ខេត្តសៀមរាប៖ព្រះបវរវិជ្ជា ទេព ភឿន ព្រះវិន័យធរខេត្ត និង ជាអ្នកនាំពាក្យសាលាគណខេត្តសៀមរាប បានមានថេរដីកា ថា៖ ការសម្រេចបិទវត្តពោធិលង្កា (ពោធិ៍លើ) ជាបណ្តោះ អាសន្ននាពេលនេះ ធ្វើឡើងតាមខ្លឹមសារនៃសេចក្តីសម្រេចរបស់គណៈ សង្ឃនាយក នៃព្រះរាជាណាចក្រកម្ពុជា ដែលបានបញ្ចប់មុខតំណែងរបស់គណៈគ្រប់គ្រងវត្តពោធិលង្កា នេះ បន្ទាប់ពីកើត មានភាពមិនប្រក្រតី ក្នុងការគ្រប់គ្រង។ ព្រះអង្គបន្តថា បន្ទាប់ពីការសម្រេចនេះ គណៈសង្ឃខេត្ត និង ក្រុង និង ធ្វើការរៀបចំវត្តនេះឡើងវិញ។
សាលាអនុគណក្រុងសៀមរាប នៅថ្ងៃទី ១៣ ខែវិច្ឆិកា ឆ្នាំ២០២៣ នេះបានសម្រេចបិទវត្តពោធិលង្កា (ពោធិ៍លើ) ស្ថិតនៅក្នុងភូមិស្លក្រាម សង្កាត់ស្លក្រាម ក្រុងសៀមរាប។
យោងតាមសេចក្តីសម្រេចរបស់គណៈ សង្ឃនាយក លេខ១០៧ ចុះថ្ងៃទី២៧ ខែកញ្ញា ឆ្នាំ២០២៣ បាន សម្រេចបញ្ចប់មុខតំណែងគណៈសង្ឃវត្តពោធិលង្កា (ពោធិ៍លើ) ដូចខាង ក្រោម៖
១. បញ្ចប់មុខតំណែង ភិក្ខុ កែវ ខូយ ពី ចៅអធិការ
២. បញ្ចប់មុខតំណែង ភិក្ខុ ពេជ្រ ដេវីឌ ពី គ្រូសូត្រស្ដាំ ៣. បញ្ចប់មុខតំណែង ភិក្ខុ ស៊ីញ ស៊ីន ពី គ្រូសូត្រឆ្វេង និង ទី៤.បញ្ចប់មុខតំណែង ភិក្ខុ សេង សុខុម
ពី វិន័យធរ។
សេចក្តីជូនដំណឹងចុះថ្ងៃទី ១៣ ខែវិច្ឆិកា របស់សាលាអនុគណក្រុងសៀមរាប បានឱ្យដឹងថា សាលា អនុគណក្រុងសៀមរាប សូមពិតប្រគេន ភិក្ខុ សាមណេរ លោកតា លោកយាយ ឧបាសក ឧបាសិកា ប្អូនៗ សិស្ស និស្សិត និងអ្នកដែលកំពុងស្នាក់នៅក្នុងវត្តពោធិលង្កា (ពោធិ៍លើ) ទាំងអស់ឱ្យបានជ្រាបថា សាលាអនុគណក្រុង សូមធ្វើការប្រកាសរំសាយភិក្ខុ សាម ណេរទាំងអស់នៅក្នុងវត្តពោធិលង្កាឱ្យនិមន្ត ទៅ គង់តាមបណ្តាវត្តក្នុងក្រុងសៀមរាប។
យោងតាមេសចក្តីជូនដំណឹងដដែលបាន ឱ្យដឹងថា នៅក្នុងវត្តពោធិលង្កា(ពោធិ៍លើ)នេះ មានព្រះសង្ឃ គង់នៅសរុប ចំនួន ១៤០ អង្គ និង តាជី យាយជី ក្មេងវត្ត មានចំនួន ៣១នាក់ ក្នុងនោះ សាលាអនុគណ បានតម្រូវឱ្យព្រះសង្ឃជាសមណសិស្សពុទ្ធិក វិទ្យា ល័យរាជបូណ៌ ចំនួន៣៨ អង្គ ត្រូវនិមន្តទៅគង់នៅវត្តរាជបូណ៌។ ចំណែកព្រះសង្ឃ ចំនួន ១០២ អង្គទៀត រួមជាមួយតាជី យាយជី និង ក្មេង វត្តចំនួន ៣១ នាក់ ត្រូវធ្វើការទំនាក់ទំនងជាមួយសាលាអនុគណ ក្រុងសៀមរាប ដោយផ្ទាល់នៅវត្តទេពពោធិវង្ស សង្កាត់គោកចក ក្រុង. ខេត្តសៀមរាបដើម្បីបានវត្តស្នាក់នៅបន្ត។
លិខិតជូនដំណឹងដដែល បានបញ្ជាក់យ៉ាងច្បាស់ថា សាលាអនុគណក្រុង មិនអនុញ្ញាតឱ្យបុគ្គលណាមួយបន្តស្នាក់នៅក្នុងវត្តពោធិលង្កាទៀតឡើយ។ បើបុគ្គលណាមួយមិនព្រមចាកចេញតាមការជូន ដំណឹងនេះ សាលាអនុគណក្រុង និងសហការជាមួយកម្លាំងមានសមត្ថកិច្ចអនុវត្តតាមផ្លូវច្បាប់ ដោយមិនទទួល ខុសត្រូវលើការបាត់បង់ឬ ខូចខាតទ្រព្យសម្បត្តិណាមួយឡើយ។
សូមជម្រាបថាវត្តពោធិលង្កា (ពោធិ៍លើ) កន្លងមកមានរឿងអាស្រូវជាច្រើន ដោយមូលហេតុ ទី១/មិនគោរព ប្រតិបត្តិ តាមធម៌វិន័យ ព្រះពុទ្ធសាសនា និង ទី២/ចែកបក្សពួក ជាច្រើនក្រុម និងតែងតែបង្កជម្លោះនៅក្នុងវត្តជាហូរហែរ និងជាយូរឆ្នាំណាស់មកហើយទើបមន្ត្រីដឹកនាំ សម្រេចរំសាយ ដើម្បីរៀបចំគណៈគ្រប់គ្រងវត្តសារជាថ្មី៕
