ក្រុមប្រតិកម្មរហ័សស្នងការខេត្តសៀមរាន បដិសេធសារព័ត៌មាន ចុះផ្សាយចោទប្រកាន់ថា កម្លាំងនគរបាលបានទទួលប្រាក់ពីប្រជាពលរដ្ឋជាថ្នូរនឹងការមិនបញ្ជូនមុខសញ្ញាទៅតុលាការ

ខេត្តសៀមរាប៖ក្រុមប្រតិកម្មរហ័សនិងនាំពាក្យស្នងការនគរបាលខេត្តសៀមរាប សូមបញ្ជាក់ និងបដិសេធទាំងស្រុង ចំពោះខ្លឹមសារដែលបានចុះផ្សាយដោយគេហទំព័រសារព័ត៌មាន Kulen Daily News ពាក់ព័ន្ធនឹងការចោទប្រកាន់ថា កម្លាំងនគរបាលបានទទួលប្រាក់ពីប្រជាពលរដ្ឋជាថ្នូរនឹងការមិនបញ្ជូនមុខសញ្ញាទៅតុលាការ។ កម្លាំងសមត្ថកិច្ចយើង ពុំបានទទួលប្រាក់ ឬផលប្រយោជន៍ណាមួយពីប្រជាពលរដ្ឋ ដូចការចុះផ្សាយខាងលើឡើយ ហើយការអនុវត្តចំពោះមុខសញ្ញាទាំងអស់ គឺផ្អែកលើលទ្ធផលនៃការស្រាវជ្រាវ ការសាកសួរ ភស្តុតាង ស្របតាមនីតិវិធីច្បាប់ជាធរមាន។

ការចេញបដិសេធនេះបន្ទាប់ពីសារព័ត៌មានគូលែនដេលីបានចុះផ្សាយទម្កាយនគរបាលដោះលែងមុខសញ្ញាចំនួន25 នាក់ជាថ្នូរនឹងទឹកប្រាក់ក្នុងម្នាក់ពីរលានរៀល ឯ 7នាក់ទៀតត្រូវបានបញ្ជូនទៅតុលាការ។

អ្នកនាំពាក្យនិងប្រតិកម្មរហ័សស្នងការខេត្តសៀមរាបបានបញ្ជាក់បង្ហាញបំភ្លឺព័ត៌មាន ជុំវិញការចុះផ្សាយ របស់គេហទំព័រសារព័ត៌មាន Kulen Daily News ដែលបានចេញផ្សាយអត្ថបទព័ត៌មាន នាថ្ងៃទី២០ ខែកញ្ញា ឆ្នាំ២០២៦ នូវខ្លឹមសារថា៖ «អញ្ចឹងបានថា! ហេតុអ្វីក្មេងទំនើងមិនចេះអស់ពីខេត្តសៀមរាប? ចាប់បាន ៣២នាក់ ប៉ុន្តែបញ្ជូនឡើងតែ ០៧នាក់ ឬថាម្នាក់អស់ ២លានរៀល ចុះ២៨នាក់ ស្មើនឹងប៉ុន្មាន?» ពាក់ព័ន្ធចំពោះការចេញផ្សាយនេះ ក្រុមការងារប្រតិកម្មរហ័ស និងជាអ្នកនាំពាក្យ នៃស្នងការដ្ឋាននគរបាលខេត្តសៀមរាប មានកិត្តិយសសូមជម្រាបជូនថា ” នៅវេលាម៉ោង១៤:៥០ នាទី ថ្ងៃទី១៨ ខែកញ្ញា ឆ្នាំ២០២៦ មានករណី ហិង្សាដោយចេតនា និងធ្វើឱ្យខូចខាតដោយចេតនា នៅចំណុចអូរម្នាស់ នៃរមណីយដ្ឋានភ្នំគូលែន ស្ថិតនៅភូមិព្រះអង្គធំ ឃុំខ្នងភ្នំ ស្រុកស្វាយលើ ខេត្តសៀមរាប បង្កឡើងដោយមនុស្សចំនួន០២ ក្រុម បណ្តាលឱ្យមនុស្សម្នាក់រងរបួសស្រាល និងបណ្តាលឱ្យខូចខាតម៉ូតូចំនួន០២ គ្រឿង។ បន្ទាប់ពីទទួលបានសេចក្តីរាយការណ៍ កម្លាំងនគរបាលមូលដ្ឋានបានចេញអន្តរាគមន៍ភ្លាមៗ និងបានឃាត់ខ្លួនមុខសញ្ញាក្រុមទី១ ចំនួន ១២នាក់ (ស្រី ០១នាក់) និងម៉ូតូចំនួន ០៥គ្រឿង រួមមាន ម៉ាក Honda Dream ចំនួន ០២គ្រឿង និងម៉ាក Scoopy ចំនួន ០៣គ្រឿង។ ‎ចំណែក មុខសញ្ញាក្រុមទី២ កម្លាំងបានឃាត់ខ្លួនចំនួន ១៩នាក់ (ស្រី ០០នាក់) និងម៉ូតូចំនួន ១០គ្រឿង រួមមាន ម៉ាក Honda Dream ចំនួន ០៨គ្រឿង ម៉ាក Scoopy ចំនួន ០១គ្រឿង និងម៉ាក Next ចំនួន ០១គ្រឿង។
‎
‎ចំពោះការអនុវត្តនីតិវិធី៖ កម្លាំងជំនាញបានចុះសហការជាមួយកម្លាំងនៃអធិការដ្ឋាននគរបាលស្រុកស្វាយលើ ធ្វើការសាកសួរ និងស្រាវជ្រាវលម្អិតចំពោះមុខសញ្ញាទាំង០២ក្រុមខាងលើ ជាក់ស្តែង ក្នុងចំណោម មុខសញ្ញាដែលបានឃាត់ខ្លួន មានចម្លើយសារភាព និងភស្តុតាងពាក់ព័ន្ធបង្ហាញថា មានតែចំនួន១០ នាក់ប៉ុណ្ណោះ ដែលបានចូលរួមប្រព្រឹត្តបទល្មើសខាងលើ។ ‎ក្នុងចំណោម ១០នាក់នេះ កម្លាំងបានឃាត់ខ្លួនកសាងសំណុំរឿងបញ្ជូនទៅតុលាការចំនួន០៧ នាក់ និងមានចំនួន០៣ នាក់បានរត់គេចខ្លួន។ ចំពោះមុខសញ្ញាដែលបានរត់គេចខ្លួន កម្លាំងជំនាញបានស្រាវជ្រាវ និងកំណត់អត្តសញ្ញាណ ព្រមទាំងដាក់បញ្ចូលក្នុងសំណុំរឿង ដើម្បីបន្តស្វែងរកចាប់ខ្លួនមកអនុវត្តតាមនីតិវិធីច្បាប់។
‎
‎ដោយឡែក ចំពោះមុខសញ្ញាផ្សេង ទៀត ដែលពុំបានចូលរួមប្រព្រឹត្តបទល្មើស ត្រូវបានអាណាព្យាបាលពឹងពាក់ មេធាវី ធ្វើការស្នើសុំធានាខ្លួនជាបណ្ដោះអាសន្ន ដោយសមត្ថកិច្ច បានឆ្លងយោបល់ពីតំណាងអយ្យការ និងត្រូវបានអនុញ្ញាត ឲ្យធ្វើកិច្ចសន្យាអប់រំហើយវិលត្រឡប់ទៅលំនៅដ្ឋានវិញផងដែរ៕SRP
‎

ឯកឧត្តម សុខ លូ អញ្ជើញបិទវគ្គបណ្ដុះបណ្ដាលជនបង្គោលលើការងារមហាជនក្រុង ស្រុក ឃុំ សង្កាត់

ឯកឧត្តម សុខ លូ សមាជិកគណៈកម្មាធិការកណ្ដាល ប្រធានគណៈកម្មាធិការគណបក្សខេត្ត និងជាប្រធានគណៈចលនាមហាជននៃគណៈកម្មាធិការគណបក្សប្រជាជនកម្ពុជាខេត្តបាត់ដំបងបានអញ្ជើញជាអធិបតីក្នុងពិធីបិទវគ្គបណ្ដុះបណ្ដាលជនបង្គោលលើការងារមហាជនក្រុង ស្រុក ឃុំ សង្កាត់ ដែលពិធីនេះធ្វើឡើងនៅថ្ងៃទី១៩ ខែកញ្ញា ឆ្នាំ២០២៦ នៅទីស្នាក់ការគណបក្សខេត្ត។

មានប្រសាសន៍ក្នុងឱកាសនោះ ឯកឧត្តម សុខ លូ គូសបញ្ជាក់ថា ជនបង្គោលគឺជាឃោសនិកដ៏សំខាន់ក្នុងការកៀរគរមហាជនឱ្យមកគាំទ្រគណបក្សប្រជាជនកម្ពុជា។

ឯកឧត្តម ណែនាំដល់ប្រធានគណៈចលនាមហាជនក្រុង ស្រុក ត្រូវបន្តតម្រង់ទិសជនបង្គោលឱ្យទទួលបានការបណ្ដុះបណ្ដាលប្រកបដោយគុណភាព។

សូមជម្រាបថា វគ្គបណ្តុះបណ្តាលជនបង្គោលលើការងារមហាជនដែលរៀបចំដោយគណៈចលនា មហាជននៃគណៈកម្មាធិការគណបក្សប្រជាជនកម្ពុជាខេត្តបាត់ដំបងបានដំណើរការអស់រយៈពេល ២ថ្ងៃ ចាប់ពីថ្ងៃទី១៧ ដល់ថ្ងៃទី១៨ ខែកញ្ញា ឆ្នាំ២០២៦ ប្រព្រឹត្តទៅដោយមានសកម្មភាពយ៉ាងរលូន ប្រកបដោយរបៀបរៀបរយ សណ្តាប់ធ្នាប់ល្អ និងសម្រេចបានលទ្ធផលល្អប្រសើរ។សិក្ខាកាមនៃវគ្គបណ្តុះបណ្តាលរួមមានសមាសភាពជាជនបង្គោលចលនាមហាជននៃគណបក្សក្រុង ស្រុកទាំង ១៤ ជនបង្គោលមហាជនឃុំ សង្កាត់ទាំង ១០៣ឃុំ សង្កាត់។

សិក្ខាកាមគ្រប់រូបបានយកចិត្តទុកដាក់ក្នុងការស្តាប់ ការកត់ ត្រា និងជាពិសេសការគោរព អនុវត្តនូវវិន័យ បទបញ្ជាផ្ទៃក្នុងបានយ៉ាងខ្ជាប់ខ្ជួនញ៉ាំងការវាយតម្លៃវគ្គបណ្ដុះបណ្តាលដ៏មានអត្តន័យនេះសម្រេចបាននូវលទ្ធផលល្អប្រសើរ។ ឆ្លងកាត់វគ្គនេះសិក្ខាកាមទាំងអស់ទទួលបាននូវការយល់ដឹងកាន់តែច្បាស់នូវគុណសម្បត្តិ គោលជំហរ ឧត្តមគតិ ឆន្ទៈដ៏មុតស្រួចរបស់គណបក្ស និងទស្សនៈគ្រប់ជ្រុងជ្រោយរបស់គណបក្សក្នុងការវាយតម្លៃសភាពការណ៍នានា និងការដាក់ចេញនូវវិធានការ ដឹកនាំការពារ និងអភិវឌ្ឍ។លើកកម្ពស់សមត្ថភាពក្នុងការធ្វើសកម្មភាពលើសមរភូមិសាធារណមតិ និងការគ្រប់គ្រងសតិអារម្មណ៍មហាជន។យល់ដឹងកាន់តែស៊ីជម្រៅពីកម្មវិធីនយោបាយរបស់រាជរដ្ឋាភិបាលនីតិកាលទី៧នៃរដ្ឋសភា ។

ផ្តើមចេញពីនេះ គណបក្សគ្រប់ថ្នាក់អាចបង្កើនបានធនធានចលនាមហាជនដើម្បីចូលរួមចំណែកបំពេញភារកិច្ចជាមួយនឹងក្រុមការងារ និងគណបក្សក្រុង ស្រុក ឃុំ សង្កាត់ប្រកបដោយគុណភាព ជាពិសេស ដំណាក់កាលបច្ចុប្បន្ន ដែលនៅមូលដ្ឋានកំពុងអនុវត្តការចែកលិខិតអញ្ជើញ និងការត្រៀមពិនិត្យបញ្ជីឈ្មោះ ចុះឈ្មោះបោះឆ្នោតប្រចាំឆ្នាំ២០២៦ និងការផ្សព្វផ្សាយធ្វើជីវមាត្រ ក៏ដូចជាអនុវត្តផែនការសកម្មភាពនានាឆ្ពោះទៅកាន់ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៦ ឆ្នាំ២០២៧ ដែលទាមទារកម្លាំងចូលរួមសហការ និងជំរុញអនុវត្តដើម្បីភាពច្បាស់លាស់នៃប្រៀបឈ្នះរបស់គណបក្សប្រជាជនកម្ពុជា៕SRP

ប្រធានគណៈកម្មាធិការបក្សខេត្តកំពង់ចាម អញ្ជើញដឹកនាំកិច្ចប្រជុំគណៈអចិន្ត្រៃយ៍

ឯកឧត្តម អ៊ុន ចាន់ដា សមាជិកគណៈកម្មាធិការកណ្ដាល ប្រធានគណៈកម្មាធិការបក្សខេត្តកំពង់ចាម អញ្ជើញដឹកនាំកិច្ចប្រជុំគណៈអចិន្ត្រៃយ៍ នៃគណៈកម្មាធិការបក្សខេត្ត ស្ថិតនៅទីស្នាក់ការគណបក្សខេត្ត នាថ្ងៃទី១៨ ខែកញ្ញា ឆ្នាំ២០២៦។

កិច្ចប្រជុំនេះ មានការអញ្ជើញចូលរួមពីសំណាក់ ឯកឧត្តម អនុប្រធានគណៈកម្មាធិការគណបក្សខេត្ត ឯកឧត្តម លោកជំទាវ សមាជិក សមាជិកាគណៈអចិន្ត្រៃយ៍ ឯកឧត្តម លោកជំទាវ លោក លោកស្រី សមាជិក សមាជិកាគណៈកម្មាធិការបក្សខេត្ត ប្រធាន អនុប្រធាន គណៈកម្មាធិការបក្សក្រុង-ស្រុក និងមន្ត្រីគណបក្សពាក់ព័ន្ធជាច្រើនរូបទៀត។

ថ្លែងក្នុងឱកាសនោះ ឯកឧត្តម អ៊ុន ចាន់ដា ប្រធានគណៈកម្មាធិការបក្សខេត្តកំពង់ចាម បានណែនាំដល់គ្រប់រចនាសម្ព័ន្ធគណបក្ស ឱ្យបង្កើនសកម្មភាពផ្សព្វផ្សាយនូវសមិទ្ធផល ចក្ខុវិស័យ និងគោលនយោបាយរបស់គណបក្សប្រជាជនកម្ពុជា ទាំងការចុះផ្ទាល់តាមខ្នងផ្ទះ និងការប្រើប្រាស់បណ្ដាញព័ត៌មាន ដើម្បីពង្រឹងទំនុកចិត្តរបស់ប្រជាពលរដ្ឋ ឆ្ពោះទៅកាន់ការបោះឆ្នោត ឱ្យទទួលបានជ័យជម្នះ។

ឯកឧត្តម ប្រធានគណៈកម្មាធិការបក្សខេត្ត បានជំរុញឱ្យអាជ្ញាធរមូលដ្ឋានចុះធ្វើបញ្ជីបច្ចុប្បន្នភាពអចលនទ្រព្យរបស់គណបក្ស ឱ្យបានច្បាស់លាស់ និងជំរុញនីតិវិធីដោះស្រាយបញ្ហាដែលនៅសេសសល់ ឱ្យបានចប់សព្វគ្រប់។ ដោយឡែក ឃុំ-សង្កាត់ទាំងអស់ ត្រូវជំរុញការធ្វើរបាយការណ៍អភិវឌ្ឍន៍ប្រាំឆ្នាំ ២០២២-២០២៧ និងទិសដៅអភិវឌ្ឍន៍ប្រាំឆ្នាំ ២០២៧-២០៣២ ព្រមទាំងបណ្ដាឯកសារមួយចំនួនពាក់ព័ន្ធនឹងការរៀបចំសន្និបាតគណបក្សឃុំ-សង្កាត់ ដែលនឹងចាប់ផ្ដើមនៅក្នុងខែមករា ឆ្នាំ២០២៧ ខាងមុខ។

ឯកឧត្តម ប្រធានគណៈកម្មាធិការបក្សខេត្ត ក៏បានជំរុញឱ្យថ្នាក់ដឹកនាំ និងមន្ត្រីគណបក្សមូលដ្ឋានទាំងអស់ ត្រូវមានស្មារតីទទួលខុសត្រូវ ដោយបន្តពង្រឹងសាមគ្គីភាពផ្ទៃក្នុង បង្កើនទំនាក់ទំនងជិតស្និទ្ធ និងដោះស្រាយបញ្ហាប្រឈមនានាជូនប្រជាពលរដ្ឋ ឱ្យបានទាន់ពេលវេលា។ ជាពិសេស ត្រូវត្រៀមលក្ខណៈក្នុងការអនុវត្តតួនាទី និងភារកិច្ចរបស់ខ្លួនឱ្យមានប្រសិទ្ធភាពខ្ពស់ ស្របទៅតាមទិសដៅ និងផែនការដែលគណបក្សបានដាក់ចេញ ព្រមទាំងប្តេជ្ញាចិត្តខិតខំប្រតិបត្តិឱ្យបានត្រឹមត្រូវ តាមកម្មវិធីនយោបាយ និងលក្ខន្តិកៈ បទបញ្ជាផ្ទៃក្នុងរបស់គណបក្ស។ ជាពិសេស ចូលរួមគាំទ្រយ៉ាងពេញទំហឹងចំពោះមាគ៌ាដឹកនាំរបស់គណបក្សប្រជាជនកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រធានគណបក្ស និងជាប្រធានព្រឹទ្ធសភា នៃព្រះរាជាណាចក្រកម្ពុជា និង សម្ដេចមហាបវរធិបតី ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រី នៃព្រះរាជាណាចក្រកម្ពុជា៕SRP

អភិបាលខេត្តបាត់ដំបង ណែនាំដល់សិស្សត្រូវខិតខំសិក្សារៀនសូត្រ ចៀសឆ្ងាយពីគ្រឿងញៀន

អភិបាលខេត្តបាត់ដំបងឯកឧត្តម សុខ លូ បានណែនាំដល់សិស្សទាំងអស់ត្រូវខិតខំសិក្សារៀនសូត្រ ចៀសឆ្ងាយពីគ្រឿងញៀន ចូលរួមគោរពច្បាប់ចរាចរណ៍ ថែរក្សាអនាម័យបរិស្ថាន និងទុកដាក់សំរាមឱ្យបានត្រឹមត្រូវ។

ឯកឧត្តមបានចាត់ទុកការបណ្ដុះបណ្ដាលធនធានមនុស្សពិតជាសំខាន់ និងចាំបាច់បំផុតសម្រាប់ប្រទេសកម្ពុជាទៅអនាគត។

ឯកឧត្តម ក៏ជំរុញដល់សិស្សឱ្យចាប់យកមុខវិជ្ជាបច្ចេកវិទ្យាក្នុងយុគសម័យឌីជីថលជាពិសេសមុខវិជ្ជាបញ្ញាសិប្បនិម្មិត (AI) ដែលបាននិងកំពុងដើរតួនាទីយ៉ាងសំខាន់ក្នុងការផ្លាស់ប្តូររបៀបរស់នៅ ការធ្វើការងារ និងការអភិវឌ្ឍសង្គមជាតិទាំងមូល។

តាមរយៈបទពិសោធន៍ដែលទទួលបានពីដំណើរទស្សនកិច្ចទៅកាន់ប្រទេសចិននាពេលថ្មីៗនេះ ឯកឧត្តម បានរំលេចសារសំខាន់ៗនៃ AI អាចធ្វើការងារដែលស្មុគស្មាញ និងត្រូវការពេលយូរបានយ៉ាងឆាប់រហ័ស ដោយកាត់បន្ថយការខុសឆ្គងរបស់មនុស្ស និងជួយកាត់បន្ថយពេលវេលាក្នុងការបំពេញភារកិច្ចផ្សេងៗ។ AIជាឧបករណ៍ដ៏មានឥទ្ធិពលជួយពង្រឹងសមត្ថភាពមនុស្សឱ្យធ្វើការបានល្អជាងមុន និងបង្កើតឱកាសថ្មីៗសម្រាប់អនាគត។

ឯកឧត្តម ក្រើនរំឭកដល់សិស្សត្រូវចូលរួមប្រើប្រាស់បណ្ដាញទំនាក់ទំនងសង្គមប្រកបដោយការទទួលខុសត្រូវ និងមានសីលធម៌ដើម្បីជាប្រយោជន៍ដល់ខ្លួនឯង គ្រួសារ និងសង្គមជាតិ។

ឯកឧត្តម សុខ លូ មានប្រសាសន៍ណែនាំបែបនេះក្នុងឱកាសអញ្ជើញជាអធិបតីក្នុងពិធីប្រគល់បណ្ណសរសើរជូនសិស្សនៃវិទ្យាល័យសម្ដេចឪ ខេត្តបាត់ដំបង នៅថ្ងៃទី១៨ ខែកញ្ញា ឆ្នាំ២០២៦៕SRP

ថ្នាក់ដឹកនាំខេត្តសៀមរាប ជំរុញឱ្យអាជ្ញាធរពាក់ព័ន្ធនៃឃុំកណ្ដែក ពន្លឿនការដោះស្រាយបញ្ហាជូនប្រជាពលរដ្ឋ និងការរៀបចំការចុះបញ្ជីដីធ្លី

ក្នុងឱកាសដឹកនាំកិច្ចប្រជុំពិនិត្យវឌ្ឍនភាពការងារប្រចាំឆ្នាំ ដើម្បីពង្រឹងប្រសិទ្ធភាពសេវាសាធារណៈជូនប្រជាពលរដ្ឋក្នុងឃុំកណ្ដែក ស្រុកប្រាសាទបាគង ខេត្តសៀមរាប នាថ្ងៃទី១៨ ខែកញ្ញា ឆ្នាំ២០២៦ លោក ឌី រ៉ាដូ អភិបាលរងខេត្ត បានគូសបញ្ជាក់ពីសមិទ្ធផលនានាដែលរដ្ឋបាលថ្នាក់ក្រោមជាតិសម្រេចបាន ជាពិសេសការដោះស្រាយសំណូមពរជូនប្រជាពលរដ្ឋជាច្រើនករណី ដូចជាការជួសជុលផ្លូវថ្នល់ និងការផ្គត់ផ្គង់អគ្គិសនីជាដើម ប៉ុន្តែទោះបីជាយ៉ាងណាក៏ដោយ បញ្ហាប្រឈមមួយចំនួនទៀតនៅតែបន្តដោះស្រាយជាជំហានៗ ដោយបានណែនាំឱ្យធ្វើលិខិតស្នើសុំទៅកាន់ស្ថាប័នពាក់ព័ន្ធដើម្បីសម្របសម្រួល។

លោក ឌី រ៉ាដូ មានប្រសាសន៍ថា ជុំវិញកិច្ចការអភិវឌ្ឍន៍ និងហេដ្ឋារចនាសម្ព័ន្ធ លោកបានណែនាំឱ្យផ្អាកការរុះរើជាបណ្ដោះអាសន្នសិន ដោយត្រូវរង់ចាំការប្រកាសបច្ចេកទេសឱ្យបានច្បាស់លាស់សិន ដើម្បីជៀសវាងកុំឱ្យមានផលប៉ះពាល់ដល់ការធ្វើដំណើរ និងជីវភាពរស់នៅប្រចាំថ្ងៃរបស់ប្រជាពលរដ្ឋ។ ទាក់ទងនឹងបញ្ហាដីធ្លី សូមឱ្យប្រជាពលរដ្ឋក្នុងមូលដ្ឋានទៅដាក់ពាក្យស្នើសុំនៅច្រកចេញចូលតែមួយនៃសាលាខេត្ត ដោយត្រូវភ្ជាប់មកជាមួយនូវប្រវត្តិកាត់ដី និងឯកសារពាក់ព័ន្ធផ្សេងៗ។ ចំពោះការបង់ថ្លៃសេវា គឺនឹងត្រូវធ្វើឡើងបន្ទាប់ពីមានការផ្ទៀងផ្ទាត់ឯកសាររួចរាល់ជាស្ថាពរ។ ដើម្បីធានាប្រសិទ្ធភាពការងារនេះ អាជ្ញាធរនឹងរៀបចំកិច្ចប្រជុំថ្នាក់ក្រុង-ស្រុក ដើម្បីពន្លឿនការងារចុះបញ្ជីដីធ្លីជូនប្រជាពលរដ្ឋឱ្យបានឆាប់រហ័ស។

លោកអភិបាលរងខេត្ត ក៏បានស្នើឱ្យអាជ្ញាធរឃុំប្រញាប់រៀបចំរបាយការណ៍លម្អិត បញ្ជូនទៅកាន់ ឯកឧត្តមអភិបាលខេត្ត ព្រមទាំងបានថ្លែងអំណរគុណយ៉ាងជ្រាលជ្រៅដល់មន្ត្រីរាជការ និងអាជ្ញាធរគ្រប់លំដាប់ថ្នាក់ ដែលបានខិតខំប្រឹងប្រែងបំពេញភារកិច្ចបម្រើផលប្រយោជន៍ប្រជាពលរដ្ឋក្នុងមូលដ្ឋានកន្លងមក៕SRP

អត្ថបទ៖ លោក ទុំ សាមុត
កែសម្រួល៖ លោក អ៊ុន ណារាជ្យ

អង្គភាពប្រឆាំងអំពើពុករលួយចាប់ខ្លួនមេឃុំម្នាក់ និងបក្ខពួក៣នាក់​ (ម្នាក់ចិន) ដែលដឹកនាំ​ រៀបចំទីតាំងឲ្យពួក​ Scams!

អង្គភាពប្រឆាំងអំពើពុករលួយ (ACU) បានចាប់ខ្លួនលោក រៀម រុំ មេឃុំព្រែកខ្សាច់​ ស្រុកគិរីសាគរ​ ខេត្តកោះកុង​ រួមជាមួយបក្ខពួក៣នាក់ផ្សេងទៀត ក្នុងនោះមានជនជាតិចិនម្នាក់ ពាក់ព័ន្ធនឹងបទល្មើសស៊ី សំណូក សូកប៉ាន់ ដឹកនាំ​ និងរៀបចំទីតាំងឱ្យក្រុមឧក្រិដ្ឋជនប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Onlin Scams) នៅក្នុងមូលដ្ឋានរបស់ខ្លួន។

ក្រោយការឃាត់ខ្លួនជាបន្តបន្ទាប់ ACU បានបញ្ជូនក្រុមជនសង្ស័យទាំងនេះទៅកាន់សាលាដំបូងរាជធានីភ្នំពេញ។

តំណាងអយ្យការអមសាលាដំបូងរាជធានីភ្នំពេញ នៅថ្ងៃទី១៨​ ខែកញ្ញា ឆ្នាំ២០២៦នេះ ​ បានចេញសេចក្តីប្រកាសព័ត៌មាន ចោទប្រកាន់ជនសង្ស័យខាងលើជាផ្លូវការដូចខាងក្រោម៖

ទី១៖ ឈ្មោះ​ រៀម​ រុំ​ មេឃុំព្រែកខ្សាច់​ ស្រុកគិរីសាគរ​​ (ឃាត់ខ្លួន)​ ពីបទ​ស៊ីសំណូក, សមគំនិតក្នុងអំពើរៀបចំ ឬដឹកនាំមជ្ឈមណ្ឌល ឆបោកតាមប្រព័ន្ធបច្ចេកវិទ្យា និងសម្អាតប្រាក់​ តាមមាត្រា ៣២ នៃច្បាប់ស្តីពីការប្រឆាំងអំពើពុករលួយ, មាត្រា ២៩ និងមាត្រា ៥៩៤ នៃក្រមព្រហ្មទណ្ឌ, មាត្រា ៦ និងមាត្រា ៩ នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទាន ភេរវកម្ម។

ទី២៖ ឈ្មោះ ជា វាសនា ភេទប្រុស​ (ឃាត់ខ្លួន)​ និងឈ្មោះ ជា សុទ្ធ ហៅម៉េង ភេទប្រុស (កំពុងជាប់ឃុំ)​ ពីបទសមគំនិតក្នុងអំពើស៊ីសំណូក , សមគំនិតក្នុងអំពើរៀបចំ ឬ ដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា និងសមគំនិតក្នុងអំពើសម្អាតប្រាក់​ តាមមាត្រា ៣២ នៃច្បាប់ស្តីពីការប្រឆាំងអំពើពុករលួយ, មាត្រា ២៩ និងមាត្រា ៥៩៤ នៃក្រមព្រហ្មទណ្ឌ, មាត្រា ៦ និងមាត្រា ៩ នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា និងមាត្រា ៣៨ នៃច្បាប់ស្តីពីការប្រឆាំង ការសម្អាតប្រាក់ និងហិរញ្ញប្បទានភេរវកម្ម។

ទី៣៖ ឈ្មោះ ចាង ចៀនឈាំង (ZHANG JIAN QIANG) ហៅ ឆៃ យ៉ូវយៀន (Cai You Yuan) ហៅត្រង៉ោលភេទប្រុស ជនជាតិចិន និង​ បក្សពួក (គេចខ្លួន)​ ពីបទ សូកប៉ាន់, ឆបោកតាមប្រព័ន្ធបច្ចេកវិទ្យា, រៀបចំ ឬដឹកនាំមជ្ឈមណ្ឌល ឆបោកតាមប្រព័ន្ធបច្ចេកវិទ្យា និងបទសម្អាតប្រាក់ តាមមាត្រា ៣២ នៃច្បាប់ស្តីពីការប្រឆាំងអំពើពុករលួយ, មាត្រា ៦០៥ នៃក្រមព្រហ្មទណ្ឌ, មាត្រា ៥, មាត្រា ៦ និងមាត្រា ៩នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា និងមាត្រា ៣៨ នៃច្បាប់ ស្តីពី ការប្រឆាំង ការសម្អាតប្រាក់ និងហិរញ្ញប្បទានភេរវកម្ម៕SRP

នគរបាលខេត្តសៀមរាប តាមចាប់ចោរដល់កន្លែងដោះដូរផ្លាកលេខម៉ូតូ ដើម្បីបំភាន់ភ្នែកសមត្ថកិច្ច

ខេត្តសៀមរាប៖ជនសង្ស័យចំនួន២ ត្រូវបាននគរបាលខេត្តសៀម ចាប់ខ្លួនបានភ្លាមៗ ពាក់ព័ន្ធករណីលួចម៉ូតូ និងប្រើប្រាស់គ្រឿងញៀនដោយខុសច្បាប់។

លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានឲ្យដឹងថាបន្ទាប់ពីទទួលបាន សេចក្តីរាយការណ៍មានករណីលួចម៉ូតូ ០១គ្រឿង ម៉ាក Honda Scoopy i ពណ៌ខ្មៅ ស៊េរីឆ្នាំ២០១៩ ផ្លាកលេខ ភ្នំពេញ 1JC-1170 កាលពីវេលាម៉ោង ១៥:០០នាទី ថ្ងៃទី១៣ ខែកញ្ញា ឆ្នាំ២០២៦ នៅចំណុចមុខផ្ទះក្នុងភូមិស្វាយដង្គំ សង្កាត់ស្វាយដង្គំ ក្រុងសៀមរាប ជាកម្មសិទ្ធិរបស់ជនរងគ្រោះឈ្មោះ កែ សុខហេង (អាយុ ២០ឆ្នាំ) កម្លាំងនគរបាលនៃអធិការដ្ឋាននគរបាលក្រុងសៀមរាប សហការពីកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តសៀមរាប បានចេញអន្តរាគមន៍ បើកការស្រាវជ្រាវយ៉ាងក្តៅគគុក រហូតស្វែងរកឃើញ និងឈានទៅឃាត់ខ្លួនជនសង្ស័យបានចំនួន០២ នាក់ ភ្លាមៗ នៅចំណុចភូមិធ្លកអណ្តូង សង្កាត់ស្លក្រាម ក្រុងសៀមរាប ខណៈពេលដែល ពួកគេ កំពុងធ្វើសកម្មភាព ដោះដូរផ្លាកលេខម៉ូតូ ដើម្បីបំភាន់ភ្នែក សមត្ថកិច្ច។

លោកឧត្តមសេនីយ៍ទោ ហួត សុធី បានបន្តថាជនសង្ស័យទាំង០២ នាក់ ទី១/ឈ្មោះ ហាន ភា ហៅ ម៉ៅ ភេទប្រុស អាយុ ៤២ឆ្នាំ ជាជនដៃដល់ (ធ្លាប់ជាប់ពន្ធនាគារ ០១លើក រយៈពេល ០៨ខែ ករណីលួចម៉ូតូ) និងជនសង្ស័យទី២/ ឈ្មោះ ស៊ា សារ័ត្ន ហៅ ហាក់ ភេទប្រុស អាយុ ២៤ឆ្នាំ ជាបក្ខពួក (ធ្លាប់ជាប់មណ្ឌលស្តារនីតិសម្បទាអ្នកញៀនគ្រឿងញៀន ០២លើក)។

ជនសង្ស័យ ឈ្មោះ ហាន ភា បានសារភាព ទទួលស្គាល់ថា ខ្លួនពិតជាបានធ្វើសកម្មភាពលួចម៉ូតូចំនួន០២ លើកពិតមែន ដោយលើកទី១ នៅក្នុងខែសីហា ឆ្នាំ២០២៦ យកបានម៉ូតូម៉ាក Honda Click ពណ៌ស ផ្លាកលេខ ព្រះវិហារ 1E-2840 នៅភូមិវិហារចិន សង្កាត់ស្វាយដង្គំ ឱ្យឈ្មោះ ស៊ា សារ័ត្ន ជិះយកទៅ និងលើកទី២ នាថ្ងៃទី១៣ ខែកញ្ញា ឆ្នាំ២០២៦ យកបានលួចម៉ូតូ Honda Scoopy i បានហើយ យកមកប្តូរផ្លាកលេខ ក៏ត្រូវសមត្ថកិច្ចឃាត់ខ្លួន តែម្តង។ ជាមួយគ្នានេះ កម្លាំងជំនាញបានធ្វើតេស្ត ស្វែងរកសារធាតុញៀន ជាលទ្ធផល ជនសង្ស័យឈ្មោះ ស៊ា សារ័ត្ន មានសារធាតុញៀន (វិជ្ជមាន) នៅក្នុងទឹកនោម។

លោកឧត្តមសេនីយ៍ទោ ហួត សុធី បានបញ្ជាក់ថា ករណីនេះ សមត្ថកិច្ចដករហូតវត្ថុតាងបាន ម៉ូតូScoopy i ចំនួន០១ គ្រឿង ស៊េរីឆ្នាំ២០១៩ ពាក់ផ្លាកលេខ ភ្នំពេញ 1JC-1170 បានប្រគល់ជូនជនរងគ្រោះជាម្ចាស់វិញ។ ម៉ូតូ Honda Click ០១គ្រឿង ពាក់ផ្លាកលេខព្រះវិហារ 1E-2840។

យោងតាមពាក្យបណ្ដឹង និងចម្លើយសារភាពជនសង្ស័យទាំង០២នាក់ ត្រូវបានកម្លាំងជំនាញកសាងសំណុំរឿង បញ្ជូនទៅកាន់សាលាដំបូងខេត្តសៀមរាបដើម្បីចាត់ការតាមនីតិវិធីច្បាប់។

សូមជម្រាបថាប្រតិបត្តិការនេះអនុវត្តតាមបទបញ្ជា ដ៏ម៉ឺងម៉ាត់របស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងក្រោមការយកចិត្តទុកដាក់ខ្ពស់ពីសំណាក់ ឯកឧត្តម ប្រាក់ សោភ័ណ ប្រធានគណៈបញ្ជាការឯកភាពរដ្ឋបាលខេត្តសៀមរាប ព្រមទាំងមានការដឹកនាំបញ្ជាផ្ទាល់របស់ លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប និងកិច្ចសម្របសម្រួលនីតិវិធីពី ឯកឧត្តម សៀង សុខ ព្រះរាជអាជ្ញា នៃអយ្យការអមសាលាដំបូងខេត្តសៀមរាប៕SRP

អធិការក្រុងប៉ោយប៉ែត ច្រានចោលការបិទបាំងព័ត៌មាន និងថាជនបង្កត្រូវបានបញ្ជូនទៅចាត់ការតាមនីតិវិធីរួចហើយ

អធិការក្រុងប៉ោយប៉ែតបំភ្លឺជុំវិញករណីអធិការរងបង្កគ្រោះថ្នាក់ចរាចរណ៍ និងការសង្ស័យប្រើប្រាស់គ្រឿងញៀន

ករណីគ្រោះថ្នាក់ចរាចរណ៍បង្កដោយលោកអធិការរងនគរបាលក្រុងប៉ោយប៉ែត ដែលលោក ផែង វណ្ណៈ បានបង្ហោះសារចោទប្រកាន់ថា លោកអធិការរងរូបនោះបានបើករថយន្តគ្មានស្លាកលេខបុកគេ ព្រមទាំងសង្ស័យមានសារធាតុញៀន ក្នុងពេលដែលលោកអធិការក្រុងប៉ោយប៉ែតបានចេញមុខច្រានចោលការបិទបាំងព័ត៌មាន និងបញ្ជាក់ថា ជនបង្កត្រូវបានបញ្ជូនទៅចាត់ការតាមនីតិវិធីរួចហើយ។

លោក ផែង វណ្ណៈ ដែលជាអ្នកសកម្មនៅលើបណ្ដាញផ្សព្វផ្សាយសង្គម Facebook បានបង្ហោះសារមួយនៅព្រឹកថ្ងៃចន្ទ ទី១៤ ខែកញ្ញា ឆ្នាំ២០២៦ លើទំព័រហ្វេសប៊ុករបស់ខ្លួនថា «មហាជនឆ្ងល់ថា ហេតុអ្វីរថយន្តរបស់លោកអធិការរងក្រុងប៉ោយប៉ែតដែលកំពុងប្រើប្រាស់រាល់ថ្ងៃគ្មានស្លាកលេខ? ព្រោះរថយន្តគ្មានស្លាកលេខ មិនអាចធ្វើចរាចរណ៍លើដងផ្លូវបានទេ»។

លោក ផែង វណ្ណៈ បានអះអាងបន្តថា «រឿងហេតុម្សិលមិញ (ថ្ងៃទី១៣ ខែកញ្ញា) រថយន្តលោកអធិការរងក្រុងប៉ោយប៉ែត មុននឹងបុកម៉ូតូជនរងគ្រោះ គឺបានបើកបុករថយន្តដែលម្ចាស់ចតស្ងៀមម្តងហើយ នេះបើតាមប្រជាពលរដ្ឋដែលបានឃើញហេតុការណ៍។ លោកអធិការរងដូចជាមានអារម្មណ៍រវើរវាយខ្លាំង (សង្ស័យប្រើប្រាស់គ្រឿងញៀន)»។ តាមសំណេរដដែលនោះ លោកបានបន្ថែមថា សមត្ថកិច្ចគួរតែអញ្ជើញអធិការរងក្រុងប៉ោយប៉ែតរូបនោះមកតេស្តទឹកនោម ព្រមទាំងបានចោទប្រកាន់លោកអធិការក្រុងប៉ោយប៉ែតថា មានជំនាញខាងបិទបាំងព័ត៌មាន និងការពារអំពើអាក្រក់របស់កូនចៅជាច្រើនលើកច្រើនសារ រហូតដល់ករណីគ្រោះថ្នាក់ចរាចរណ៍នេះទៀតផង។

ពាក់ព័ន្ធនឹងការចោទប្រកាន់ខាងលើនេះ លោក ព្រហ្ម ពិសិដ្ឋ អធិការនគរបាលក្រុងប៉ោយប៉ែត បានឆ្លើយបំភ្លឺថា ករណីគ្រោះថ្នាក់ចរាចរណ៍ដែលបង្កដោយអធិការរងក្រោមឱវាទរបស់លោក ពិតជាបានកើតឡើងមែន ហើយលោកបានបញ្ជាឱ្យមន្ត្រីជំនាញនៃអធិការដ្ឋាននគរបាលក្រុងប៉ោយប៉ែត ចាត់បញ្ជូនជនបង្កទៅដោះស្រាយនៅការិយាល័យនគរបាលចរាចរណ៍ នៃស្នងការដ្ឋាននគរបាលខេត្តបន្ទាយមានជ័យរួចរាល់ហើយ។ ដោយឡែក ករណីសង្ស័យថាមានប្រើប្រាស់សារធាតុញៀន ឬគ្រឿងស្រវឹងនោះ គិតត្រឹមថ្ងៃត្រង់ ថ្ងៃទី១៤ ខែកញ្ញា ឆ្នាំ២០២៦ នេះ មិនទាន់មានលទ្ធផលបញ្ជាក់នៅឡើយទេ។

ដោយឡែក ចំពោះការលើកឡើងថា អធិការរងរូបនោះបានបង្កគ្រោះថ្នាក់ចរាចរណ៍ពីរដង និងប្រើប្រាស់រថយន្តគ្មានស្លាកលេខ លោកអធិការក្រុងប៉ោយប៉ែត បានបញ្ជាក់ថា លោកពុំធ្លាប់បានដឹងនោះឡើយ ដោយលោកកត់សម្គាល់ឃើញថារថយន្តនោះតែងមានស្លាកលេខធម្មតា។ ប៉ុន្តែនៅថ្ងៃកើតហេតុ លោកមិនបានដឹងច្បាស់លម្អិតនោះទេ ដោយសារលោកជាប់បំពេញភារកិច្ចនៅក្រៅអធិការដ្ឋាន៕SRP

អភិបាលខេត្តបាត់ដំបង ណែនាំដល់អភិបាលស្រុកថ្មីត្រូវពង្រឹងការបង្រ្កាបគ្រប់ប្រភេទ

អភិបាលខេត្តបាត់ដំបង ឯកឧត្តម សុខ លូ បានណែនាំដល់អភិបាលស្រុកទើបប្រកាសចូលកាន់តំណែងថ្មីត្រូវពង្រឹងការបង្រ្កាបគ្រឿងញៀន ល្បែងស៊ីសង ក្មេងទំនើង បទល្មើសនេសាទ និងបទល្មើសគ្រប់ប្រភេទឱ្យមានប្រសិទ្ធភាពខ្ពស់។

ឯកឧត្តម ដាស់តឿនអាជ្ញាធរស្រុក ឃុំត្រូវយកចិត្តទុកដាក់ក្នុងរំដោះដីចំណីផ្លូវ បើកផ្លូវសាធារណៈរបស់រដ្ឋឱ្យបានធំទូលាយ ថែរក្សាអនាម័យបរិស្ថាន ទប់ស្កាត់ការរំពងសំឡេងឮខ្លាំងរំខានដល់ការរស់នៅរបស់ប្រជាពលរដ្ឋ បន្តដាំដើមឈើនៅតាមទីប្រជុំជន និងសាលារៀនឱ្យបានច្រើនបន្ថែមទៀតសម្រាប់បម្រើជាប្រយោជន៍សម្រាប់កូនចៅជំនាន់ក្រោយ។

ឯកឧត្តម ណែនាំដល់មន្ត្រីរាជការក្នុងរចនាសម្ព័ន្ធរដ្ឋបាលស្រុកទាំងអស់ សូមបន្តរក្សាសាមគ្គីភាព គោរពឋានានុក្រម និងគាំទ្រដល់ការដឹកនាំរបស់អភិបាលស្រុកថ្មីដើម្បីឱ្យការងារបម្រើសេវារដ្ឋបាល សេវាសាធារណៈ បានប្រព្រឹត្តទៅប្រកបដោយថាមពល និងមានប្រសិទ្ធភាពខ្ពស់។

ឯកឧត្តម គូសបញ្ជាក់ថា ស្ថានភាពសន្តិសុសណ្តាប់ធ្នាប់សាធារណៈនៅក្នុងខេត្តបាត់ដំបង មានលក្ខណៈល្អប្រសើរ ក្នុងនោះគណៈបញ្ជាការឯកភាពរដ្ឋបាលគ្រប់លំដាប់ថ្នាក់បានធ្វើការចុះបង្ក្រាប និងបិទទីតាំងល្បែងផ្សងសំណាងខុសច្បាប់នៅតាមមូលដ្ឋានក្នុងភូមិសាស្ត្រខេត្តបានល្អប្រសើរ។

ក្នុងនាមក្រុមប្រឹក្សាខេត្ត និងអាជ្ញាធរនៅរដ្ឋបាលថ្នាក់ក្រោមជាតិ ឯកឧត្តម សុខ លូ ប្រកាសគាំទ្រ និងអនុវត្តយ៉ាងពេញទំហឹងចំពោះការដាក់ចេញផែនការយុទ្ធសាស្ត្រស្តីពីការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ឆ្នាំ២០២៤-២០២៨ និងសូមប្តេជ្ញាចូលរួមអនុវត្តឱ្យទទួលបានជោគជ័យ ដើម្បីពង្រឹងសន្តិសុខជាតិ សណ្ដាប់ធ្នាប់សាធារណៈ និងការគ្រប់គ្រងរដ្ឋបាលដែនដីឱ្យកាន់តែមានប្រសិទ្ធភាព ហើយជឿជាក់យ៉ាងមុតមាំថា ផ្លែផ្កាជោគជ័យនៃការអនុវត្តផែនការយុទ្ធសាស្ត្រនេះនឹងធ្វើឱ្យប្រជាពលរដ្ឋរស់នៅប្រកបដោយសេចក្តីសុខ និងមានជីវភាពរស់នៅកាន់តែប្រសើ មានលទ្ធភាពកាន់តែងាយស្រួលក្នុងការទទួលបានសេវាសាធារណៈ ទាំងសេវារដ្ឋបាល និងសេវាសន្តិសុខប្រកបដោយទំនុកចិត្ត ការជឿជាក់ ឆាប់រហ័ស ទំនើប និងប្រកបដោយប្រសិទ្ធភាព ធានាបាននូវការអភិវឌ្ឍខេត្តលើគ្រប់វិស័យ បរិយាប័ន្ន និងបច្ចេកវិទ្យាឌីជីថល។

អភិបាលខេត្តបាត់ដំបង ណែនាំបែបនេះ ក្នុងឱកាសបានអញ្ជើញជាអធិបតីក្នុងពិធីប្រកាសចូលកាន់មុខតំណែងលោក ទន់ សុផន អភិបាលស្រុកមោងឫស្សីដែលពិធីនេះធ្វើឡើងនៅថ្ងៃទី១៤ ខែកញ្ញា ឆ្នាំ២០២៦ នៅបរិវេណសាលាស្រុកមោងឫស្សី៕SRP

ឯកឧត្តមអ៊ុន ចាន់ដា ណែនាំឲ្យរៀបចំដាំដើមត្នោតបន្ថែមជាជួរស្អាតៗ ដោយត្រូវបន្តថែទាំ និងរៀបចំបរិស្ថានឱ្យបានល្អប្រសើរ

ឯកឧត្តមអ៊ុន ចាន់ដា អភិបាលខេត្តកំពង់ចាមបានណែនាំដល់អាជ្ញាធរ និងអ្នកពាក់ព័ន្ធ សូមរៀបចំដាំដើមត្នោតបន្ថែមជាជួរស្អាតៗ ដោយត្រូវបន្តថែទាំ និងរៀបចំបរិស្ថានឱ្យបានល្អប្រសើរ ដើម្បីឱ្យកាន់តែមានភាពទាក់ទាញ ដល់ភ្ញៀវទេសចរណ៍មកទស្សនាកម្សាន្ត។

អភិបាលខេត្តកំពង់ចាម មានប្រសាសន៍ណែនាំបែបនេះ ក្នុងឱកាសអញ្ជើញចូលក្រាបបង្គំសួរសុខទុក្ខព្រះចៅអធិការវត្ត សិរីសាគរ ស្រុកស្រីសន្ធរ នៅថ្ងៃម្សិលមិញ ក្នុងដំណើរអញ្ជើញបំពេញបេសកកម្មនៅស្រុកស្រីសន្ធរ។

គួរបញ្ជាក់ថា ផ្លូវបេតុង ចូលវត្តសិរីសាគរ ត្រូវបានបុព្វបុរសជំនាន់មុននាំគ្នាដាំដើមត្នោតជាជួរយ៉ាងស្រស់ស្អាត ដែលមានអាយុកាលរាប់រយឆ្នាំមកហើយ ដោយបានទាក់ទាញដល់ភ្ញៀវទេសចរណ៍ពីគ្រប់ទិសទី ជាពិសេសអ្នកលេងបណ្ដាញសង្គម មកផ្តិតយករូបភាព និងវីដេអូធ្វើការបង្ហោះចែកចាយពេញបណ្ដាញសង្គមផងដែរ៕SRP

អភិបាលខេត្តកំពង់ចាម៖ ការបង្កើតទីលានចាក់សំរាមនេះ គឺជាជំហានសំខាន់មួយ ក្នុងការកែលម្អបរិស្ថានរស់នៅរបស់ប្រជាពលរដ្ឋ

ឯកឧត្តម អ៊ុន ចាន់ដា អភិបាលខេត្តកំពង់ចាម បានបញ្ជាក់ថា ការបង្កើតទីលានចាក់សំរាមនេះ គឺជាជំហានសំខាន់មួយ ក្នុង ការកែលម្អបរិស្ថានរស់នៅរបស់ប្រជាពលរដ្ឋ ធានា សុខុមាលភាពសាធារណៈ និងទប់ស្កាត់ការចោលសំរាម ពាសវាលពាសកាល។ ឯកឧត្តមក៏បានណែនាំឲ្យក្រុមការងារ បច្ចេកទេស និងអាជ្ញាធរមូលដ្ឋានសហការគ្នាសិក្សាផល ប៉ះពាល់ ឲ្យគ្រប់ជ្រុងជ្រោយទាំងផ្នែកបរិស្ថាន និងសង្គម ដើម្បីឲ្យការអនុវត្តគម្រោងនេះដំណើរការទៅដោយរលូន និង ទទួលបានផលប្រយោជន៍ អតិបរមា ជូនប្រជាពលរដ្ឋក្នុងតំបន់។

ឯកឧត្តម អ៊ុន ចាន់ដា បានបន្ថែមថា ប្រសិនបើតំបន់នេះមានការគ្រប់គ្រងសំរាមបានល្អប្រសើរ វាមិនត្រឹមតែជួយឱ្យភូមិឃុំមានអនាម័យ និងខ្យល់អាកាសបរិសុទ្ធប៉ុណ្ណោះទេ ប៉ុន្តែថែមទាំងរួមចំណែកលើកកម្ពស់សោភ័ណភាព និងទាក់ទាញទេសចរណ៍ ឱ្យមកកម្សាន្តក្នុងតំបន់នេះកាន់តែច្រើន។

អភិបាលខេត្តកំពង់ចាម មានប្រសាសន៍បែបនេះក្នុងឱកាសចុះពិនិត្យទីតាំងគ្រោងរៀបចំទីលានចាក់សំរាម នៅឃុំព្រែកដំបូក សម្រាប់បម្រើឲ្យស្រុកចំនួន ៣ នៅថ្ងៃទី១៣ ខែកញ្ញា ឆ្នាំ២០២៦ ស្រុកស្រីសន្ធរ។

គម្រោងរៀបចំទីលានចាក់សំរាមថ្មីនេះ ត្រូវបានរៀបចំឡើង ដើម្បីឆ្លើយតបទៅនឹងតម្រូវការគ្រប់គ្រងសំណល់ រឹង-សំរាម ឲ្យមានប្រសិទ្ធភាព និងអនាម័យបរិស្ថានខ្ពស់ ដោយត្រូវ ប្រើប្រាស់រួមគ្នាសម្រាប់ ស្រុក ចំនួន៣ នៃខេត្ត២ រួមមាន ៖ ស្រុកស្រីសន្ធរ, ស្រុកកោះសូទិន (ខេត្តកំពង់ចាម) និងស្រុកខ្សាច់កណ្តាល (ខេត្តកណ្តាល)៕SRP

អាជ្ញាធរខេត្តកំពង់ចាម ត្រៀមទប់ច្រាំងទន្លេនៅស្រុកស្រីសន្ធរ ខណៈផ្ទះ ៧ខ្នងត្រូវរើចេញ និង ១២ខ្នងទៀតកំពុងប្រឈមបាក់ស្រុត

ឯកឧត្តម អ៊ុន ចាន់ដា អភិបាលខេត្តកំពង់ចាម ព្រមទាំងសហការី បានអញ្ជើញចុះពិនិត្យស្ថានភាពបាក់ច្រាំងទន្លេដោយផ្ទាល់ នៅថ្ងៃទី១៣ ខែកញ្ញា ឆ្នាំ២០២៦ ក្នុងឃុំឫស្សីស្រុក ស្រុកស្រីសន្ធរ ដើម្បីវាយតម្លៃផលប៉ះពាល់ និងស្វែងរកដំណោះស្រាយជាបន្ទាន់ជូនប្រជាពលរដ្ឋ។

នៅក្នុងឱកាសចុះពិនិត្យនោះ ឯកឧត្តមអភិបាលខេត្ត បានបញ្ជាក់ថា អាជ្ញាធរខេត្តនឹងរៀបចំផែនការជួយជួសជុលទប់ច្រាំងទន្លេនៅទីតាំងនេះ និងទីតាំងឃុំចំនួនពីរទៀត ក្នុងអំឡុងរដូវទឹកស្រក ឆ្នាំ២០២៧ខាងមុខ ដើម្បីទប់ស្កាត់ និងចៀសវាងកុំឱ្យមានការបាក់ស្រុតបន្តទៀត។

លោកមេឃុំឫស្សីស្រុក បានឲ្យដឹងថាបញ្ហាបាក់ច្រាំងទន្លេនៅឃុំឫស្សីស្រុក ស្រុកស្រីសន្ធរ នាពេលនេះ កំពុងបង្កការព្រួយបារម្ភយ៉ាងខ្លាំងដល់ប្រជាពលរដ្ឋក្នុងមូលដ្ឋាន ដោយបច្ចុប្បន្ន ផ្ទះ ០៧ ខ្នង ត្រូវបានបង្ខំចិត្តរុះរើ និងជម្លៀសចេញជាបន្ទាន់ដើម្បីគេចពីគ្រោះថ្នាក់។ ផ្ទះ ១២ ខ្នងទៀត កំពុងស្ថិតក្នុងស្ថានភាពប្រឈមខ្លាំង នឹងការបាក់ស្រុតធ្លាក់ចូលក្នុងទន្លេ ប្រសិនបើគ្មានវិធានការទប់ស្កាត់ទាន់ពេលវេលា។

ដំណោះស្រាយចំពោះមុខ អាជ្ញាធរមូលដ្ឋាន បានជួយសម្រួលដល់ការរុះរើ និងដឹកជញ្ជូនសម្ភារប្រជាពលរដ្ឋទៅកាន់ទីទួលសុវត្ថិភាព បន្ទាប់មកត្រៀមអន្តរាគមន៍ជួសជុល ទប់ស្កាត់ការបាក់បន្ថែម ក្នុងអំឡុងពេលរដូវទឹកស្រក និងរៀបចំគម្រោងទប់ច្រាំងទន្លេផ្លូវការ នាឆ្នាំ២០២៧។

អភិបាលខេត្តកំពង់ចាម ក៏បានណែនាំឱ្យអាជ្ញាធរមូលដ្ឋានបន្តតាមដានមើលស្ថានភាពដីបាក់ និងបានអំពាវនាវឱ្យប្រជាពលរដ្ឋដែលរស់នៅជិតតំបន់ប្រឈម បង្កើនការប្រុងប្រយ័ត្នខ្ពស់ ដើម្បីសុវត្ថិភាពអាយុជីវិត និងទ្រព្យសម្បត្តិ។SRP