កម្ពុជាចាត់ទុកជំនួយមនុស្សធម៌របស់ចិន គឺជាការការពារ ផ្តល់ក្តីសង្ឃឹម និងផ្លាស់ប្តូរជីវិតមនុស្ស

យោងតាមការបង្ហោះផ្សាយនៅបណ្តាញសង្គមរបស់អង្គភាពអាជ្ញាធរមីន នៅថ្ងៃទី០៨ ខែមករា ឆ្នាំ២០២៦ បានឱ្យដឹងថា នៅទីស្នាក់ការអាជ្ញាធរមីន ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន និង ឯកឧត្តម វ៉ាង វិនពីន ឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំនៅកម្ពុជា បានអញ្ជើញជាអធិបតីក្នុងពិធីប្រគល់-ទទួលសម្ភារៈដែលជាជំនួយរបស់រដ្ឋាភិបាលនៃសាធារណរដ្ឋប្រជាមានិតចិន សម្រាប់កិច្ចប្រតិបត្តិការការងារមនុស្សធម៌ក្នុងវិស័យសកម្មភាពមីននៅកម្ពុជា។ សម្ភារៈទាំងនោះ រួមមានឧបករណ៍រាវរកលោហៈ ឧបករណ៍និងសម្ភារចាំបាច់ និងរថយន្ត។

នាឱកាសនោះផងដែរ ឯកឧត្តមទេសរដ្ឋមន្រ្តី លី ធុជ បានចាត់ទុកជំនួយរបស់ចិន មិនមែនគ្រាន់តែជាឧបករណ៍សម្រាប់ប្រតិបត្តិការប៉ុណ្ណោះទេ តែជាឧបករណ៍សម្រាប់ការពារ ផ្តល់ក្តីសង្ឃឹម និងផ្លាស់ប្តូរជីវិតមនុស្ស។ ឧបករណ៍ទាំងនេះ នឹងធានានូវសុវត្ថិភាព និងប្រសិទ្ធភាពរបស់អ្នកបោសសម្អាតមីន ខណៈដែលពួកគេបន្តភារកិច្ចដ៏ថ្លៃថ្លា ក្នុងការរំដោះផ្ទៃដីកម្ពុជា ឱ្យរួចផុតពីកេរ្តិ៍ដំណែលនៃសង្គ្រាម។

តាងនាមឱ្យសម្តេចធិបតី ហ៊ុន ម៉ាណែត នាយករដ្ឋមន្រ្តី ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណយ៉ាងជ្រាលជ្រៅ ជូនចំពោះប្រទេសចិន ដែលបាននិងកំពុងបន្តគាំទ្រដល់វិស័យសកម្មភាពមីននៅកម្ពុជា ទាំងឧបករណ៍សម្ភារៈ ថវិកា ជំនាញបច្ចេកទេស ការអភិវឌ្ឍសមត្ថភាព ការអប់រំកាត់បន្ថយគ្រោះថ្នាក់ និងកិច្ចសង្គ្រោះជនរងគ្រោះដោយសារមីន និងសំណល់ជាតិផ្ទុះពីសង្គ្រាម។ តាមរយៈការគាំទ្រនេះ ជីវិតមនុស្សរាប់មិនអស់ត្រូវបានការពារ សហគមន៍ត្រូវបានស្តារឡើងវិញ ហើយអ្នករស់រានមានជីវិត ត្រូវបានផ្តល់នូវអំណាចដើម្បីកសាងអនាគតឡើងវិញប្រកបដោយសេចក្តីថ្លៃថ្នូរ។

ឯកឧត្តមទេសរដ្ឋមន្រ្តី ក៏បានគូសបញ្ជាក់ការរួមចំណែកដ៏សំខាន់នៃ គម្រោងកិច្ចសហប្រតិបត្តិការមេគង្គ-ឡានឆាងក្នុងសកម្មភាពមីន ដែលគាំទ្រដោយមូលនិធិពិសេសសម្រាប់កិច្ចសហប្រតិបត្តិការមេគង្គ-ឡានឆាង របស់រដ្ឋាភិបាលចិន ដែលគំនិតផ្តួចផ្តើមនេះ បានបង្ហាញពីចក្ខុវិស័យរបស់ចិនក្នុងកិច្ចសហប្រតិបត្តិការតំបន់ ដោយផ្អែកលើការទទួលខុសត្រូវរួម ការជួយគ្នាទៅវិញទៅមក និងការរក្សាសន្តិសុខរួមគ្នា៕SRP

អភិបាលខេត្តបាត់ដំបង ឯកឧត្តម សុខ លូ ជំរុញឱ្យអាជ្ញាធរត្រូវបន្តអនុវត្តន៍យុទ្ធនាការផ្ទះមួយខ្នងដើមឈើមួយដើមដោយបង្កើនការដាំដើមឈើឱ្យបានច្រើននៅតាមទីប្រជុំជន និងទីសាធារណៈនានា។

ឯកឧត្តមថ្លែងជំរុញយ៉ាងដូច្នេះ នៅព្រឹកថ្ងៃទី 8 ខែមករាឆ្នាំ 2021 នេះ ឱកាសអញ្ជើញជាគណៈអធិបតីក្នុងពិធីប្រកាសចូលកាន់មុខតំណែងអភិបាលនៃគណៈអភិបាលស្រុកសំឡូត។

នៅបរិវេណសាលាស្រុកសំឡូត ឯកឧត្តម សុខ លូ បានណែនាំដល់លោក ហ៊ុន ធឿន អភិបាលស្រុកទើបប្រកាសចូលកាន់មុខតំណែងថ្មី ត្រូវបន្តយកចិត្តទុកដាក់ការបង្រ្កាបបទល្មើសគ្រឿងញៀន ល្បែងស៊ីសង និងក្មេងទំនើង ឱ្យអស់ពីក្នុងមូលដ្ឋាន។

ឯកឧត្តមអភិបាលខេត្តណែនាំឱ្យគណៈបញ្ជាការឯកភាពស្រុកត្រូវយកចិត្តទុកដាក់ឱ្យបានខ្ពស់សហការទប់ស្កាត់ បង្ក្រាបបទល្មើសធនធានរ៉ែ ការកាប់ព្រៃឈើ ការកាយយកថ្មភ្នំ និងក្រួសជាដើមឱ្យមានប្រសិទ្ធភាពខ្ពស់និងបន្តតាមដាន សហការអនុវត្តការពារដែនអភិរក្សបរិស្ថាន តំបន់ប្រើប្រាស់ច្រើនយ៉ាងសំឡូតឱ្យម៉ត់ចត់ និងទប់ស្កាត់បទល្មើសឱ្យខាងតែបាន។

បើតាមអនុក្រឹត្យរបស់រាជរដ្ឋាភិបាលបានឱ្យដឹងថា លោក ហ៊ុន ធឿន ត្រូវបានតែងតាំងឱ្យកាន់មុខតំណែងជាអភិបាលនៃគណៈអភិបាលស្រុកសំឡូតជំនួសលោក សើ សាម៉េត ដែលត្រូវផ្ទេរភារកិច្ចពីអភិបាលនៃគណៈអភិបាលស្រុកសំឡូត ឱ្យកាន់មុខតំណែងជាអភិបាលនៃគណៈអភិបាលស្រុករតមណ្ឌល។

លោក ហ៊ុន ធឿន បានប្ដេជ្ញា អនុវត្តតួនាទី ភារកិច្ចរបស់ខ្លួនក្នុងការពង្រឹងសន្តិភាព ស្ថិរភាពនយោបាយ ស្ថិរភាពសង្គម និងការអភិវឌ្ឍសេដ្ឋកិច្ចសង្គមនៅក្នុងមូលដ្ឋានស្រុកសំឡូត និងចូលរួមក្នុងការអនុវត្តកម្មវិធីនយោបាយ និងយុទ្ធសាស្ត បញ្ចកោណរបស់រាជរដ្ឋាភិបាលសម្រាប់នីតិកាលទី៧នៃរដ្ឋសភា និងគោលនយោបាយកំណែទម្រង់នានា៕SRP

តាមលិខិតរបស់ក្រសួងមហាផ្ទៃ នៃរាជរដ្ឋាភិបាលកម្ពុជា បានចេញសេចក្តីប្រកាសព័ត៌មានជូនសាធារណជនជាតិ និងអន្តរជាតិ ឱ្យជ្រាបថា ក្នុងក្របខ័ណ្ឌនៃកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន និងផ្អែកតាមសំណើរបស់អាជ្ញាធរ មានសមត្ថកិច្ចនៃសាធារណរដ្ឋប្រជាមានិតចិន សមត្ថកិច្ចកម្ពុជា បានអនុវត្តប្រតិបត្តិការចាប់ខ្លួនពលរដ្ឋចិនចំនួន ៣នាក់ និងបញ្ជូនទៅប្រទេសចិន។

បុគ្គលទាំង ៣នាក់នោះ រួមមាន លោក Chen Zhi លោក Xu Ji Liang និងលោក Shao Ji Hui។ ប្រតិបត្តិការនេះ បានធ្វើឡើងកាលពីថ្ងៃទី ៦ ខែមករា ឆ្នាំ ២០២៦ បន្ទាប់ពីសមត្ថកិច្ចនៃព្រះរាជាណាចក្រកម្ពុជា និងសមត្ថកិច្ចនៃសាធារណរដ្ឋប្រជាមានិតចិន បានសហការស៊ើបអង្កេតរួមគ្នា អស់រយៈពេលជាច្រើនខែ។

ក្រសួងមហាផ្ទៃ បានបញ្ជាក់បន្ថែមថា លោក Chen Zhi ត្រូវបានព្រះមហាក្សត្រ ចេញព្រះរាជក្រឹត្យដកសញ្ជាតិខ្មែរ ដោយផ្អែកតាមច្បាប់សញ្ជាតិនៃព្រះរាជាណាចក្រកម្ពុជា កាលពីខែធ្នូ ឆ្នាំ ២០២៥៕SRP

មេគយខេត្តស្វាយរៀង មានអំណាចដាក់ពង្រាយកម្លាំងសុីវិល ឱ្យចាំរាប់ក្បាលឡានកំណត់យកលុយ តាមច្រកទ្វារព្រំដែននានា តាមអំពើចិត្ត

ខេត្តស្វាយរៀង៖មេសាខាគយនិងរដ្ឋាករ ខេត្តស្វាយរៀង លោក សំ សុវណ្ណារិទ្ធ បានរងការរិះគន់ថា កំពុងប្រើអំណាចក្ដោបសេដ្ឋកិច្ចក្រៅប្រព័ន្ធច្បាប់ ឬអាចនិយាយបានថាប្រព្រឹត្តអំពើពុករលួយយ៉ាងធ្ងន់ធ្ងរដោយដាក់ពង្រាយកម្លាំងស៊ីវិលគ្រប់ច្រកល្ហក តាមច្រកទ្វារព្រំដែននានា ក្នុងភូមិសាស្ត្រខេត្តស្វាយរៀង ឱ្យអង្គុយចាំរាប់ក្បាលឡាន កំណត់យកលុយពីអាជីវករ អ្នករកស៊ីដឹកទំនិញ កសិផល ចេញចូលឆ្លងដែន ពីកម្ពុជាទៅវៀតណាម និងពីវៀតណាម មកកម្ពុជា បានយ៉ាងច្រើនសន្ទឹកសន្ទាប់ក្នុងមួយថ្ងៃៗ។

សេចក្ដីរាយការណ៍ពីខេត្តស្វាយរៀងបានឱ្យដឹងថាជាក់ស្តែងសាខាគយនិងរដ្ឋាករខេត្តស្វាយរៀង បានដាក់កម្លាំងស៊ីវិល ឱ្យឈរជើងក្បែរ ច្រករបៀងសំយ៉ោង នៅស្រុកកំពង់រោទិ៍ និងដាក់កម្លាំងស៊ីវិលចម្ងាយជាង២០០ម៉ែត្រ ពីច្រករបៀងក្រសាំងជ្រំ ស្រុកស្វាយជ្រំ និងប្រើជនស៊ីវិល ឱ្យឈរជើងចម្ងាយប្រហែល៥០០ម៉ែត្រ ពីច្រកទ្វារព្រំដែនទ្វេភាគីសំរោង ស្រុកចន្ទ្រា និងដាក់កញ្ចុះ ក្បែរចិញ្ចើមផ្លូវ ចម្ងាយប្រមាណជា៤០០ម៉ែត្រ ពីច្រកទ្វារព្រំដែនតំបន់ដូង ស្រុករមាសហែក.និងប្រើជនស៊ីវិលឱ្យឈរជើង ចម្ងាយប្រមាណជា២គីឡូម៉ែត្រ ពីច្រកទ្វារព្រំដែនទ្វេភាគីបុសមន ស្រុករំដួល និងតាមបណ្ដាច្រកទ្វារព្រំដែនមួយចំនួនទៀត ដើម្បីចាំរាប់ក្បាលឡាន កំណត់យកលុយតាមអំពើចិត្ត។

ជុំវិញរឿងរាវនេះ ក្រុមអាជីវករអ្នកដឹកស្រូវទៅលក់ឱ្យឈ្មួញវៀតណាម តាម” ច្រកទ្វារព្រំដែនទ្វេភាគីបុសមន” ដោយប្រើរថយន្តប្រភេទ”វ៉េអង” បានបង្ហើបប្រាប់អ្នកសារព័ត៌មានថា ក្រុមគេដឹកមួយជើងៗ ត្រូវបង់លុយឱ្យមន្ត្រីពាក់ព័ន្ធនៅច្រកទ្វារព្រំដែនមួយនេះ អស់សរុបចំនួន ២១០.០០០រៀល (ម្ភៃមួយម៉ឺនរៀល) ជាកំហិត ពោលគឺក្នុងចំណោមមន្ត្រី ដែលយកលុយទាំងនោះ ក៏មានកម្លាំងស៊ីវិល របស់សាខាគយនិងរដ្ឋាករ ខេត្តស្វាយរៀង ដែលឈរជើងត្រង់ចំណុចខាងលើផងដែរ។ ចំណែកអ្នកដឹកសំបកទឹកសុទ្ធ ពីវៀតណាមចូលមកកម្ពុជា តាមច្រកទ្វារព្រំដែនទ្វេភាគីបុសមន ដោយប្រើគោយន្តកែច្នៃ ក៏បានប្រាប់ថា ពួកគេដឹកមួយជើងៗ ត្រូវបង់អស់ជិត៦០ម៉ឺនរៀល ក្នុងនោះ បង់ឱ្យកម្លាំងស៊ីវិលរបស់គយសាខា ខេត្តស្វាយរៀង ដែលឈរជើងចាំយកលុយចម្ងាយប្រមាណជា២គីឡូម៉ែត្រពីព្រំដែន ចំនួន៥ម៉ឺនរៀលជាកំហិត រួមនិងមន្ត្រីពាក់ព័ន្ធមួយចំនួនទៀតផងដែរ។

ឯអ្នកដឹកផ្លែដូង ដោយប្រើរថយន្តចំណុះ២តោនកន្លះ ក៏បានប្រាប់ថា ខ្លួនដឹកមួយជើងៗ ទម្រាំចេញផុតច្រកព្រំដែនបុសមន ត្រូវបង់អស់ជាង៤០ម៉ឺនរៀល ក្នុងនោះ បង់ឱ្យគយសាខាខេត្តស្វាយរៀង ចំនួន៥ម៉ឺនរៀលជាកំហិត ខណៈរថយន្តដឹកផ្លែដូង ចំណុះ៥តោន បង់ឱ្យគយសាខាខេត្តស្វាយរៀង ចំនួន១០ម៉ឺនរៀលក្នុង១ជើង។ ករណីនេះអាជីវករបានបញ្ជាក់ថា រាល់ការបង់លុយទាំងនេះ គឺគ្មានក្រដាសស្នាម ឬវិក្កយបត្រ បង់ពន្ធចូលរដ្ឋនោះទេ។

ចំណែករថយន្តសាំយ៉ុង និងរថយន្តកូរ៉េ ដែលបានដឹកផ្លែឈើពីវៀតណាម ចូលមកកម្ពុជា តាមច្រកបុសមន ក៏ត្រូវបង់លុយឱ្យគយសាខាខេត្តស្វាយរៀង អស់ចាប់ពី៨ម៉ឺន ទៅ២៥ម៉ឺនរៀល ក្នុងមួយជើងផងដែរ។

ដោយឡែកអ្នកដឹកគ្រឿងជ័រពីវៀតណាមចូលមកកម្ពុជា តាមច្រកទ្វារព្រំដែនតំបន់ដូង ស្រុករមាសហែក ដោយប្រើរ៉ឺម៉កម៉ូតូ ក៏បានបញ្ជាក់ថា ខ្លួនដឹកមួយជើងៗ ត្រូវបង់លុយអស់ជាង៣០ម៉ឺនរៀល ក្នុងនោះ បង់ឱ្យកម្លាំងស៊ីវិលរបស់គយសាខាខេត្តស្វាយរៀង ដែលឈរជើងចាំយកលុយត្រង់ចំណុចកញ្ចុះ ចម្ងាយប្រមាណ៤០០ម៉ែត្រ ពីច្រកព្រំដែន ចំនួន៤ម៉ឺនរៀលនិងបង់ឱ្យមន្ត្រីពាក់ព័ន្ធជាបន្តបន្ទាប់ទៀត។

ចំពោះរថយន្តកូរ៉េ ចំណុះ១តោន ដែលដឹកក្ដារបន្ទះ ពីវៀតណាមតាមច្រកតំបន់ដូង ក៏បានអះអាងផងដែរថា ខ្លួនដឹកមួយជើងៗ ត្រូវបង់អស់ជាង៤០ម៉ឺនរៀល ក្នុងនោះ បង់ឱ្យកម្លាំងស៊ីវិលរបស់គយសាខា ខេត្តស្វាយរៀង ចំនួន១០ម៉ឺនរៀល។

ជាមួយគ្នានេះ អ្នកដឹកផ្លែដូង ពីវៀតណាមចូលមកកម្ពុជា តាមច្រកទ្វារព្រំដែនតំបន់ដូង ដោយប្រើរថយន្តស្តារិច ក៏បានបញ្ជាក់ថា ខ្លួនដឹកមួយជើងៗបង់លុយឱ្យមន្ត្រីពាក់ព័ន្ធ នៅច្រកព្រំដែនមួយនេះ អស់ជិត២០ម៉ឺនរៀល ក្នុងនោះបង់ឱ្យកម្លាំងស៊ីវិលរបស់គយសាខាខេត្តស្វាយរៀង ចំនួន៣ម៉ឺនរៀល។

តាមសេចក្តីរាយការណ៍បន្តថា ក្នុងមួយថ្ងៃៗគេឃើញរថយន្តវ៉េអង យីឌុប រថយន្តកែច្នៃ តូចធំគ្រប់ប្រភេទ តែងតែដឹកជញ្ជូនទំនិញ កសិផលមចេញចូលឆ្លងដែនពីវៀតណាម មកកម្ពុជានិងពីកម្ពុជាទៅវៀតណាម យ៉ាងគគ្រឹកគគ្រេងបំផុត ជាហេតុនាំឱ្យ មន្ត្រីសាខាគយនិងរដ្ឋាករ ខេត្តស្វាយរៀង ក្រោមការគ្រប់គ្រងរបស់លោក សំ សុវណ្ណារិទ្ធ អាចប្រមូលលុយក្រៅប្រព័ន្ធច្បាប់ ធ្វើមានធ្វើបានប្រយោជន៍ផ្ទាល់ខ្លួននិងបក្សពួកដែលជាហេតុធ្វើឲ្យបាត់ចំណូលចូលរដ្ឋក្នុងមួយខែៗយ៉ាងច្រើនសន្ធឹកសន្ធាប់ ដោយផ្អែកលើហេតុផល ដាក់កម្លាំងចាំត្រួតពិនិត្យឯកសារពន្ធ ប៉ុន្តែធាតុពិតជាក់ស្ដែង ប្រើជនស៊ីវិល ឱ្យរាប់ក្បាលឡាន កំណត់យកលុយចែកគ្នាតែប៉ុណ្ណោះ។

ជុំវិញការរិះគន់ខាងលើនេះទីភ្នាក់ងារសារព័ត៌មានសៀមរាប ប៉ុស្តិ៍ នៅពុំទាន់ទទួលបានការបំភ្លឺពីលោក សំ សុវណ្ណារិទ្ធ ប្រធានសាខាគយ និងរដ្ឋាករ ខេត្តស្វាយរៀង បាននៅឡើយទេរហូតដល់ម៉ោងផ្សាយនេះដោយមិនមានលេខទំនាក់ទំនង។

ក្រុមអាជីវករសូមស្នើយ៉ាងទទូចដល់ ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រីប្រធានអង្គភាពប្រឆាំងអំពើពុករលួយ ឯកឧត្តមបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាបើកការស្រាវជ្រាវ និងចាត់វិធានការលើលោក សំ សុវណ្ណារិទ្ធ រួមនិងបុគ្គលពាក់ព័ន្ធ ដើម្បីតម្រង់ទិសមន្ត្រីខិលខូចមួយចំនួនឱ្យគោរពតាមគោលការរាជរដ្ឋាភិបាល ក្នុងការកំណែទម្រង់ស៊ីជម្រៅ លុបបំបាត់អំពើពុករលួយ បង្កើនចំណូលរដ្ឋ លើកស្ទួយសេដ្ឋកិច្ចជាតិ៕SRP

សូមអបអរសាទរ ផ្លូវមុខតុលាការត្រូវបានស្ថាបនាស្អាតហើយ តាមការសន្យារបស់អភិបាលខេត្ត​សៀមរាបក្រោយពីរដូវភ្លៀងត្រូវបានបញ្ចប់​

ផ្លូវមួយខ្សែដែលមានបណ្តោយប្រវែង​ ២គីឡូម៉ែត្រ​ និងទទឹង៨ម៉ែត្រត្រូវបានស្ថាបនារួចរាល់​ ដេីម្បីសម្រួលដល់ការធ្វេីដំណេីរ

អាជ្ញាធរខេត្តសៀមរាបបានឱ្យដឹងនៅថ្ងៃអាទិត្យនេះថា
តាមការសន្យារបស់ឯកឧត្តម​ ប្រាក់​ សោភ័ណ​ អភិបាល​ នៃគណៈអភិបាលខេត្ត​ ក្រោយពីរដូវភ្លៀងត្រូវបានបញ្ចប់​ផ្លូវមួយខ្សែប្រវែង​ ២គីឡូម៉ែត្រ​ និងទទឹង៨ម៉ែត្រត្រូវបានក្រុមការងារបច្ចេកទេស ឯកឧត្តម​ អ្នកឧញ៉ា​ សៀង​ ណាំ​ អ្នកតំណាងរាស្ត្រមណ្ឌលសៀមរាបធ្វេីការជួសជុល​ និងសាងសង់ឡេីងវិញកាលពីថ្ងៃទី២​ ខែធ្នូ​ ឆ្នាំ២០២៥។

ក្រោយពីជួសជុលអស់រយៈពេល​ ៣២ថ្ងៃ​ នាថ្ងៃទី៤ ខែមករា​ ឆ្នាំ២០២៦​ ផ្លូវក្រាលកៅស៊ូ​មួយខ្សែ (ផ្លូវមុខតុលាការ) ដែលមានបណ្តោយ២គីឡូម៉ែត្រទទឹង៨ម៉ែត្រ ត្រូវបានសាងសង់រួចរាល់ដែលប្រេីប្រាស់ថវិកាបដិភាគ របស់ឯកឧត្តម​ អ្នកឧញ៉ា​ សៀង​ ណាំ​ អ្នកតំណាងរាស្ត្រមណ្ឌលសៀមរាប​ ឯកឧត្តម​ ប្រាក់​ សោភ័ណ​ អភិបាល​ នៃគណៈអភិបាល​ និង ថវិកាមន្ត្រីរាជការព្រមទាំងប្រជាពលរដ្ឋផងដែរ។

នាថ្ងៃនេះដែរ​ ឯកឧត្តម​ អ្នកឧញ៉ា​ សៀង​ ណាំ​ អ្នកតំណាងរាស្ត្រមណ្ឌលសៀមរាប​ និងឯកឧត្តម​ ប្រាក់​ សោភ័ណ​ អភិបាល​ នៃគណៈអភិបាលខេត្តសៀមរាបបានចុះពិនិត្យ​ការសាងសង់​ និងសម្រួលដាក់ឱ្យបងប្អូនធ្វេីដំណេីរ​លើផ្លូវនេះ។

ជាមួយគ្នានេះដែររដ្ឋបាលខេត្តសៀមរាប សូមគោរពថ្លែងអំណរគុណយ៉ាងជ្រាលជ្រៅចំពោះឯកឧត្តម​ អ្នកឧញ៉ា​ សៀង​ ណាំ​ អ្នកតំណាងរាស្ត្រមណ្ឌលសៀមរាប​ គិតគូរអំពីផលលំបាករបស់បងប្អូនប្រជាពលរដ្ឋដែលរស់នៅក្នុងខេត្តសៀមរាប​ ដោយផ្តល់ការសាងសង់ផ្លូវមួយខ្សែនេះសម្រាប់បងប្អូនប្រជាពលរដ្ឋ​ងាយស្រួលធ្វេីដំណេីរជាងមុន៕SRP