ឯកឧត្តម សុខ លូ អញ្ជើញដឹកនាំកិច្ចប្រជុំពិនិត្យពិភាក្សាការងារត្រៀមរៀបចំព្រឹត្តិការណ៍«សង្ក្រាន្តបាត់ដំបងឆ្នាំ២០២៦» និងណែនាំមន្រ្តីជំនាញ និងអាជ្ញាធរ ចុះណែនាំដល់ស្ថានីយប្រេងឥន្ធនៈ តាមបណ្តាក្រុង-ស្រុកកុំឱ្យមានការលក់លើសពីតម្លៃដែលបានកំណត់

ខេត្តបាត់ដំបង៖ឯកឧត្តម សុខ លូ អភិបាលខេត្តបាត់ដំបង នៅថ្ងៃទី៩ ខែមីនា ឆ្នាំ២០២៦នេះ បានអញ្ជើញដឹកនាំកិច្ចប្រជុំពិនិត្យពិភាក្សាការងារត្រៀមរៀបចំព្រឹត្តិការណ៍«សង្ក្រាន្តបាត់ដំបងឆ្នាំ២០២៦» ដោយមានការអញ្ជើញចូលរួមពីអភិបាលរងខេត្ត ប្រធានមន្ទីរ អង្គភាពនានា កងកម្លាំងប្រដាប់អាវុធ អភិបាលក្រុង-ស្រុកទាំង១៤ មន្ត្រីរាជការ និងអ្នកពាក់ព័ន្ធផ្សេងទៀត។

ឯកឧត្តម សុខ លូ មានប្រសាសន៍ឱ្យដឹងថា ព្រឹត្តិការណ៍សង្រ្កាន្តបាត់ដំបងឆ្នាំ២០២៦នេះនឹងរៀបចំឡើងតាមបែប សាសនា ប្រពៃណីទំនៀមទម្លាប់របស់ខេត្តបាត់ដំបងដោយមានការរៀបចំទីតាំងលេងល្បែងប្រជាប្រិយ៍ ការតាំងពិព័រណ៌ម្ហូបអាហារអ្នកបាត់ដំបង ព្រមទាំងមានការតុបតែងភ្លើងបំភ្លឺផ្សេងៗជាដើម។

ឯកឧត្តម គូសបញ្ជាក់ថា ការរៀបចំព្រឹត្តិការណ៍សង្ក្រាន្ត ដើម្បីជាផ្នែកមួយជួយបង្កលក្ខណៈសប្បាយរីករាយដល់ប្រជាពលរដ្ឋក្នុងខេត្ត និងទាក់ទាញភ្ញៀវទេសចរ។ ព្រឹត្តិការណ៍សង្ត្រាន្តឆ្នាំនេះគឺមិនមានការប្រគុំតន្ត្រីរាំលេងកម្សាន្ត ការប្រើរថយន្តបាញ់ទឹក និងការលេងប៉ាតម្ស៉ៅនោះឡើយ។

ឆ្លៀតក្នុងឱកាសនោះ ឯកឧត្ត សុខ លូ បានណែនាំដល់មន្ទីរពាណិជ្ជកម្ម មន្ទីររ៉ែ និងថាមពល មន្ត្រីជំនាញរបស់សាខាក.ប.បខេត្ត និងអាជ្ញាធរក្រុង ស្រុក ត្រូវបន្តចុះត្រួតពិនិត្យតាមដានការស្តុកប្រេងនៅតាមស្ថានីយប្រេងឥន្ធនៈ និងដេប៉ូលក់រាយប្រេងឥន្ធនៈសំដៅទប់ស្កាត់កុំឱ្យមានករណីស្តុកប្រេងចាស់ទុកមិនព្រមលក់ឱ្យអតិថិជនដើម្បីទុកលក់នៅពេលប្រេងឡើងថ្លៃដែលអាចបង្កឱ្យមានភាពចលាចល និងធ្វើឱ្យប្រេងកាន់តែឡើងថ្លៃបន្ថែមទៀត។

ឯកឧត្តម ណែនាំមន្រ្តីជំនាញ និងអាជ្ញាធរ ត្រូវចុះណែនាំទៅដល់ស្ថានីយប្រេងឥន្ធនៈ និងដេប៉ូលក់រាយប្រេងឥន្ធនៈនៅតាមបណ្តាក្រុង-ស្រុកក្នុងខេត្តបាត់ដំបងដើម្បីធ្វើយ៉ាងណាកុំឱ្យមានការលក់រាយប្រេងឥន្ធនៈលើសពីតម្លៃដែលបានកំណត់ដោយក្រសួងពាណិជ្ជកម្ម និងជំរុញឱ្យម្ចាស់ស្ថានីយ-ដេប៉ូ លក់ប្រេងឥន្ធនៈបើកដំណើរការអាជីវកម្មលក់ប្រេងឥន្ធនៈជាធម្មតាប្រកបដោយគុណភាពតាមបទដ្ឋានកំណត់ដោយមិនត្រូវឆ្លៀតឱកាសដំឡើងថ្លៃខុសប្រក្រតីឡើយ។

ឯកឧត្តមអភិបាលខេត្តជំរុញអាជ្ញាធរ ក្រុង ស្រុក ត្រូវចុះអប់រំណែនាំពន្យល់ប្រជាពលរដ្ឋកុំឱ្យជ្រួលច្របល់ទិញប្រេងស្តុកទុកក្នុងផ្ទះដែលអាចបង្កហានិភ័យ ខណៈប្រេងនៅតែបន្តនាំចូល និងមានក្នុងស្តុកគ្រប់គ្រាន់សម្រាប់ផ្គត់ផ្គង់តម្រូវការប្រើប្រាស់ប្រចាំថ្ងៃ៕SRP

អភិបាលក្រុងសៀមរាបណែនាំដល់ម្ចាស់សណ្ឋាគារ ផ្ទះសំណាក់ បន្ទប់ជួល បូទិក អាផាតមិន សម្រាប់ជនបរទេស សូមឱ្យត្រួតពិនិត្យឱ្យបានច្បាស់នូវឯកសារបញ្ជាក់ លិខិតបញ្ជាក់ឯកសារផ្ទាល់ខ្លួន និងលិខិតឆ្លងដែនមុនអនុញ្ញាតឱ្យស្នាក់នៅ

លោក នួន ពុទ្ធារ៉ា អភិបាលក្រុងសៀមរាប បានណែនាំដល់ម្ចាស់សណ្ឋាគារ ផ្ទះសំណាក់ បន្ទប់ជួល បូទិក អាផាតមិន សម្រាប់ជនបរទេស សូមឱ្យត្រួតពិនិត្យឱ្យបានច្បាស់នូវឯកសារបញ្ជាក់ លិខិតបញ្ជាក់ឯកសារផ្ទាល់ខ្លួន និងលិខិតឆ្លងដែនឱ្យបានច្បាស់លាស់មុនអនុញ្ញាតឱ្យស្នាក់នៅ។

លោក នួន ពុទ្ធារ៉ា បានមានប្រសាសន៍ថា អនុក្រឹត្យនេះមិនត្រឹមតែជាឧបករណ៍គតិយុត្តិមួយសម្រាប់គាំទ្រ ដល់ការងារគ្រប់គ្រងសន្តិសុខសុវត្ថិភាពនៅ តាមទីតាំងរស់នៅប្រមូលផ្តុំប៉ុណ្ណោះទេ ប៉ុន្តែគឺជាសក្ខីភាពមួយដែលឆ្លុះបញ្ចាំងអំពីគោលជំហរឥតងាករេលើការសម្រេចចិត្តយ៉ាងម៉ឺងម៉ាត់របស់រាជរដ្ឋាភិបាលកម្ពុជា ក្នុងការគាំទ្រលើ ការបង្ការ និងការបង្ក្រាបបទល្មើសគ្រប់ប្រភេទ ជាពិសេសការប្រយុទ្ធប្រឆាំងនឹងបទល្មើស ឆបោកតាមប្រព័ន្ធបច្ចេកវិទ្យា ស្របតាមកម្មវិធីនយោបាយ និងយុទ្ធសាស្ត្រនានាដែលបានកំណត់ ជាពិសេសគោលនយោបាយ «ភូមិ-ឃុំ-សង្កាត់ មានសុវត្ថិភាព»។

អភិបាលក្រុងណែនាំយ៉ាងដូច្នេះក្នុង
ដឹកនាំកិច្ចប្រជុំផ្សព្វផ្សាយ អនុក្រឹត្យលេខ ០៣ អនក្រ.បក ស្តីពី”ការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ”។ នៅថ្ងៃចន្ទ ទី៩ ខែមីនា ឆ្នាំ២០២៦។

នៅរដ្ឋបាលក្រុងសៀមរាប លោកឧត្តមសេនីយ៍ត្រី តូច សុគន្ធ ស្នងការរងទទួលផែនការងារអន្តោប្រវេសន៍ នៃស្នងការដ្ឋាននគរបាលខេត្ត បានធ្វើការផ្សព្វផ្សាយពីបែបបទនៃការស្នាក់នៅ នីតិវិធីនៃការផាកពិន័យចំពោះម្ចាស់អគារ និងអ្នកគ្រប់គ្រងទីតាំងរស់នៅប្រមូលផ្តុំ ដូចមានចែងក្នុងអនុក្រឹត្យលេខ ០៣ អនក្រ.បក ស្តីពី “ការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ”។

ក្នុងនេះដែរ លោកស្នងការរង ក៏បានធ្វើការណែនាំដល់នាយប៉ុស្តិ៍នគរបាលរដ្ឋបាលសង្កាត់ទាំងអស់ ត្រូវយកចិត្តទុកដាក់សិក្សាខ្លឹមសារអនុក្រឹត្យនេះឲ្យបានច្បាស់លាស់ ដើម្បីអនុវត្តការងារឲ្យមានប្រសិទ្ធភាព ស្របតាមនីតិវិធីច្បាប់ និងធានាបាននូវការគ្រប់គ្រងសណ្តាប់ធ្នាប់ សន្តិសុខសង្គម ក្នុងមូលដ្ឋានឲ្យកាន់តែមានប្រសិទ្ធភាព។

លោកស្នងការបន្តថា ត្រូវបន្តផ្សព្វផ្សាយ និងណែនាំដល់ម្ចាស់ ឬអ្នកគ្រប់គ្រងទីតាំងរស់នៅប្រមូលផ្តុំទាំងអស់ ឲ្យអនុវត្តតាមបទប្បញ្ញត្តិច្បាប់ឲ្យបានត្រឹមត្រូវ ដើម្បីចៀសវាងការប្រព្រឹត្តល្មើស ដែលអាចនាំឲ្យមានការផាកពិន័យ ឬវិធានការផ្សេងៗតាមច្បាប់ជាធរមាន៕SRP

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញប្រគល់ផ្ទះថ្មី ជូនក្រុមគ្រួសាររបស់វីរកងទ័ពពលី ដែលរស់នៅក្នុងមូលដ្ឋានខេត្តកំពង់ឆ្នាំង

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាវត្តមានដ៏ខ្ពង់ខ្ពស់ ប្រគល់ផ្ទះថ្មី ជូនក្រុមគ្រួសាររបស់វីរកងទ័ពពលី ដែលរស់នៅក្នុងមូលដ្ឋានខេត្តកំពង់ឆ្នាំង

ខេត្តកំពង់ឆ្នាំង ព្រឹកថ្ងៃទី៩ ខែមីនា ឆ្នាំ២០២៦ ក្នុងវេលាដ៏ក្រៀមក្រំនេះដែរ លោកជំទាវបណ្ឌិត បានពាំនាំប្រសាសន៍ចូលរួមរំលែកមរណទុក្ខដ៏ក្រៀមក្រំបំផុត និងប្រសាសន៍សួរសុខទុក្ខពី សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមទាំង សម្តេចមហាបវរធិបតី ហ៊ុន ម៉ាណែត ជូនដល់ក្រុមគ្រួសារនៃសពផងដែរ។
ទន្ទឹមនឹងនេះ លោកជំទាវបណ្ឌិត បាននាំយកមកជាមួយនូវអំណោយរបស់ សម្តេចធិបតី និងលោកជំទាវបណ្ឌិត មានដូចជាថវិកា សម្ភារៈប្រើប្រាស់ និងគ្រឿងឧបភោគបរិភោគ ជូនដល់ក្រុមគ្រួសារនៃសព ដើម្បីជួយសម្រួលដល់ជីវភាពរស់នៅប្រចាំថ្ងៃ។

ជាការតបស្នងសងគុណ រាជរដ្ឋាភិបាល រួមទាំងប្រជាជនកម្ពុជាទាំងអស់សូមចងចាំនូវវីរភាពដ៏អង់អាចក្លាហានរបស់ វីរកងទ័ព ដែលបានបូជាសាច់ស្រស់ឈាមស្រស់ដើម្បីការពារបូរណភាពទឹកដី ក៏ដូចជាការផ្តល់ជូនមកវិញនូវសន្តិភាពជូនជាតិ មាតុភូមិ ។ សូមបញ្ជាក់ផងដែរថា សម្តេចធិបតី បានដាក់ចេញនូវគោលនយោបាយ និងយន្តការជាច្រើនដើម្បីជួយសម្រួលដល់ក្រុមគ្រួសាររបស់យុទ្ធជនពលីដូចជាការផ្តល់ឱ្យមុខរបរចិញ្ចឹមជីវិត ការស្រោចស្រង់សមាជិកគ្រួសារ ការផ្តល់អាហារូបករណ៍ដល់កូនៗបានសិក្សាកម្រិតបរិញ្ញាបត្រ ការរៀបចំឥណទានសារជាថ្មី ការដោះស្រាយបំណុលជូនវីរយុទ្ធជនក្នុងសមរភូមិ ថែមទាំងមានការគិតគូរបង្កើតជាមូលនិធិសម្រាប់ជួយទ្រទ្រង់ដល់ក្រុមគ្រួសារវីរយុទ្ធជនពលីទៀតផង។ បន្ថែមពីលើនេះ រាជរដ្ឋាភិបាលក៏បាននិងកំពុងជួយសម្របសម្រួលឱ្យជនភៀសសឹកបានទៅផ្ទះសំបែងវិញ ការជួយដោះស្រាយហេដ្ឋារចនាសម្ព័ន្ធ ការជួយបោសសម្អាតអាវុធ គ្រាប់ យុទ្ធភ័ណ្ឌមិនទាន់ផ្ទុះ និងការស្តារជីវភាពរស់នៅប្រចាំថ្ងៃជាដើម៕SRP

ដូរស្នងការខេត្តបន្ទាយមានជ័យ

សម្ដេចធិបតីហ៊ុន ម៉ាណែត បានចេញអនុក្រឹត្យ​ផ្ទេរភារកិច្ច​លោក​ឧត្ដមសេនីយ៍​ទោ​ សិទ្ធិ​ ឡោះ​ ពី​ ស្នងការ​ខេត្ត​បន្ទាយមានជ័យ​ ទៅជា​អនុប្រធាន​នាយកដ្ឋាន​កណ្តាល​នគរបាល​យុត្តិធម៌​ និងតែងតាំងលោកឧត្ដមសេនីយ៍ត្រី​ សឿម​ សារិទ្ធ​ ពី​ស្នងការ​រងខេត្ត​បាត់ដំបង​មកជា​ស្នងការ​ខេត្ត​បន្ទាយមានជ័យ​៕SRP

អភិបាលខេត្តបាត់ដំបងណែនាំដល់អាជ្ញាធរសង្កាត់ ក្រុង ត្រូវជំរុញពន្លឿនការរំដោះដីចំណីផ្លូវកាត់សំយាប និងរុះរើរសំណង់ផ្សេងៗដែលសង់រំលោភដីចំណីផ្លូវសាធារណៈរបស់រដ្ឋ

ក្នុងឱកាសអញ្ជើញជាអធិបតីក្នុងពិធីបើកការដ្ឋានជួសជុលស្តារឡើងវិញកំណាត់ផ្លូវលេខ១៥៤ ដោយជួសជុលពង្រីកតួផ្លូវ ក្រាលបេតុងប្រវែង៧៧៥ម៉ែត្រ ទទឹង១២ម៉ែត្រ និងស្ថាបនាលូទឹកភ្លៀងបណ្តោយផ្លូវ មុខកាត់១ម៉ែត្រសងខាងផ្លូវ ប្រវែង១៧៥៦ម៉ែត្រ អណ្តូងលូចំនួន៦២កន្លែង និងខឿនបេតុងចិញ្ចើមផ្លូវប្រវែង១៨២០ម៉ែត្រ ស្ថិតនៅក្នុងសង្កាត់វត្តគរ ក្រុងបាត់ដំបងុំនៅព្រឹកថ្ងៃទី៩ ខែមីនា ឆ្នាំ២០២៦ ឯកឧត្តម សុខ លូ អភិបាលខេត្តបាត់ដំបងបានណែនាំដល់អាជ្ញាធរសង្កាត់ ក្រុង ត្រូវជំរុញពន្លឿនការរំដោះដីចំណីផ្លូវ កាត់សំយាប និងរុះរើរសំណង់ផ្សេងៗដែលសង់រំលោភដីចំណីផ្លូវសាធារណៈរបស់រដ្ឋ។

ទន្ទឹមនឹងនេះ ឯកឧត្តមបានណែនាំដល់ប្រជាពលរដ្ឋបញ្ឈប់ការសាងសង់សំយាប និងសំណង់ផ្សេងៗលើដីចំណីផ្លូវ រៀបចំការលក់ដូរនៅក្នុងផ្ទះឱ្យមានរបៀបរៀបរយមិនត្រូវលក់ដូរលើដីចំណីផ្លូវឡើយ។

ឯកឧត្តម សុខ លូ បានបង្ហាញចក្ខុវិស័យក្នុងការរៀបចំក្រុងបាត់ដំបងឱ្យក្លាយទៅជាទីក្រុងស៊ីវិល័យ ស្អាត ស្មាត បៃតង និងងាយស្រួលដើរ។

ឯកឧត្តម ថ្លែងបន្ថែមថា ផ្លូវនៅក្នុងក្រុងបាត់ដំបងទាំងអស់នឹងត្រូវបើកការដ្ឋានជួសជុល និងសាងសង់ថ្មីឡើងវិញជាបន្តបន្ទាប់ទៅតាមដំណាក់កាលដើម្បីសម្រួលដល់ធ្វើការដំណើររបស់ប្រជាពលរដ្ឋ។

ឯកឧត្តម សុខ លូ ស្នើប្រជាពលរដ្ឋចូលរួមគោរពច្បាប់ចរាចរណ៍ ចៀសឆ្ងាយពីគ្រឿងញៀន ថែរក្សាអនាម័យបរិស្ថាន បញ្ឈប់ការដុតសំរាម និងការដុតជញ្ជ្រាំងដែលបង្កផលប៉ះពាល់ធ្ងន់ធ្ងរដល់បរិស្ថាន។

ឯកឧត្តម ជំរុញប្រជាពលរដ្ឋឱ្យចូលរួមរាយការណ៍ករណីគ្រឿងញៀនកម្មវិធីទូរសព្ទដៃApp NoDrug ដែលជាមធ្យោបាយលឿនរហ័ស សុវត្ថិភាព និងរក្សាការសម្ងាត់១០០%៕SRP

សម្ដេចធិបតីនិងភរិយា ផ្ដល់អំណោយម៉ូតូ និងថវិកាជូនគ្រួសារវីរយុទ្ធជនពលី នៅស្រុកពួក

ខេត្តសៀមរាប៖ឯកឧត្តម ប្រាក់ សោភ័ណ អភិបាលខេត្តសៀមរាប នៅថ្ងៃទី៨ ខែមីនា ឆ្នាំ២០២៦ បាននាំយកម៉ូតូ និងថវិកាជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី ដើម្បីជាការលើកទឹកចិត្ត ប្រគល់ជូនដល់គ្រួសារវីរយុទ្ធជនពលី ដែលបានលះបង់ជីវិតដើម្បីបុព្វហេតុជាតិមាតុភូមិ។

អំណោយដ៏ថ្លៃថ្លានេះ ត្រូវបានប្រគល់ជូន អ្នកមីង អ៊ូ យឿត ដែលត្រូវជាម្តាយបង្កើត របស់វីរយុទ្ធជនពលី ស្មឿន វ៉ិត (អត្តលេខ ១៧១១៩០) អតីតមេបញ្ជាការរងអនុសេនាធំទី២ វរសេនាតូចកាំភ្លើងត្បាល់ នៃកងពលធំអន្តរាគមន៍លេខ២ ដែលបានពលី ក្នុងសមរភូមិទិសប្រាសាទតាមាន់ធំ ដោយសារគ្រាប់ផ្លោងកាំភ្លើងធំរបស់សត្រូវ។ គ្រួសារសពមានទីលំនៅបច្ចុប្បន្ននៅភូមិតាកាំ ឃុំដូនកែវ ស្រុកពួក ខេត្តសៀមរាប។

ការផ្ដល់ជូននាពេលនេះ គឺជាការសម្រេចតាមសំណូមពររបស់គ្រួសារសព កាលពីឱកាសដែល លោកជំទាវបណ្ឌិត ពេជ ចន្ទមុន្នី បានអញ្ជើញចុះសួរសុខទុក្ខ និងរំលែកទុក្ខដោយផ្ទាល់ដល់លំនៅឋាន កាលពីថ្ងៃទី១៤ ខែកុម្ភៈ ឆ្នាំ២០២៦ កន្លងទៅ។ ក្រៅពីម៉ូតូ១គ្រឿង ឯកឧត្តម ប្រាក់ សោភ័ណ អភិបាលខេត្ត ក៏បានបន្ថែមនូវអំណោយរួមមាន៖ ថវិកាបន្ថែម ២០០ដុល្លារប្រេងសាំង ៤០លីត្រ មួកសុវត្ថិភាព ២គ្រឿង និងរៀបចំធ្វើស្លាកលេខម៉ូតូជូនដោយឥតគិតថ្លៃផងដែរ។

ក្នុងបរិយាកាសប្រកបដោយភាពកក់ក្តៅ អ្នកមីង អ៊ូ យឿត បានសម្តែងនូវសេចក្ដីរំភើប និងថ្លែងអំណរគុណយ៉ាងជ្រាលជ្រៅបំផុតចំពោះ សម្តេចធិបតី នាយករដ្ឋមន្ត្រី និង លោកជំទាវបណ្ឌិត ព្រមទាំង ឯកឧត្តមអភិបាលខេត្ត និងថ្នាក់ដឹកនាំគ្រប់លំដាប់ថ្នាក់ ដែលជានិច្ចកាលតែងតែយកចិត្តទុកដាក់ មិនបោះបង់ចោល និងផ្តល់តម្លៃខ្ពស់ចំពោះជីវភាពរស់នៅ ក៏ដូចជាសុខទុក្ខរបស់បងប្អូនប្រជាពលរដ្ឋ ជាពិសេសគ្រួសារយុទ្ធជនពលីដែលមានគុណបំណាច់ចំពោះជាតិ។

សកម្មភាពនេះ បានស្ដែងឱ្យឃើញនូវស្មារតីសាមគ្គីភាព និងការដឹងគុណរបស់ថ្នាក់ដឹកនាំកម្ពុជា ចំពោះវីរភាពរស់រវើករបស់កងទ័ព ដែលបានបូជាសាច់ស្រស់ឈាមស្រស់ការពារបូរណភាពទឹកដីជូនមាតុភូមិ៕SRP

អត្ថបទ និងរូបភាព៖ ក្រុមការងារ
កែសម្រួល៖ លោក អ៊ុន ណារាជ្យ

កម្លាំងកងអាវុធហត្ថខេត្តសៀមរាប សម្រេច
ប្រគល់ម៉ូតូចំនួន០១គ្រឿង ជូនម្ចាស់វិញ

ខេត្តសៀមរាប៖សមត្ថកិច្ចអាវុធហត្ថខេត្តសៀមរាបបានឲ្យដឹងនៅថ្ងៃនេះថា នៅថ្ងៃទី៦ ខែមីនា ឆ្នាំ២០២៦ កម្លាំងការិយាល័យជំនាញ នៃកងរាជអាវុធហត្ថខេត្តសៀមរាប បានសម្រេចប្រគល់ម៉ូតូចំនួន០១គ្រឿង ដែលពាក់ព័ន្ធករណីជនបរទេសជួលម៉ូតូ (ផ្លុងចោល) កាលពីថ្ងៃទី២៣ ខែកុម្ភៈ ឆ្នាំ២០២៦ នៅក្នុងក្រុងសៀមរាប មានប្រជាពលរដ្ឋ ផ្ដល់ព័ត៌មានមកកម្លាំងកងរាជអាវុធហត្ថប្រចាំការទីបញ្ជាការស្រាលមាត់ស្ទឹង ថាមានម៉ូតូ០១គ្រឿង ទុកចោលមុខផ្ទះគាត់មិនឃើញម្ចាស់ បានរាយការណ៍មកកម្លាំងការិយាល័យជំនាញ ដើម្បី​យកមករក្សាទុកនៅទីបញ្ជាការដ្ឋានកងរាជអាវុធហត្ថខេត្តសៀមរាប ដើម្បីជ្រាវស្រាវស្វែងរកម្ចាស់ លុះដល់ថ្ងៃទី៥ ខែមីនា ឆ្នាំ២០២៦ ទើបម្ចាស់ដឹងថាកម្លាំងការិយាល័យជំនាញយកមករក្សាទុកនៅទីបញ្ជាការដ្ឋានកងរាជអាវុធហត្ថខេត្តសៀមរាប និងបានប្រគល់ម៉ូតូជូនម្ចាស់វិញ។

ក្នុងនោះដែរបើសិនជាបងប្អូនប្រជាពលរដ្ឋបានជួបហេតុការណ៍ត្រូវការអន្តរាគមន៍បន្ទាន់ ពីកងរាជអាវុធហត្ថខេត្តសៀមរាប សូមបងប្អូនហៅទូរស័ព្ទមកកាន់លេខ (Hotline) 1296 (ដោយឥតគិតថ្លៃ 24/24ម៉ោង)ឬ អាចទាក់ទងមកតាមបណ្តាញ Telegram, WhatsApp, CoolApp របស់កងរាជអាវុធហត្ថខេត្តសៀមរាប តាមរយៈលេខ 088 93 94 567 របស់កងរាជអាវុធហត្ថខេត្តសៀមរាប៕SRP

ឯកឧត្តម សុខ លូ ស្នើឯកអគ្គរដ្ឋទូតចិនជួយកៀរគរអ្នកវិនិយោគចិនមកបណ្ដាក់ទុនវិនិយោគលើការកែច្នៃកសិផលនិងឈានទៅបង្កើតឱ្យមានតំបន់សេដ្ឋកិច្ចពិសេសចិននៅខេត្តបាត់ដំបង

ក្នុងឱកាសអញ្ជើញជួបពិភាក្សាការងារជាមួយ ឯកឧត្តម វ៉ាង វិនពិន (Wang Wenbin) ឯកអគ្គរដ្ឋទូតចិនប្រចាំកម្ពុជាដើម្បីពង្រឹងទំនាក់ទំនង កិច្ចសហប្រតិបត្តិការ និងស្វែងយល់ពីសក្ដានុពលចម្រុះនៅខេត្តបាត់ដំបង ដើម្បីពង្រឹងទំនាក់ទំនងកិច្ចសហប្រតិបត្តិការ និងស្វែងយល់ពីសក្ដានុពលចម្រុះនៅខេត្តបាត់ដំបង នៅថ្ងៃទី៦ ខែមីនា ឆ្នាំ ២០២៦ នេះ ឯកឧត្តម សុខ លូ អភិបាលខេត្តបាត់ដំបង បានបង្ហាញពីស្ថានភាពភូមិសាស្រ្តខេត្តបាត់ដំបង សក្ដានុពលនៃវិស័យកសិកម្ម ទេសចរណ៍ សេវាកម្ម និងប្រព័ន្ធធារាស្រ្តយ៉ាងប្រទាក់ក្រឡាដែលអំណោយផលដល់ការវិនិយោគ។

ឯកឧត្តម សង្កត់ធ្ងន់ថា ខេត្តបាត់ដំបងមានសក្ដានុពលខ្លាំងលើវិស័យកសិកម្ម ប៉ុន្តែការវិនិយោគលើការកែច្នៃវេចខ្ចប់នៅមានកម្រិត។ ក្នុងន័យនេះឯកឧត្តម សុខ លូ ស្នើឯកឧត្តមឯកអគ្គរដ្ឋទូតចិនជួយកៀរគរអ្នកវិនិយោគចិនមកបណ្ដាក់ទុនវិនិយោគលើការកែច្នៃកសិផលនិងឈានទៅបង្កើតឱ្យមានតំបន់សេដ្ឋកិច្ចពិសេសចិននៅខេត្តបាត់ដំបង។

ឯកឧត្តម សុខ លូ ស្នើភាគីចិនពិនិត្យលទ្ធភាពរៀបចំឱ្យមានការចងសម្ព័ន្ធមេត្រីភាពរវាងខេត្តបាត់ដំបង និងក្រុង ឬខេត្តណាមួយនៃប្រទេសចិនដើម្បីពង្រឹងកិច្ចសហប្រតិបត្តិការ និងទំនាក់ទំនងឱ្យកាន់តែស៊ីជម្រៅបន្ថែមទៀត។

ជាកិច្ចឆ្លើយតប ឯកឧត្តម វ៉ាង វិនពិន (Wang Wenbin) បានមើលឃើញច្បាស់ពីសក្ដានុពលខ្ពស់លើវិស័យស្រូវអង្ករ និងកសិផលផ្សេងៗនៅក្នុងខេត្តបាត់ដំបងហើយស្ថានទូតចិនប្រចាំកម្ពុជាបានចាត់ទុកការអភិវឌ្ឍលើច្រករបៀងមច្ឆា និងអង្កររវាងប្រទេសទាំងពីរជាកិច្ចការអាទិភាពដើម្បីជំរុញកិច្ចសហប្រតិបត្តិការលើវិស័យកសិកម្ម ផ្តោតលើការនាំចេញមច្ឆា និងកសិផលរបស់កម្ពុជាទៅកាន់ប្រទេសចិន។

ឯកឧត្តម វ៉ាង វិនពិន បានលើកឡើងពីការជំរុញសភាពាណិជ្ជកម្មចិនប្រចាំប្រទេសកម្ពុជាឱ្យបង្កើនកិច្ចសហប្រតិបត្តិការជាមួយរដ្ឋបាលខេត្តបាត់ដំបងព្រមទាំងនាំយកសក្ដានុពលរបស់ខេត្តបាត់ដំបងទៅបង្ហាញដល់អ្នកវិនិយោគចិនដោយឯកឧត្តមចាត់ទុកខេត្តបាត់ដំបងជាខេត្តមួយដ៏សំខាន់ក្នុងការពង្រឹងទំនាក់ទំនង និងកិច្ចសហប្រតិបត្តិការររវាងប្រទេសចិននិងកម្ពុជា។

ឯកឧត្តមបានអះអាងពីការជំរុញការចងសម្ព័ន្ធមេត្រីភាពរវាងខេត្ត ក្រុង នៃប្រទេសចិន និងរដ្ឋបាលខេត្តបាត់ដំបង៕SRP

ក្នុងខែកុម្ភៈ សមត្ថកិច្ចបង្ក្រាប ក្មេងទំនើងជិត ៤០០នាក់ បញ្ជូនទៅតុលាការ

ក្នុងរយៈពេល១ខែពេញ គិតចាប់ពីថ្ងៃទី១ រហូតដល់ថ្ងៃទី២៨ ខែកុម្ភៈ ឆ្នាំ២០២៦ កម្លាំងនគរបាលជាតិ នៃអគ្គស្នងការដ្ឋាននគរបាលជាតិក្រសួងមហាផ្ទៃ បានបង្ក្រាបក្មេងទំនើងចំនួន១០៤ករណី និងឃាត់ខ្លួនជនបង្ក៣៧៦នាក់ បញ្ជូនទៅតុលាការ និងបញ្ជូនបន្តទៅពន្ធនាគារ។ នេះបើយោងតាមរបាយការណ៍ក្រសួងមហាផ្ទៃ។

បើតាមរបាយការណ៍ ប្រតិបត្តិការបង្ក្រាបក្មេងទំនើងក្នុងរយៈពេល១ខែកន្លងមកនេះ មាននៅក្នុងភូមិសាស្ត្រជាអាទិ៍ រាជធានីភ្នំពេញ ខេត្តកណ្តាល កំពត កំពង់ស្ពឺ ព្រះសីហនុ កោះកុង ពោធិ៍សាត់ បាត់ដំបង បន្ទាយមានជ័យ សៀមរាប ព្រះវិហារ រតនគិរី កំពង់ចាម ត្បូងឃ្មុំ ក្រចេះ ស្វាយរៀង និងខេត្តតាកែវ។

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាអគ្គស្នងការដ្ឋាននគរបាលជាតិ និងស្នងការនគរបាលរាជធានី-ខេត្ត អនុវត្តវិធានការក្ដៅ បង្ក្រាប និងស្រាវជ្រាវឃាត់ខ្លួនក្មេងទំនើងបញ្ជូនទៅតុលាការ ខណៈ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសង្កត់ធ្ងន់ពីភាពចាំបាច់ នៃការអនុវត្តវិធានការបង្ក្រាបយ៉ាងតឹងរឹងបំផុត៕SRP

ដោយលោក សេង បូលីន

វត្តមានកូនផ្សោតទីពីរក្នុងឆ្នាំ២០២៦ ជាដង្ហើមថ្មីនៃទន្លេមេគង្គ និងក្តីសង្ឃឹមសម្រាប់ជីវៈចម្រុះសកល

ខេត្តក្រចេះ៖ក្នុងបរិបទដែលពិភពលោកកំពុងប្រឈមនឹងការបាត់បង់ជីវៈចម្រុះ កម្ពុជាបានបង្ហាញនូវសមិទ្ធផលដ៏អស្ចារ្យនៃការអភិរក្ស ដោយការប្រកាសពីកំណើតកូនផ្សោតទន្លេមេគង្គទីពីរក្នុងឆ្នាំ២០២៦នព។

របកគំហើញនេះមិនត្រឹមតែជាដំណឹងរីករាយសម្រាប់ប្រជាជាតិកម្ពុជានោះទេ ប៉ុន្តែគឺជាសារដ៏មានឥទ្ធិពលទៅកាន់ពិភពលោក អំពីលទ្ធភាព នៃការស្តារឡើងវិញ នូវប្រភេទសត្វ ដែលកំពុងរងគ្រោះថ្នាក់ជិតផុតពូជបំផុត។

កូនផ្សោតថ្មីនេះ ត្រូវបានប្រទះឃើញកាលពីព្រឹកថ្ងៃទី៥ ខែមីនា ឆ្នាំ២០២៦ វេលាម៉ោង ៩:៥០នាទី នៅចំណុចអន្លង់អន្ទង់វៀន ក្នុងតំបន់អន្លង់ផ្សោតកាំពី ខេត្តក្រចេះ។

តាមការពិនិត្យដោយផ្ទាល់ពីក្រុមអ្នកស្រាវជ្រាវនៃខណ្ឌរដ្ឋបាលជលផល និងអង្គការ WWF កូនផ្សោតកើតថ្មីនេះ មានអាយុប្រមាណពីរថ្ងៃ មានសុខភាពល្អ និងកំពុងហែលក្នុងហ្វូងផ្សោតពេញវ័យចំនួន ៧ ក្បាល (រួមមានផ្សោតលេខ ៨១)ផងដែរ។

វត្តមានសមាជិកថ្មីនេះ បានធ្វើឱ្យចំនួនសត្វផ្សោតសរុបក្នុងទន្លេមេគង្គកម្ពុជា កើនឡើងដល់ ១១៤ ក្បាល។ រីឯការរស់រាន និងការបន្តពូជរបស់សត្វផ្សោត គឺជា “ទែម៉ូម៉ែត្រ” វាស់វែងពីសុខភាពនៃប្រព័ន្ធអេកូឡូស៊ីទន្លេមេគង្គ វត្តមានផ្សោតបញ្ជាក់ថា ទន្លេនៅតែមានតុល្យភាពមច្ឆជាតិ ដែលជាប្រភពប្រូតេអ៊ីនដ៏ចម្បង សម្រាប់ប្រជាជនរាប់លាននាក់។

ផ្សោតគឺជាមេដែកទាក់ទាញទេសចរណ៍ធម្មជាតិយ៉ាងសំខាន់ ដែលបង្កើតការងារ និងចំណូលដោយផ្ទាល់ដល់សហគមន៍មូលដ្ឋានក្នុងខេត្តក្រចេះ និងស្ទឹងត្រែង។

ផ្សោតមេគង្គគឺជានិមិត្តរូបនៃ “រតនសម្បត្តិរស់” ដែលលើកតម្កើងកិត្តិនាមកម្ពុជាលើឆាកអន្តរជាតិ ក្នុងនាមជាប្រទេសដែលយកចិត្តទុកដាក់ខ្ពស់លើការអភិរក្សធម្មជាតិ។

កំណើតនេះបានកើតឡើងស្របពេលដែលគណៈកម្មការអភិរក្ស និងអភិវឌ្ឍន៍តំបន់ទេសចរណ៍សត្វផ្សោតទន្លេមេគង្គ នឹងបើកកិច្ចប្រជុំដ៏សំខាន់មួយនៅថ្ងៃទី៩ ខែមីនា ឆ្នាំ២០២៦នេះ។

កិច្ចប្រជុំនេះនឹងផ្តោតលើការត្រួតពិនិត្យ និងវាយតម្លៃលទ្ធផលការងារកន្លងមក ,ការដាក់ចេញផែនការការពារ និងគ្រប់គ្រងឱ្យកាន់តែមានប្រសិទ្ធភាព និងប្រសិទ្ធផលខ្ពស់ និងការជំរុញកិច្ចសហការរវាងភាគីពាក់ព័ន្ធ ដើម្បីធានាថា “ដង្ហើមនៃទន្លេមេគង្គ” នឹងបន្តរស់រានតទៅមុខទៀត។

“កូនផ្សោតមួយក្បាលដែលកើតមក គឺជាជ័យជម្នះរបស់ធម្មជាតិលើការគម្រាមកំហែង ,ការការពារផ្សោត គឺការពារទន្លេ ការការពារទន្លេ គឺការពារជីវិតយើងទាំងអស់”៕SRP

បនល្បែងស៊ីសងបើកលេងគគ្រឹកគគ្រេង នៅក្រុងបានលុង មិនទាន់មានមន្ត្រីសមត្ថកិច្ចចុះបង្ក្រាប

ទីតាំងល្បែងស៊ីសងដ៏ធំមួយ ស្ថិតនៅភូមិជ្រៃ សង្កាត់យក្យឡោម ក្រុងបានលុង ខេត្តរតនគិរី កំពុងបើកដំណើរការយ៉ាងគគ្រឹកគគ្រេង ដោយមិនញញើតច្បាប់ និងមិនខ្លាចអាជ្ញាធរមូលដ្ឋានឡើយ។ ករណីនេះគេនៅពុំទាន់ឃើញអាជ្ញាធរសមត្ថកិច្ចចុះទៅបង្ក្រាបនៅឡើយ។

សេចក្ដីរាយការណ៍ព័ត៌មានបានឲ្យដឹងថា ទីតាំងល្បែងនេះ ត្រូវបានគេរៀបចំឡើងដោយក្រុមបុគ្គលមួយចំនួន ក្នុងនោះមានឧកញ៉ាម្នាក់ឈ្មោះ សំណាង រួមជាមួយដៃគូឈ្មោះ ងួន សុវណ្ណា ហៅអូនធំ ខណៈបុគ្គលម្នាក់ទៀតឈ្មោះ មេសា ត្រូវបានគេអះអាងថា ជាអ្នកជំនិតដែលរៀបចំ និងគ្រប់គ្រងសកម្មភាពល្បែងទាំងមូលនៅទីតាំងនេះ ត្រូវបានគេរាយការណ៍ថា មានល្បែងជាច្រើនប្រភេទ ដូចជា យូគី អាប៉ោង និងជល់មាន់ ដីដែលកំពុងទាក់ទាញអ្នកលេងចូលចេញយ៉ាងច្រើន បង្កឲ្យប្រជាពលរដ្ឋនៅតំបន់នោះព្រួយបារម្ភយ៉ាងខ្លាំងចំពោះសន្តិសុខ និងសណ្តាប់ធ្នាប់សង្គម។

ប្រជាពលរដ្ឋបានរាយការណ៍ថា ទីតាំងបនល្បែងស៊ីសងដ៏ធំមួយនេះ បានបើកដំណើរការលេងដោយចំហរ ចំណែកអាជ្ញាធរសមត្ថកិច្ចពាក់ព័ន្ធហាក់រក្សាភាពស្ងប់ស្ងាត់។

ពីភ្នាក់ងារសារព័ត៌មានសៀមរាប ប៉ុស្តិ៍ នៅពុំទាន់ទទួលបានការបំភ្លឺពីអាជ្ញាធរជំនាញពាក់ព័ន្ធនៅឡើយទេចំពោះព័ត៌មានដែលថាមានល្បែងស៊ីសងបែបនេះ៕SRP

អាជ្ញាធរខេត្តសៀមរាប ប្រកាសគ្មានការលើកលែង
អាជីវកម្ម ដែលបន្តសកម្មភាពល្មើសច្បាប់

អភិបាលរងខេត្តសៀមរាប លោក អ៊ឹង គឹមលាង បានបញ្ជាក់ថា បើម្ចាស់អាជីវកម្មនៅតែបន្តសកម្មភាពល្មើសច្បាប់តទៅទៀត នឹងត្រូវប្រឈមមុខនឹងចំណាត់ការតាមនីតិវិធីច្បាប់ជាធរមានដោយគ្មានការលើកលែងឡើយ។

លោក អ៊ឹង គឹមលាង បានបញ្ជាក់ថា កន្លងមកអាជ្ញាធរខេត្ត និងមន្រ្ដីជំនាញ បានធ្វើការចុះណែនាំ និងបញ្ឈប់មិនឱ្យមាន និងមិនឱ្យធ្វើ សិប្បកម្មកែច្នៃខុសច្បាប់បន្ដទៀត ប៉ុន្តែទីតាំងខាងលើ ពួកគាត់នៅបន្ដធ្វើសិប្បកម្មកែច្នៃនេះ ដោយខុសច្បាប់។ ដូច្នេះក្នុងនាមមន្រ្ដីជំនាញ ក្រុមការងារពាក់ព័ន្ធ នឹងធ្វើការអនុវត្តតាមផ្លូវច្បាប់ ដោយធ្វើការរឹបអូសម៉ាស៊ីនកែច្នៃ និងឈើខុសច្បាប់ទាំងនេះជាដាច់ខាត។

អភិបាលរងខេត្តរូបនេះ ក៏បានស្នើឱ្យមានការបង្កើតសហគមន៍ ឡធ្យូងគំរូមួយ នៅភូមិកំព្រហ្ម ឃុំឃុនរាម ស្រុកបន្ទាយស្រី ដែលសហគមន៍នេះ នឹងតម្រូវឱ្យប្រើប្រាស់តែប្រភេទឈើ ក្នុងស្រុកដែលមិនប៉ះពាល់ដល់ព្រៃឈើធម្មជាតិ ឬព្រៃសហគមន៍ ដូចជា ដើមស្វាយចន្ទី ឬស្សី និងត្រឡោកដូងជាដើម។

លោក អ៊ឹង គឹមលាង ប្រកាសព្រមានបែបនេះ នៅថ្ងៃទី៤ ខែមីនា ឆ្នាំ២០២៦ បន្តដឹកនាំកម្លាំងចម្រុះចុះបង្ក្រាបសិប្បកម្មឈើខុសច្បាប់ ៧កន្លែង និងឡដុតធ្យូង ១កន្លែង ក្នុងភូមិសាស្ត្រស្រុកបន្ទាយស្រី និងស្រុកវ៉ារិន។

សូមជម្រាបដែរថា ក្នុងប្រតិបត្តិការណ៍នេះ កម្លាំងចម្រុះ បានចុះត្រួតពិនិត្យជាក់ស្តែង លើទីតាំងសរុបចំនួន៨ មានសិប្បកម្មឈើ ៧កន្លែង និងឡដុតធ្យូង ១កន្លែង ដោយក្រុមការងារចម្រុះបានសម្រេចដកហូតនូវឧបករណ៍ បម្រើឱ្យសកម្មភាពកែច្នៃឈើជាច្រើនរួមមាន៖ ម៉ាស៊ីនតាប ៤គ្រឿង, ម៉ាស៊ីនវាល ៣គ្រឿង និងម៉ាស៊ីនច្រៀក ៤គ្រឿង, ម៉ាស៊ីនភ្លើង ៤គ្រឿង, ម៉ាស៊ីនខ្យល់, ម៉ាស៊ីនកាត់ឈើ និងឧបករណ៍ក្រឡឹងមួយចំនួនទៀត។ ជាមួយគ្នានោះ ក្រុមការងារក៏បានដកហូតឈើប្រណិត និងឈើលេខ១ ចំនួន ២ទីតាំង ជាប្រភេទឈើកំណាត់សម្រាប់ដុតធ្យូង ព្រមទាំងសរសរឈើមួយចំនួន ដែលម្ចាស់បានរត់គេចខ្លួនបាត់ទៀតផង។

ក្រៅពីការដកហូត អាជ្ញាធរខេត្តសៀមរាប បានតម្រូវឱ្យម្ចាស់ទីតាំងធ្វើកិច្ចសន្យា បញ្ឈប់អាជីវកម្មកែច្នៃផលអនុផលព្រៃឈើជាបន្ទាន់។ ដោយឡែកចំពោះករណី ឡធ្យូង ក្នុងដែនអភិរក្ស ស្ថិតនៅភូមិពើងឆ័ត្រ អាជ្ញាធរបានចុះផ្សព្វផ្សាយ និងធ្វើកិច្ចសន្យាឱ្យបញ្ឈប់សកម្មភាពផងដែរ៕SRP