវចិត្ត ជាស្ត្រីមេម៉ាយ ឈ្មោះ ស៊ាង វី នាំយកគ្រឿងឧបភោគ បរិភោគ របស់អនុសាខាកាកបាទក្រហមកម្ពុជាមស្រុកជីក្រែង មានអង្ករ៣០គីឡូក្រាម មីម៉ាម៉ា១កេស ទឹកសុីអុីវ១យួរ ទឹកត្រី១យួរ ត្រីខ១យួរ មុង១ ភួយ១ ក្រម៉ា១ សារ៉ុង១ ខ្នើយ១ ថវិកាចំនួន ១០ម៉ឺនរៀល។
លោកបានបន្តថាកន្លងមកនេះ មានសប្បុរសជនជួយឧបត្ថម្ភគ្រឿង ឧបភោគបរិភោគ ជាបន្តបន្ទាប់។អាជ្ញាធរភូមិឃុំបានយកចិត្តទុកដាក់ជាប្រចាំទាំងសម្លៀកបំពាក់ ស្បៀងអាហារ ជាប្រចាំផងដែរ៕
