អាជ្ញាធរចៅសង្កាត់ជ្រាវថា ក្រុមហ៊ុន សែន គីរី អេកូផាក មិនមែនជួសជុលគ្រាន់តែបង្គ្រប់កិច្ចនោះទេ
ចំណែកលោក ក្អោប រ៉ន ចៅសង្កាត់ជ្រាវ បានឱ្យដឹងថា បើទោះបីជាក្រុមហ៊ុន សែន គីរី អេកូផាក មានច្បាប់ លិខិតអនុញ្ញាតត្រឹមត្រូវចេញដោយរដ្ឋបាលខេត្តសៀមរាប ក្រសួងធនធានទឹក និងឧតុនិយម ក្រសួងរ៉ែ និងថាមពល រួមទាំងកិច្ចសន្យាការពារបរិស្ថាន ចេញដោយក្រសួងបរិស្ថាន ក៏ដោយតែក្រុមហ៊ុនត្រូវបង្កើនការជួសជុល និងថែទាំផ្លូវឱ្យបានជាប្រចាំ តាមកិច្ចសន្យា លើលិខិតអនុញ្ញាត មិនមែនជួសជុលគ្រាន់តែបង្គ្រប់កិច្ចនោះទេ។
ជុំវិញករណីការអនុវត្តគម្រោងវិនិយោគស្ដារឃ្លាំងទឹកទំនប់៧៨ ដោយដឹកជញ្ជូនអាចម៍ដីបំផ្លាញផ្លូវយ៉ាងធ្ងន់ធ្ងរជាច្រើន ក្នុងមូលដ្ឋាន អាជ្ញាធរខេត្តសៀមរាប បានប្រាប់ឱ្យក្រុមហ៊ុន សែន គីរី អេកូផាក អនុវត្តតាមកិច្ចសន្យា និងជួសជុលផ្លូវដែលរងខូចខាត។
លោក ឌី រ៉ាដូ អភិបាលរងខេត្ត កាលពីថ្ងៃទី២៨ ខែកញ្ញា ឆ្នាំ២០២៦ បានដឹកនាំក្រុមការងារចម្រុះ ប្រជុំពិភាក្សា និងចុះពិនិត្យផ្លូវចេញ -ចូលការដ្ឋានស្ដារឃ្លាំងទឹកទំនប់៧៨ របស់ក្រុមហ៊ុន សែន គីរី អេកូផាក។
នៅក្នុងកិច្ចប្រជុំ អភិបាលរងខេត្តសៀមរាបរូបនេះបានប្រាប់ឱ្យក្រុមហ៊ុន ដែលទទួលបានច្បាប់អនុញ្ញាតស្ដារឃ្លាំងទឹកទំនប់៧៨ ធ្វើការជួសជុល និងកែលម្អផ្លូវប្រវែងជិត ៣គីឡូម៉ែត្រ ត្រង់ចំណុចភូមិបុស្សក្រឡាញ់ សង្កាត់ជ្រាវ ក្រុងសៀមរាប បន្ទាប់ពីការអនុវត្តគម្រោងវិនិយោគមួយរយៈ បង្កឱ្យផ្លូវរងការខូចខាត ជាហេតុនាំឲ្យប្រជាពលរដ្ឋ ពិបាកធ្វើដំណើរជាពិសេស ក្នុងរដូវវស្សានេះ។
លោក ឌី រ៉ាដូ មានប្រសាសន៍ថា ការប្រជុំនេះមានគោលបំណងសម្របសម្រួល និងស្វែងរកដំណោះស្រាយ រួមគ្នារវាងអាជ្ញាធរខេត្ត អាជ្ញាធរមូលដ្ឋាន មន្ទីរជំនាញពាក់ព័ន្ធ តំណាងក្រុមហ៊ុន និងតំណាងប្រជាពលរដ្ឋ ដើម្បីជួសជុលផ្លូវ និងរៀបចំការធ្វើចរាចរណ៍ឡើងវិញ។
អភិបាលរងខេត្តសៀមរាប ក៏បានជំរុញឱ្យក្រុមហ៊ុនសែន គីរី អេកូផាក ទទួលខុសត្រូវជួសជុលផ្លូវនេះឡើងវិញ ដើម្បីឲ្យប្រជាពលរដ្ឋ អាចធ្វើដំណើរបានស្រួល ដោយជំហានដំបូង ក្នុងដំណាក់កាលកម្ពុជាកំពុងទទួលរងឥទ្ធិពលសម្ពាធទាប ធ្វើឱ្យមានភ្លៀងធ្លាក់សឹងរាល់ថ្ងៃនេះ ត្រូវដោះស្រាយជួសជុល ចាក់លុបជង្ហុកធំៗ នឹងក្រោយពេលអាកាសធាតុល្អគ្មានភ្លៀងធ្លាក់ ត្រូវធ្វើការចាក់គ្រួសក្រហមសម្រួល កុំឱ្យមានការរអិល ព្រមទាំងជំរុញឲ្យមានការចាក់បេតុង ឬធ្វើផ្លូវកៅស៊ូ នារដូវប្រាំងខាងមុខផងដែរ។
ជាមួយគ្នានេះផងដែរ តំណាងប្រជាពលរដ្ឋភូមិបុស្សក្រឡាញ់ បានស្នើឱ្យក្រុមហ៊ុនជួយជួសជុល តាមជំហានដូចជា ស្ដារប្រឡាយ សងខាងផ្លូវដើម្បីបញ្ចៀសទឹក , ឈូស គៀរសម្រួលផ្លូវ ឱ្យប្រជាពលរដ្ឋអាចធ្វើដំណើរបាននារដូវភ្ជុំបិណ្ឌ, អាកាសធាតុល្អ ផ្អាកភ្លៀង ក្រុមហ៊ុនជួយចាក់ថ្ម Mix ,ពេលគម្រោងសម្រេចបាន ៨០%-៩០% ត្រូវធ្វើផ្លូវបេតុងឬកៅស៊ូ និងផ្អាកការដឹកជញ្ជូនពេលមានភ្លៀង និងក្រោយពេលភ្លៀងមួយថ្ងៃទើបអាចដឹកបានវិញ។
ក្រោយមានការសម្របសម្រួលមពីក្រុមការងារចម្រុះ ក្រុមហ៊ុន សែន គីរី អេកូផាក បានទទួលស្គាល់ថា ការអនុវត្តគម្រោងស្ដារទំនប់ទឹក៧៨ ក្រុមហ៊ុនទើបអនុវត្តបានរយៈពេល៦ខែប៉ុណ្ណោះ ហើយក្រុមហ៊ុនក៏បានជួសជុលផ្លូវ ដោយចាក់ដីសរ ជាបណ្ដើរៗដែរ តែដោយសាររដូវភ្លៀងទើបបណ្ដាលឲ្យផ្លូវមានសភាពជោគជាំ ពិបាកក្នុងការជួសជុលភ្លាមៗ។
ជាមួយគ្នានេះ ក្រុមហ៊ុនសម្រេចជួសជុលផ្លូវបណ្ដោះអាសន្ន ទៅតាមបច្ចេកទេស ដែលអាចឱ្យប្រជាពលរដ្ឋធ្វើដំណើរបាន ក្រោយចប់កិច្ចប្រជុំ និងសម្រេចថា ក្រោយមេឃផ្អាកភ្លៀង និងរៀបចំជួសជុលដោយចាក់កម្ទេចថ្មដើម្បីលុបក្រឡុក និងចាក់គ្រួសក្រហម ឬថ្មMix ទៅតាមជំហាន និងលទ្ធភាពរបស់ក្រុមហ៊ុនជាបន្តបន្ទាប់ និងស្នើដំណើរការអាជីវកម្មជាធម្មតាដើម្បីឲ្យក្រុមហ៊ុន អាចមានចំណូលដើម្បីចំណាយទៅលើការជួសជុលផ្លូវខាងលើនេះផងដែរ។
តំណាងក្រុមហ៊ុន ក៏បានបញ្ជាក់ថា ក្រោយគម្រោងជំហានទីមួយបញ្ចប់ ក្រុមហ៊ុនត្រូវផ្លាស់ប្ដូរទៅប្រើផ្លូវដឹកជញ្ជូនមួយទៀត ហើយក្រុមហ៊ុន និងសន្យាជួសជុលផ្លូវនេះឱ្យបានស្អាត ឬប្រសិនបើមានលទ្ធភាពក្រុមហ៊ុននិងចាក់ជាផ្លូវកៅស៊ូជូនប្រើប្រាស់។
សូមរំលឹកថា កំណាត់ផ្លូវដែលរងការខូចខាតខាងលើមានប្រវែងប្រមាណ ២ ៩០០ម៉ែត្រ ហើយកាលពីថ្ងៃទី២២ ខែកញ្ញា ឆ្នាំ២០២៦ ប្រជាពលរដ្ឋមួយចំនួនក្នុងភូមិបុស្សក្រឡាញ់ សង្កាត់ជ្រាវ បានធ្វើការបិទផ្លូវ មិនឱ្យរថយន្តដឹកដីរបស់ក្រុមហ៊ុន សែន គីរី អេកូផាក ធ្វើដំណើរឆ្លងកាត់បណ្ដោះអាសន្ន ដើម្បីទាមទាររកដំណោះស្រាយផងដែរ៕SRP
