ក្រុមហ៊ុនវីរៈប៊ុនថាំ លួចដឹកឈឺខុសច្បាប់

ខេត្តមណ្ឌលគិរី÷មហាជនធ្លាប់តែឃើញ រថយន្ត របស់ក្រុមហ៊ុនវីរៈប៊ុនថាំដឹកទំនិញស្របច្បាប់ និងដឹកដំណើរ ស្ទើរទូទាំងរាជធានីខេត្ត។តែឥឡូវនេះបែរជាមកឃើញ រថយន្ត របស់ក្រុមហ៊ុនវីរៈប៊ុនថាំ ដឹកឈើខុសច្បាប់ទៅវិញ។ ជាក់ស្ដែង ក្រោមការបញ្ជាផ្ទាល់ពីស្ថាប័នអយ្យការ កម្លាំងជំនាញនៃខណ្ឌរដ្ឋបាលព្រៃឈើមណ្ឌលគិរី បានស្ទាក់ចាប់រថយន្តរបស់ក្រុមហ៊ុនដឹកជញ្ជូនដ៏ល្បីមួយ បន្ទាប់ពីរកឃើញថាបានលួចបង្កប់ឈើអារប្រភេទលេខ ១ ជាច្រើនសន្លឹក ដើម្បីដឹកជញ្ជូនយកទៅចែកចាយនៅតាមបណ្តាខេត្តដោយខុសច្បាប់។

យោងតាមសេចក្តីរាយការណ៍ពីមន្ត្រីជំនាញ ប្រតិបត្តិការនេះបានធ្វើឡើងនៅវេលាម៉ោង ០០:១៦ នាទីអាធ្រាត្រ ឈានចូលថ្ងៃទី៣១ ខែមករា ឆ្នាំ២០២៦ បន្ទាប់ពីមាន ការចង្អុលបង្ហាញពីលោកព្រះរាជអាជ្ញារងអមសាលា ដំបូងខេត្តមណ្ឌលគិរី។ ក្រុមការងារបានឃាត់ត្រួតពិនិត្យរថយន្ត១គ្រឿង ម៉ាក Hyundai ពណ៌ទឹកក្រូច ពាក់ស្លាកលេខ ភ្នំពេញ 3G-2483 ជារបស់ក្រុមហ៊ុន វីរៈប៊ុនថាំ ខូអិលធីឌី នៅត្រង់ចំណុចភូមិដោះក្រមុំ សង្កាត់សុខដុម ក្រុងសែនមនោរម្យ។

សមត្ថកិច្ចឆ្មក់ឃាត់បានរថយន្តដឹកជញ្ជូនរបស់ក្រុមហ៊ុនវីរៈប៊ុនថាំ១គ្រឿង គ្រាដែលរថយន្តនោះ ចូលទៅដឹកបទ ល្មើសព្រៃឈើទាំងយប់នៅបរិវេណផ្ទះឈ្មួញឈើចាស់ វស្សាម្នាក់ឈ្មោះ ប្រាក់ គា ក្នុងភូមិដោះក្រមុំ សង្កាត់សុខដុម ក្រុងសែនមនោរម្យ ខេត្ត មណ្ឌលគិរី ដែលផ្ទះសមត្ថកិច្ចបានចូលឆែកឆេរកាលខែមុនរកឃើញឈើជាច្រើន។ អ្នកបើកបររថយន្តថា គេបានដឹកឱ្យឈ្មោះ គា ក្នុងគោលដៅពីខេត្តមណ្ឌលគិរី ឆ្ពោះទៅស្រុកស្វាយអន្ទរ ខេត្តព្រៃវែង និងរាជធានីភ្នំពេញ បានតម្លៃដឹកក្នុង១ ជើង ១លាន ១០ម៉ឺនរៀល ទៅ១លាន ៤០ម៉ឺនរៀល ដោយដឹកបានប្រហែល១២ជើងហើយ (ទូទាត់ប្រាក់ថ្លៃដឹករួចរាល់) ។

អ្នកបើកបរត្រូវបានកំណត់អត្តសញ្ញាណឈ្មោះ ស្លាម រំលី ភេទប្រុស អាយុ ៤៦ឆ្នាំ ជនជាតិខ្មែរឥស្លាម ជាបុគ្គលិករបស់ក្រុមហ៊ុនខាងលើ។ តាមរយៈការឆែកឆេរជាក់ស្តែង ក្រុមការងារបានរកឃើញឈើអារប្រភេទលេខ១ (ទ្វារសុក្រម) ចំនួន ៣០សន្លឹក ដែលត្រូវបានគេលួចបង្កប់ជាមួយនឹងអីវ៉ាន់បញ្ញើផ្សេងៗរបស់អតិថិជន។

តាមការសារភាពរបស់អ្នកបើកបរឈ្មោះ ស្លាម រំលី បាន ឱ្យដឹងថា ខ្លួនពុំមានលិខិតអនុញ្ញាត (PC) នោះទេ ហើយការដឹកនេះគឺជាការលួចលាក់ធ្វើដោយខ្លួនឯង មិនឱ្យក្រុមហ៊ុនដឹងឡើយ។ ខ្លួនទទួលស៊ីឈ្នួលដឹកឱ្យ ឈ្មោះ (មិនដែលស្គាល់មុខ ទាក់ទងតាមទូរស័ព្ទ)។ ដឹកចេញពីខេត្តមណ្ឌលគិរី ឆ្ពោះទៅស្រុកស្វាយអន្ទរ ខេត្តព្រៃវែង និងរាជធានីភ្នំពេញ ដោយទទួលបានកម្រៃពី ១,១ លាន ទៅ ១,៤ លានរៀល ក្នុងមួយជើង។ រូបគេបានលួចដឹកជញ្ជូនតាមរូបភាពនេះបានប្រហែល ១២ ជើង រួចមកហើយ។

យោងតាមរបាយការណ៍មន្ត្រី ដោយពិនិត្យឃើញថា នេះគឺជាអំពើល្មើសច្បាប់ស្តីពីព្រៃឈើ ក្រុមការងារបាន សម្រេចដកហូតវត្ថុតាងឈើ និងរថយន្ត យកទៅរក្សា ទុកជាបណ្តោះអាសន្ននៅស្នាក់ការខណ្ឌរដ្ឋបាលព្រៃឈើមណ្ឌលគិរី ដើម្បីបន្តនីតិវិធី។ ដោយឡែក ចំពោះអីវ៉ាន់បញ្ញើរបស់អតិថិជនដែលនៅក្នុងរថយន្ត ត្រូវបានក្រុម ការងារអនុញ្ញាតឱ្យបុគ្គលិកក្រុមហ៊ុនវីរៈប៊ុនថាំ ប្រើប្រាស់ម៉ូតូកង់បីចំនួន ២គ្រឿង ដើម្បីផ្ទេរចេញយកទៅចែក ចាយបន្តជូនអតិថិជនវិញ ដើម្បីកុំឱ្យមានការខូចខាត ឬបាត់បង់៕

ពិតជាប្រសើរណាស់! ដីធ្លីភូមិទាំង១១៤ ក្នុងតំបន់អង្គរ ត្រូវបានមន្ត្រីជំរុញឱ្យក្រុមការងារចុះផ្ទៀងផ្ទាត់ទិន្នន័យប្រើប្រាស់

អនុរដ្ឋលេខាធិការក្រសួងរៀបចំដែនដី និងជាប្រធានក្រុមការងារប្រតិបត្តិស្រុកបន្ទាយស្រី ខេត្តសៀមរាបឯកឧត្តម ម៉ៅ វិបុល បានថ្លែងជំរុញក្រុមការងារពាក់ព័ន្ធបន្តចុះពិនិត្យទីតាំងជាក់ស្ដែង ក្នុងការប្រើប្រាស់ដីរបស់បងប្អូនប្រជាពលរដ្ឋនៅក្នុងភូមិទាំង១១៤ ក្នុងតំបន់បេតិកភណ្ឌពិភពលោកអង្គរ ដើម្បីផ្ទៀងផ្ទាត់ទិន្នន័យជាក់ស្ដែង ក្នុងការកំណត់លក្ខខណ្ឌប្រើប្រាស់ដីរបស់បងប្អូនប្រជាពលរដ្ឋ។

ថ្លែងបែបនេះក្នុងឱកាសដឹកនាំកិច្ចប្រជុំពិភាក្សា និងចុះពិនិត្យទីតាំងតាមបណ្ដាភូមិសាស្រ្ត ស្រុកបន្ទាយស្រី សម្រាប់រៀបចំផែនការប្រើប្រាស់ដីទាំង ១១៤ភូមិ នារសៀលថ្ងៃទី៣ ខែកុម្ភៈ ឆ្នាំ២០២៦។

 ឯកឧត្តម ម៉ៅ វិបុល បានបញ្ជាក់ថា ការចុះពិនិត្យទីតាំងនៃការប្រើប្រាស់ដីរបស់បងប្អូនប្រជាពលរដ្ឋទាំង ១១៤ភូមិ ក្រុមការងារត្រូវចុះពិនិត្យទីតាំងតាមផែនទីប្រើប្រាស់ដីនាពេលអនាគត ដោយប្រើប្រាស់ App Carry map បន្ទាប់មកក្រុមការងារពិនិត្យមើលទីតាំងដែលបានកំណត់ផែនទីមានពណ៌ក្រហមជាតំបន់ការពារដាច់ខាត រួមមាន ផ្ទះប្រជាពលរដ្ឋ សំណង់ផ្សេងៗ និងចម្ការដាំដុះដែលមានរយៈពេលខ្លី ដូចជា ស្រែចម្ការ និងដើមឈើហូបផ្លែ។

ឯកឧត្តមបន្តថា ទន្ទឹមនោះក្រុមការងារក៏ត្រូវពិនិត្យមើលទីតាំងដែលបានកំណត់ក្នុងផែនទីមានពណ៌ផ្កាឈូកជាតំបន់ទ្រនាប់ ដែលអនុញ្ញាតឱ្យប្រជាពលរដ្ឋបន្តការរស់នៅជាធម្មតា និងប្រកបរបរចិញ្ចឹមជាលក្ខណៈគ្រួសារ ដូចជាការធ្វើស្រែ ការដាំដំណាំ ការចិញ្ចឹមសត្វ តាមស្ថានភាពដែលជាទម្លាប់បុរាណនិងអនុញ្ញាតឱ្យសាងសង់ឡើងវិញ ជួសជុល និងប្រើប្រាស់សំណង់ តាមស្ថានភាពដែលមានស្រាប់ និងអនុញ្ញាតឱ្យសាងសង់សំណង់ដែលបម្រើឱ្យការអភិរក្សប្រាសាទ និងសំណង់សម្រាប់សហគមន៍ និងសំណង់ផ្សេងទៀតដែលអនុវត្តដោយរដ្ឋសម្រាប់បម្រើប្រយោជន៍សាធារណៈ។

ឯកឧត្តមក៏បានសង្កត់ធ្ងន់ថា ចំពោះលក្ខខណ្ឌនៃការប្រើប្រាស់ដី ការគ្រប់គ្រងនគររូបនីយកម្ម និងសំណង់ក្នុងភូមិទាំង១១៤ ក្នុងតំបន់អង្គរ ត្រូវបានកំណត់ជា ៦ទីតាំង ក្នុងនោះរួមមាន ទីតាំងត្រូវការពារជាដាច់ខាត ទីតាំងត្រនាប់ ទីតាំងភូមិឋានជនបទ ទីតាំងភូមិឋានទីប្រជុំជន ទីតាំងអាជីវកម្ម និងទីតាំងកសិកម្ម។

លោក ហ៊ី សាយ ប្រធានមន្ទីររៀបចំដែនដី ខេត្តសៀមរាប បានបង្ហាញថា កន្លងមកក្រុមការងារបានចុះពិនិត្យទីតាំងក្នុងតំបន់អង្គរបានចំនួន ១០១ភូមិ ហើយក្នុងនោះក្រុមការងារបានបញ្ចប់សេចក្ដីព្រាងរបាយការណ៍បច្ចេកទេសបានចំនួន ៥៩ភូមិ។ គិតចាប់ពីថ្ងៃទី៤ ដល់ទី៦ ខែកុម្ភៈ ឆ្នាំ២០២៦ ក្រុមការងារនឹងចុះពិនិត្យទីតាំងរស់នៅជាក់ស្ដែងរបស់ប្រជាពលរដ្ឋ ក្នុងភូមិសាស្ត្រស្រុកបន្ទាយស្រី ដើម្បីផ្ទៀងផ្ទាត់ និងប្រមូលទិន្នន័យឱ្យបានច្បាស់លាស់។ ជាមួយគ្នានេះ ក៏សូមឱ្យអាជ្ញាធរមូលដ្ឋានធ្វើការសហការជាមួយក្រុមការងារពាក់ព័ន្ធ ដើម្បីឱ្យបានដឹងពីប្រវត្តិភូមិ ប្រវត្តិទីតាំង ដើម្បីធ្វើការកំណត់ឱ្យបានច្បាស់លាស់៕SRP

អាជ្ញាធរខេត្តសៀមរាប ប្រកាសមិនអនុញ្ញាតឱ្យមានការដាក់លក់ខ្លែងដែលនាំចូលពីបរទេស នៅក្នុងពិធីបុណ្យខ្លែង

ខេត្តសៀមរាប៖អាជ្ញាធរខេត្តសៀមរាប បានសម្រេចមិនអនុញ្ញាតឱ្យមានការដាក់លក់ខ្លែងដែលនាំចូលពីបរទេស នៅក្នុងពិធី“បុណ្យខ្លែងឯក ខ្លែងសេរី” លើកទី២ នៅខេត្តសៀមរាបឆ្នាំ២០២៦ខាងមុខនេះឡើយ។ ការប្រកាសមិនអនុញាត្តបែបនេះក្នុងគោលបំណងដើម្បីថែរក្សាតម្លៃមរតកវប្បធម៌ដូនតាឱ្យបានគង់វង្ស និងសក្ដិសមជាព្រឹត្តិការណ៍ខ្មែរសុទ្ធសាធ។

ក្នុងកិច្ចប្រជុំត្រៀមរៀបចំពិធីខាងលើ នៅថ្ងៃទី៣ ខែកុម្ភៈ ឆ្នាំ២០២៦ ម្សិលមិញ លោកស៊ុន ចំណាន នាយករងរដ្ឋបាលសាលាខេត្តបានបង្ហាញថា គោលបំណងធំនៃពិធីបុណ្យនេះ គឺដើម្បីបង្ហាញពីសិល្បៈនៃការធ្វើខ្លែង និងការបង្ហោះខ្លែងឯកដែលជាមរតកវប្បធម៌ខ្មែរ។ ដូច្នេះ ការលក់ខ្លែងបរទេសក្នុងបរិវេណពិធី ត្រូវបានហាមឃាត់ ដើម្បីទុកឱកាសឱ្យខ្លែងខ្មែរ បានបង្ហាញខ្លួនយ៉ាងពេញលេញ ប៉ុន្តែសម្រាប់បងប្អូនប្រជាពលរដ្ឋដែលមានខ្លែងផ្ទាល់ខ្លួន មិនថាខ្លែងបែបណានោះទេ នៅតែអាចយកមកចូលរួមបង្ហោះលេងកម្សាន្តបានដោយសេរី។

លោកស៊ុន ចំណាន មានប្រសាសន៍ថា ដើម្បីឱ្យការប្រកួតកាន់តែមានលក្ខណៈបច្ចេកទេស និងមានស្តង់ដារវប្បធម៌ មន្ទីរវប្បធម៌ និងវិចិត្រសិល្បៈខេត្ត កំពុងសម្រុកកែសម្រួលលក្ខន្តិកៈសម្រាប់អ្នកចូលរួមប្រកួតជាថ្មីម្ដងទៀត។ ការកែសម្រួលនេះ ធ្វើឡើងក្នុងគោលដៅជំរុញឱ្យអ្នកចេះធ្វើខ្លែង បង្ហាញនូវស្នាដៃដ៏សម្រិតសម្រាំង និងបច្ចេកទេសបន្លឺសំឡេង “ឯក” ឱ្យបានត្រឹមត្រូវតាមលក្ខណៈបុរាណ។

នាយករងរដ្ឋបាលខេត្តសៀមរាបរូបនេះក៏បានណែនាំឱ្យមានការជំរុញដល់សិស្សានុសិស្ស និងយុវជនតាមបណ្ដាសាលារៀន ឱ្យមកចូលរួមទស្សនា និងស្វែងយល់ឱ្យបានច្រើន ដើម្បីបណ្ដុះស្មារតីស្រឡាញ់ និងជួយថែរក្សាសិល្បៈនៃការធ្វើខ្លែងនេះកុំឱ្យបាត់បង់។ ជាមួយគ្នានេះដែរ ក្នុងពិធីនេះក៏មានការចូលរួមចំណែកយ៉ាងធំធេងពីសំណាក់ “ចលនាភូមិ១ ផលិតផល១” ចំនួន ១០០ស្តង់ និងសហភាពសហព័ន្ធយុវជនកម្ពុជា ចំនួន ៥០ស្តង់ ដើម្បីដាក់បង្ហាញផលិតផលក្នុងស្រុក ក្នុងគោលបំណងលើកស្ទួយសេដ្ឋកិច្ចសហគមន៍ អមជាមួយកិច្ចការពារសន្តិសុខសណ្ដាប់ធ្នាប់ពីកងកម្លាំងចម្រុះចំនួន ១៧៧នាក់ផងដែរ។

សូមជម្រាបថា ពិធី “បុណ្យខ្លែងឯក ខ្លែងសេរី” លើកទី២ នឹងរៀបចំឡើងចាប់ពីថ្ងៃទី២០ដល់ទី២២ ខែកុម្ភៈ ឆ្នាំ២០២៦ ដោយពិធីនេះ ត្រូវបានរំពឹងថានឹងក្លាយជាព្រឹត្តិការណ៍វប្បធម៌ដ៏សំខាន់មួយ ដែលមិនត្រឹមតែបង្ហាញពីស្នាដៃឯករបស់ខ្មែរប៉ុណ្ណោះទេ ប៉ុន្តែថែមទាំងជួយជំរុញសេដ្ឋកិច្ចមូលដ្ឋានតាមរយៈការលក់ដូរផលិតផលខ្មែរយ៉ាងច្រើនសន្ធឹកសន្ធាប់ទៀតផង៕SRP

តុលាការខេត្តកំពង់ចាមសម្រេចឃុំខ្លួនអ្នកបបររថយន្តម្នាក់ដែលបុកមនុស្សស្លាប់

ខេត្តកំពង់ចាម៖ក្រុមការងារព័ត៌មានប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម បានឱ្យដឹងថា
បានទទួលព័ត៌មានអំពីការផ្សព្វផ្សាយតាមបណ្ដាញសង្គមហ្វេសប៊ុក តាមរយៈផេកហ្វេសប៊ុកឈ្មោះ San Buntheoun ពាក់ព័ន្ធនឹងករណីគ្រោះថ្នាក់ចរាចរណ៍កាលពីថ្ងៃសុក្រ ទី២៣ ខែមករា ឆ្នាំ២០២៦ វេលាម៉ោង១៨:៤០នាទី នៅលើផ្លូវជាតិលេខ៦ ស្ថិតនៅភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម រវាងរថយន្ដ និងម៉ូតូ ព្រមទាំងម្ចាស់ផ្ទះ ចំនួន០២នាក់។ ករណីនេះបណ្ដាលឱ្យស្លាប់ម្ចាស់ផ្ទះ ១នាក់ និងរបួសធ្ងន់អ្នកបើកបរម៉ូតូ ១នាក់។

ក្រោយពេលកើតហេតុ កម្លាំងជំនាញ បានកសាងសំណុំរឿងតាមនីតិវិធី និងបានបញ្ចូនសំណុំរឿង និងអ្នកបើកបររថយន្ដទៅ អយ្យការអមសាលាដំបូងខេត្តកំពង់ចាម ដើម្បីបន្តចាត់ការតាមផ្លូវច្បាប់។

បច្ចុប្បន្ន អ្នកបើកបររថយន្ត ត្រូវបានឃុំខ្លួននៅពន្ធនាគារខេត្តកំពង់ចាម តាមដីកាបង្គាប់ឱ្យឃុំខ្លួនរបស់ចៅក្រម ម៉ៅ វិទូ ចៅក្រមស៊ើបសួរនៃសាលាដំបូងខេត្តកំពង់ចាម កាលពីថ្ងៃទី០១ ខែកុម្ភៈ ឆ្នាំ២០២៦៕SRP

កម្ពុជា-ប៉ាគីស្ថាន ប្ដេជ្ញាពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែខ្លាំងក្លាថែមទៀត

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នៅរសៀលថ្ងៃទី 3 ខែកុម្ភៈឆ្នាំ 2026 ម្សិលមិញ បានទទួលជួបពិភាក្សាការងារជាមួយ ឯកឧត្តម ស៊ីយ៉េដ យូសាហ្វ រ៉ាហ្សា ជីឡានី (H.E. Syed Yousaf Raza Gilani) ប្រធានព្រឹទ្ធសភា នៃសាធារណរដ្ឋឥស្លាមប៉ាគីស្ថាន នៅវិមានសន្តិភាព ក្នុងឱកាសដែលឯកឧត្តមដឹកនាំគណៈប្រតិភូ អញ្ជើញបំពេញទស្សនកិច្ចផ្លូវការ នៅព្រះរាជាណាចក្រកម្ពុជា ពីថ្ងៃទី២ ដល់ថ្ងៃទី៥ ខែកុម្ភៈ ឆ្នាំ២០២៦។

ក្នុងឱកាសនៃជំនួប, ឯកឧត្តមប្រធានព្រឹទ្ធសភា បានសម្ដែងនូវក្ដីសោមនស្សរីករាយ និងថ្លែងអំណរគុណយ៉ាងជ្រាលជ្រៅចំពោះការទទួលបដិសណ្ឋារកិច្ចយ៉ាងកក់ក្តៅពីសំណាក់ភាគីកម្ពុជា។ ឯកឧត្តមបានរំលឹកថា ឆ្នាំនេះគឺជាខួបលើកទី៧៤ នៃទំនាក់ទំនងការទូតប៉ាគីស្ថាន-កម្ពុជា ដោយក្នុងនោះប៉ាគីស្ថាន គឺជាប្រទេសដំបូងមួយដែរ ដែលបានទទួលស្គាល់ឯករាជ្យភាពរបស់កម្ពុជា។ ឯកឧត្តមក៏បានលើកឡើងពីភាពស្រដៀងគ្នាដែលប្រទេសទាំងពីរមាន គឺសក្ដានុពលលើវិស័យកសិកម្ម និងកម្លាំងពលកម្មវ័យក្មេងដ៏សកម្ម។ ជាមួយគ្នានេះ, ឯកឧត្តមបានវាយតម្លៃខ្ពស់ចំពោះកិច្ចសហប្រតិបត្តិការទ្វេភាគីកន្លងមក និងបង្ហាញនូវជំនឿជឿជាក់ថាដំណើរទស្សនកិច្ចនេះ នឹងក្លាយជាកម្លាំងចលករថ្មីក្នុងការជំរុញទំនាក់ទំនងរវាងប្រទេសទាំងពីរឱ្យកាន់តែស៊ីជម្រៅ ជាពិសេសទំនាក់ទំនងរវាងស្ថាប័ននីតិប្បញ្ញត្តិនៃប្រទេសទាំងពីរ។

ជាការឆ្លើយតប, សម្ដេចធិបតី បានសម្ដែងនូវការស្វាគមន៍យ៉ាងកក់ក្ដៅជូនចំពោះ ឯកឧត្តមប្រធានព្រឹទ្ធសភា និងគណៈប្រតិភូ។ សម្ដេចធិបតីបានគូសបញ្ជាក់ថា វត្តមានរបស់ឯកឧត្តមប្រធានព្រឹទ្ធសភា នាពេលនេះ គឺជាសក្ខីភាពឆ្លុះបញ្ចាំងពីការរីកចម្រើននៃទំនាក់ទំនងរវាងព្រឹទ្ធសភានៃប្រទេសទាំងពីរ។ សម្ដេចធិបតីមានជំនឿយ៉ាងមុតមាំថា ដំណើរទស្សនកិច្ចនេះនឹងជួយពង្រឹងកិច្ចសហប្រតិបត្តិការទ្វេភាគីលើវិស័យថ្មីបន្ថែមទៀត ខណៈដែលរាជរដ្ឋាភិបាលកម្ពុជាត្រៀមខ្លួនរួចជាស្រេចក្នុងការផ្ដល់ការគាំទ្រ និងបង្កើនសន្ទុះនៃទំនាក់ទំនងរវាងស្ថាប័ននីតិប្បញ្ញត្តិឱ្យកាន់តែជិតស្និទ្ធបន្ថែមទៀត។

សម្តេចធិបតី និងឯកឧត្តមប្រធានព្រឹទ្ធសភាក៏បានពិភាក្សាលើការពង្រឹងនិងពង្រីកកិច្ចសហប្រតិបត្តិការលើវិស័យសក្ដានុពលជាច្រើន រួមមាន៖ វិស័យនយោបាយ និងការទូត, សន្តិសុខ និងការពារជាតិ, ពាណិជ្ជកម្ម និងការវិនិយោគ, កសិកម្ម, បច្ចេកវិទ្យា, ធនធានរ៉ែ, កម្មន្តសាល, អប់រំ និងបណ្តុះបណ្តាលវិជ្ជាជីវៈ, វប្បធម៌, ទេសចរណ៍, សុខាភិបាល និងការតភ្ជាប់រវាងប្រជាជន និងប្រជាជន ជាដើម។ សម្តេចធិបតី និងឯកឧត្តមប្រធានព្រឹទ្ធសភា បានលើកទឹកចិត្តឱ្យក្រសួងស្ថាប័នពាក់ព័ន្ធ និងវិស័យឯកជន នៃប្រទេសទាំងពីរ បន្តផ្សារភ្ជាប់ទំនាក់ទំនងគ្នា សំដៅស្វែងរកកាលានុវត្តភាពថ្មីៗបន្ថែមទៀត ក្នុងការជំរុញ ការពង្រឹង និងពង្រីកកិច្ចសហប្រតិបត្តិការ ឱ្យកាន់តែរីកចម្រើន។

សម្តេចធិបតី និងឯកឧត្តមប្រធានព្រឹទ្ធសភាក៏បានឯកភាពបន្តពង្រឹងកិច្ចសហប្រតិបត្តិការរវាងប្រទេសទាំងពីរ នៅក្នុងវេទិកាតំបន់ និងអន្តរជាតិផងដែរ៕SRP

រដ្ឋមន្ត្រីក្រសួងមហាផ្ទៃ សង្កត់ធ្ងន់ថា គ្រប់បណ្តារាជធានីខេត្តទាំង២៥ ត្រូវសម្អាតឱ្យអស់នូវបទល្មើសឆបោកតាមប្រព័ន្ធអនឡាញត្រឹមសប្ដាហ៍ទី២ នៃខែមីនា

ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានសង្កត់ធ្ងន់ថា គ្រប់បណ្តារាជធានីខេត្តទាំង២៥ ត្រូវសម្អាតឱ្យអស់នូវបទល្មើសឆបោកតាមប្រព័ន្ធអនឡាញត្រឹមសប្ដាហ៍ទី២ នៃខែមីនា។

ឯកឧត្តមអស សុខា មានប្រសាសន៍ថា ដើម្បីបង្ការ ទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាឱ្យមានប្រសិទ្ធភាពខ្ពស់ សំដៅចូលរួមចំណែកថែរក្សា ការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម រាជរដ្ឋាភិបាលដាក់ចេញបទបញ្ជាដល់អភិបាលរាជធានីខេត្ត និងជាប្រធានគណៈបញ្ជាការឯកភាពរដ្ឋបាលរាជធានីខេត្ត ត្រូវម្ចាស់ការទទួលខុសត្រូវក្នុងការបោសសម្អាតគ្រប់ទីតាំងធ្វើសកម្មភាពឆបោកតាមប្រព័ន្ធបច្ចេកវិទ្យា ឱ្យអស់ពីក្នុងភូមិសាស្ត្រ និងដែនសមត្ថកិច្ចរបស់ខ្លួន ស្របតាមច្បាប់និងលិខិត បទដ្ឋានគតិយុត្តជាធរមាន។

ឯកឧត្តមអភិសន្ដិបណ្ឌិត ក៏បានជំរុញដល់រដ្ឋបាលរាជធានីខេត្ត ស្នងការនគរបាលរាជធានីខេត្ត គណបញ្ជាការឯកភាពខេត្ត បន្ដយកចិត្តទុកដាក់ចំពោះបទល្មើសឆបោកតាមប្រព័ន្ធអនឡាញ ត្រូវបង្ក្រាប និងសម្អាត និងបន្ដតាមដានឱ្យបានច្បាស់លាស់បំផុត។

រដ្ឋមន្ត្រីក្រសួងមហាផ្ទៃមានប្រសាសន៍ជំរុញបែបនេះក្នុងឱកាសដឹកនាំ កិច្ចប្រជុំប្រចាំសប្តាហ៍ដើម្បីតាមដានវឌ្ឍនភាពការងារបង្ក្រាបបទល្មើសឆបោកតាមប្រព័ន្ធបច្ចេកវិទ្យា តាមបណ្ដារាជធានីខេត្តទាំង២៥ នារសៀលថ្ងៃទី២ ខែកុម្ភៈ ឆ្នាំ២០២៦៊
តាមប្រព័ន្ធវីដេអូ (Zoom) ដោយមានការចូលរួមពី អភិបាល នៃគណៈអភិបាលរាជធានីខេត្តទាំង២៥ ស្នងការនគរបាលរាជធានីខេត្ត និងអ្នកពាក់ព័ន្ធជាច្រើនរូប។

បើតាម ឯកឧត្តម ប្រាក់ សោភ័ណ អភិបាលខេត្តសៀមរាប បានមានប្រសាសន៍ថា កន្លងមករដ្ឋបាលខេត្តបានធ្វើការចុះផ្សព្វផ្សាយអនុក្រឹត្យ០៣ ស្ដីពីបទល្មើសឆបោកតាមប្រព័ន្ធអនឡាញដល់បណ្ដាសណ្ឋាគារ នៅក្នុងក្រុងសៀមរាប ដើម្បីពិនិត្យ និងតាមដាន និងបង្ក្រាបឱ្យបានទាន់ពេលវេលា ករណីមានបទល្មើសឆបោកតាមប្រព័ន្ធអនឡាញ។

ឯកឧត្តមក៏ជំរុញដល់រដ្ឋបាលខេត្ត ត្រូវចុះធ្វើលិខិតជូនដំណឹងដល់ម្ចាស់សណ្ឋាគារ ផ្ទះសំណាក់ បន្ទប់ជួល បូទិក អាផាតមិន សម្រាប់ជនបរទេស សូមឱ្យម្ចាស់សណ្ឋាគារត្រួតពិនិត្យឱ្យបានច្បាស់នូវឯកសារបញ្ជាក់ លិខិតបញ្ជាក់ឯកសារផ្ទាល់ខ្លួន និងលិខិតឆ្លងដែនឱ្យបានច្បាស់លាស់មុនអនុញ្ញាតឱ្យស្នាក់នៅ៕SRP

សម្ដេចតេជោ គាំទ្រឱ្យរាជរដ្ឋាភិបាលកម្ពុជាបើកស្ថានទូតជាផ្លូវការនៅប៉ាគីស្ថាន ដើម្បីជំរុញនូវទំនាក់ទំនងរវាងប្រទេសទាំងពីរ

សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ក៏បានអញ្ជើញជួបពិភាក្សាការងារជាមួយឯកឧត្តម ស៊ីយ៉េដ យូសាហ្វ រ៉ាសា ហ្គីឡានី (Syed Yusuf Raza Gillani) ប្រធានព្រឹទ្ធសភា នៃសាធារណរដ្ឋឥស្លាមប៉ាគីស្ថាន ក្នុងឱកាសដែលឯកឧត្តមអញ្ជើញបំពេញទស្សនកិច្ចផ្លូវការនៅកម្ពុជា។

សម្តេចតេជោ ហ៊ុន សែន ទាំងឯកឧត្តមប្រធានព្រឹទ្ធសភាប៉ាគីស្ថានបានឯកភាពគ្នាលើចំណុចរួម របស់រាជរដ្ឋាភិបាលកម្ពុជា និងរដ្ឋាភិបាលប៉ាគីស្ថាន ជាពិសេស នឹងជំរុញទំនាក់ទំនងរវាងប្រទេសទាំងពីរឱ្យកាន់តែរីកចម្រើនបន្ថែមទៀត ជាពិសេសនៅពេលនេះកម្ពុជាយើងមិនទាន់មានស្ថានទូតនៅប៉ាគីស្ថានទេ ហើយសម្ដេចតេជោបានគាំទ្រឱ្យរាជរដ្ឋាភិបាលកម្ពុជាបើកស្ថានទូតជាផ្លូវការនៅប៉ាគីស្ថាន ដើម្បីជំរុញការគាំទ្រនូវទំនាក់ទំនងរវាងប្រទេសទាំងពីរ។

សម្ដេចតេជោបានកត់សម្គាល់ថា ប៉ាគីស្ថានគឺជាប្រទេសមួយដែលបានទទួលស្គាល់កម្ពុជា ហើយប្រទេសទាំងពីរបានបង្កើតទំនាក់ទំនងជាមួយគ្នាតាំងពី ថ្ងៃទី២៨ ខែឧសភា ឆ្នាំ១៩៥២ ពោលគឺមុន១ឆ្នាំដែលកម្ពុជាទទួលបានឯករាជ្យពីបារាំង។
ការទទួលស្គាល់របស់ប៉ាគីស្ថានមកលើកម្ពុជានេះ គឺជាការចងចាំសម្រាប់កម្ពុជាផងដែរ ដែលបញ្ជាក់ពីការផ្ដល់តម្លៃរបស់ប៉ាគីស្ថានមកកាន់កម្ពុជា តាំងពីឆ្នាំ១៩៥២។

សម្ដេចតេជោចង់ឃើញរាជរដ្ឋាភិបាលកម្ពុជាបង្កើតស្ថានទូតជាផ្លូវការនៅប៉ាគីស្ថាន ហើយសម្រាប់ពាណិជ្ជកម្មរវាងប្រទេសទាំងពីរ សម្ដេចតេជោ និងឯកឧត្តមប្រធានព្រឹទ្ធសភាប៉ាគីស្ថាន ក៏បានឯកភាពគ្នាជារួមធ្វើយ៉ាងណាឱ្យរដ្ឋាភិបាលនៃប្រទេសទាំងពីរជំរុញពាណិជ្ជកម្ម ឱ្យកាន់តែទៅមុខ។ ហើយទន្ទឹមនឹងនយោបាយនៃប្រទេសទាំងពីរកំពុងតែរីកចម្រើននោះ គប្បីប្រទេសទាំងពីរពិនិត្យមើលក្នុងការពង្រីកទំហំពាណិជ្ជកម្ម សេដ្ឋកិច្ច និងការវិនិយោគបន្ថែមទៀត ដែលតាមទិន្នន័យរហូតមកដល់ពេលនេះ ទំហំពាណិជ្ជកម្មរវាងប្រទេសទាំងពីរមានប្រមាណតែ៥៣ លានដុល្លារទេក្នុងឆ្នាំ២០២៥ កន្លងទៅនេះ។ ដូច្នេះថ្នាក់ដឹកនាំទាំងពីរចង់ឃើញពាណិជ្ជកម្មនៃប្រទេសទាំងពីរមានការកើនឡើងបន្ថែមទៀត។ ទាក់ទងទៅនឹងទំនាក់ទំនងរវាងប្រជាជន និងប្រជាជន ថ្នាក់ដឹកនាំទាំងពីរ ក៏មានបំណងជំរុញផ្លាស់ប្ដូររវាងប្រជាជន និងប្រជាជនជាពិសេសគឺពាក់ព័ន្ធទៅនឹងវិស័យទេសចរណ៍ផងដែរ។

ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបថា នៅក្នុងជំនួបនេះ សម្ដេចតេជោ ហ៊ុន សែន បានសម្ដែងនូវការស្វាគមន៍ដោយក្តីរីករាយចំពោះវត្តមានឯកឧត្តមប្រធានព្រឹទ្ធសភា នៃសាធារណរដ្ឋឥស្លាមប៉ាគីស្ថាន អញ្ជើញមកកាន់ទឹកដីព្រះរាជាណាចក្រកម្ពុជា និងរីករាយដែលបានជួបឯកឧត្តមសាជាថ្មីដែលឯកឧត្តមបានអញ្ជើញមកកាន់ប្រទេសកម្ពុជា ចំនួន៣លើករួចមកហើយ ពោលតាំងពីឆ្នាំ២០១៩ បន្ទាប់មកនៅឆ្នាំ២០២៣ ដែលពេលនោះឯកឧត្តមក៏បានអញ្ជើញចូលរួមក្នុងការសង្កេតការបោះឆ្នោតនៅកម្ពុជា ហើយលើកទី៣នេះ ជាដំណើរទស្សនកិច្ចក្នុងនាមឯកឧត្តមជាប្រធានព្រឹទ្ធសភាប៉ាគីស្ថាន។

សម្ដេចតេជោបានចាត់ទុកវត្តមានឯកឧត្តមប្រធានព្រឹទ្ធសភាប៉ាគីស្ថានជាផ្នែកដ៏សំខាន់ក្នុងការធ្វើឱ្យទំនាក់ទំនងរវាងប្រទេសទាំងពីរកាន់តែរីកចម្រើនបន្ថែមទៀត ទាំងក្នុងក្របខ័ណ្ឌស្ថាប័ននីតិប្បញ្ញត្តិ ជាពិសេសស្ថាប័នព្រឹទ្ធសភា នៃប្រទេសទាំងពីរ និងស្ថាប័ននីតិប្រតិបត្តិរវាងប្រទេសទាំងពីរផងដែរ។
សម្តេចតេជោក៏ឆ្លៀតអបអរសាទរចំពោះភាពជោគជ័យថ្មីៗនេះរបស់ប៉ាគីស្ថាន ដែលបានរៀបចំនូវសន្និសីទ ប្រធានសភានៃអន្តរសភា កាលពីខែវិច្ឆិកាកន្លងទៅបានជោគជ័យ ដែលជាការលើកកិត្យានុភាពរបស់ប៉ាគីស្ថានបន្ថែមទៀត។

ឯកឧត្តមប្រធានព្រឹទ្ធសភាប៉ាគីស្ថានបានសម្ដែងនូវការអរគុណចំពោះការស្វាគមន៍ដ៏កក់ក្តៅរបស់សម្ដេចតេជោ ចំពោះឯកឧត្តម និងគណៈប្រតិភូ ជាពិសេសការបដិសណ្ឋារកិច្ចដ៏អស្ចារ្យ និងប្រកបដោយភាពកក់ក្តៅ។ ឯកឧត្តមបានលើកឡើងអំពីភាពរីកចម្រើននៃទំនាក់ទំនងរវាងប្រទេសយើងទាំងពីរ ដែលមានជាមួយគ្នានាពេលកន្លងមក ពិសេសនៅក្នុងអំឡុងពេលដែលសម្ដេចតេជោនៅជានាយករដ្ឋមន្ត្រី ហើយបន្តមកនូវការរីកចម្រើនបន្តទៀតក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃពេលបច្ចុប្បន្ននេះ។ ឯកឧត្តមក៏បានអបអរសាទរផងដែរចំពោះកម្ពុជាដែលបានរៀបចំនៃការបន្តវេនប្រកបដោយជោគជ័យ និងពោរពេញដោយសក្ដានុពល ដែលនេះបង្ហាញនូវចំណុចដ៏ល្អមួយ ក្រោមការដឹកនាំរបស់សម្ដេចតេជោតាំងពីសម្ដេចនៅជានាយករដ្ឋមន្ត្រីរហូតមកដល់ពេលបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា។

នៅវិមានសាមគ្គីភាព នៃព្រឹទ្ធសភា រសៀលថ្ងៃទី២ ខែកុម្ភៈ ឆ្នាំ២០២៦នេះ ភាគីទាំងពីរ សម្ដេចតេជោ និងឯកឧត្តមប្រធានព្រឹទ្ធសភាប៉ាគីស្ថានក៏បានពិភាក្សាបន្ថែមទៀតទៅលើការជំរុញ និងពង្រីកកិច្ចសហប្រតិបត្តិការ ជាមួយគ្នានៅក្នុងក្របខ័ណ្ឌ ពង្រឹងទំនាក់ទំនងស្ថាប័ននីតិប្បញ្ញត្តិ ជាក់ស្ដែងនៅពេលនេះក៏មានការចុះហត្ថលេខា រវាងអគ្គលេខាធិការដ្ឋាន នៃស្ថាប័នព្រឹទ្ធសភា រវាងប្រទេសទាំងពីរផងដែរ ដែលជាការជំរុញទំនាក់ទំនងស្ថាប័នព្រឹទ្ធសភានៃប្រទេសទាំងពីរឱ្យកាន់តែមានការរីកចម្រើន។ ជាមួយគ្នានោះថ្នាក់ដឹកនាំទាំងពីរក៏បានសម្ដែងនូវការពេញចិត្តចំពោះដំណើរទស្សនកិច្ចទៅវិញទៅមករវាងថ្នាក់ដឹកនាំនៃប្រទេសទាំងពីរ ហើយនៅឱកាសនោះផងដែរ ឯកឧត្តមប្រធានព្រឹទ្ធសភាប៉ាគីស្ថានក៏បានអញ្ជើញសម្ដេចតេជោទៅបំពេញទស្សនកិច្ចនៅប្រទេសប៉ាគីស្ថានផងដែរនាពេលខាងមុខ។ ជាការឆ្លើយតប សម្ដេចតេជោក៏បានសន្យាថានឹងអញ្ជើញទៅបំពេញទស្សនកិច្ចផ្លូវការនៅប្រទេសប៉ាគីស្ថានតាមពេលវេលាសមស្របណាមួយនាពេលខាងមុខ។

សម្ដេចតេជោ ហ៊ុន សែន បានជូនពរឯកឧត្តម ប្រធានព្រឹទ្ធសភាប៉ាគីស្ថាន និងគណៈប្រតិភូ សូមឱ្យទទួលបាននូវភាពជោគជ័យក្នុងការបំពេញទស្សនកិច្ច និងរីករាយក្នុងការស្នាក់នៅក្នុងប្រទេសកម្ពុជានាពេលនេះ៕SRP

លោកឧត្តមសេនីយ៍ទោ ហួត សុធី លើកសរសើរដល់នគរបាលស្រុកប្រាសាទបាគង ការពារ ធានារក្សាសន្តិសុខ សុវត្ថិភាព និងសណ្តាប់ធ្នាប់សាធារណៈបានយ៉ាងល្អប្រសើរ

ក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ រក្សាសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ប្រចាំឆ្នាំ២០២៥ និងលើកទិសដៅការងារបន្ត សម្រាប់ឆ្នាំ២០២៦ របស់អធិការដ្ឋាននគរបាលស្រុកប្រាសាទបាគង នៅថ្ងៃចន្ទ ទី២ ខែកុម្ភៈ ឆ្នាំ២០២៦ លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានមានប្រសាសន៍លើកសរសើរដល់កងកម្លាំងទាំងអស់ នៃអធិការដ្ឋាននគរបាលស្រុកប្រាសាទបាគង ដែលបានយកចិត្តទុកដាក់ខិតខំបំពេញតួនាទីភារកិច្ច ការពារ ធានារក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ នាពេលកន្លងមកបានយ៉ាងល្អប្រសើរ តាមអនុសាសន៍ណែនាំរបស់ថ្នាក់ដឹកនាំ។

លោកឧត្តមសេនីយ៍ទោ ស្នងការ ក៏មានប្រសាសន៍ណែនាំបន្ថែមទៀត ដល់កងកម្លាំងនគរបាលទាំងអស់ត្រូវបន្តយកចិត្តទុកដាក់ បង្កើនសាមគ្គីភាពផ្ទៃក្នុង គោរពបទវិន័យរបស់កងកម្លាំងឲ្យបានខ្ជាប់ខ្ជួន មានកិច្ចសហប្រតិបត្តិការល្អជាមួយអង្គភាព និងស្ថាប័នដែលពាក់ព័ន្ធ ក្នុងភូមិសាស្ត្រក្រុង ពង្រឹងបន្ថែមទៅលើកិច្ចការងារជំនាញ ការពារ ធានារក្សាសន្តិសុខ សណ្ដាប់ធ្លាប់សាធារណៈ ជូនបងប្អូនប្រជាពលរដ្ឋ មានទំនួលខុសត្រូវខ្ពស់ ទៅតាមតួនាទី និងភារៈកិច្ចរបស់ខ្លួន យកចិត្តទុកដាក់លើបញ្ហា ក្មេងទំនើង ,គ្រឿងញៀន, ល្បែងស៊ីសង,គ្រោះថ្នាក់ចរាចរណ៍, គ្រោះអគ្គិភ័យ, ពិសេសបទល្មើស Scam Online និងបទល្មើសផ្សេងៗទៀតដែលអាចកើតមានឡើង ក៏ដូចជា បន្តយកចិត្តទុកដាក់ លើកិច្ចការងារចុះធ្វើវេទិកាសាធារណៈ និងផ្សព្វផ្សាយពីគោលនយោបាយភូមិ-សង្កាត់ មានសុវត្ថិភាព ជូនដល់បងប្អូនប្រជាពលរដ្ឋ នៅតាមមូលដ្ឋាន និងយកចិត្តទុកដាក់ការផ្តល់សេវាសាធារណៈ ជូនដល់ប្រជាពលរដ្ឋនៅតាមមូលដ្ឋាន ឱ្យបានឆាប់រហ័ស ជំរុញប្រជាពលរដ្ឋនៅតាមមូលដ្ឋាន ដែលមានអត្តសញ្ញាណប័ណ្ណ ដែលអស់សុពលភាព មកបន្តសុពលភាពឱ្យបានគ្រប់ៗគ្នា៕SRP

កម្ពុជា-ថៃ (RBC) បានជួបប្រជុំគ្នានៅច្រកអន្តរជាតិជាំ-សាង៉ាំ ខេត្តឧត្តរមានជ័យ

អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា លោកជំទាវ ឧត្តមសេនីយ៍ឯក ម៉ាលី សុជាតា បានប្រកាសនៅថ្ងៃទី២ ខែកុម្ភៈ ឆ្នាំ២០២៦នេះថា នៅថ្ងៃទី២ ខែកុម្ភៈ ឆ្នាំ២០២៦ វេលាម៉ោង ១១:៥០នាទីព្រឹកនេះ ក្រុមលេខាធិការដ្ឋាននៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ ភាគីកម្ពុជា និងកងទ័ពភូមិភាគទី២ ភាគីថៃ បានជួបប្រជុំគ្នានៅច្រកអន្តរជាតិជាំ-សាង៉ាំ ស្រុកអន្លង់វែង ខេត្តឧត្តរមានជ័យ ក្រោមការសង្កេតការណ៍ពីក្រុមអ្នកសង្កេតការណ៍អាស៊ាន (AOT) របស់កម្ពុជា និងថៃផងដែរ។ ក្រុមលេខាធិការរបស់កម្ពុជាដឹកនាំដោយ ឧត្តមសេនីយ៍ត្រី និត ណារ៉ុង នាយសេនាធិការរង យោធភូមិភាគទី៤ និងក្រុមលេខាធិការរបស់ថៃដឹកនាំដោយ ឧត្តមសេនីយ៍ត្រី កាំផាក់ណាក វ៉ាផាន់ស៊ុ នាយសេនាធិការ កងទ័ពភូមិភាគទី២។

សូមជម្រាបជូនផងដែរថា ដោយសារតែភាគីទាំងពីរមិនទាន់រកឃើញនូវចំណុចកណ្តាលរួមគ្នាមួយនៅឡើយ ដូច្នេះភាគីទាំងពីរបានឯកភាពគ្នាដកឃ្លាវិលត្រលប់ទៅទីបញ្ជាការរៀងខ្លួនវិញ ហើយបន្តផ្លាស់ប្តូរឯកសារ និងពិភាក្សាគ្នាឈានដល់ការឯកភាពគ្នានាពេលខាងមុខទើបមានការរៀបចំពិធីចុះហត្ថលេខា និងកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ របស់កម្ពុជា និងកងទ័ពភូមិភាគទី២ របស់ថៃ។

គួររំលឹកផងដែរថា កិច្ចប្រជុំពិសេសនៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) នេះធ្វើឡើងផ្អែកតាមស្មារតីនៃសេចក្តីប្រកាសរួម នៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) រវាងព្រះរាជាណាចក្រកម្ពុជា និងព្រះរាជាណាចក្រថៃ កាលពីថ្ងៃទី២៧ ខែធ្នូ ឆ្នាំ២០២៥ ដែលភាគីទាំងពីរបានបញ្ជាក់សាជាថ្មី អំពីការបន្តអនុវត្តយ៉ាងម៉ឺងម៉ាត់ខ្ជាប់ខ្ជួននូវលទ្ធផលនៃកិច្ចប្រជុំពិសេសនេះឱ្យបានពេញលេញ និងប្រកបដោយប្រសិទ្ធភាព ក៏ដូចជាការបន្តកិច្ចខិតខំប្រឹងប្រែងកាត់បន្ថយភាពតានតឹងតាមបណ្តោយព្រំដែន ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ និងឈានដល់ការវិលត្រឡប់ទៅរកប្រក្រតីភាពឡើងវិញបានឆាប់រហ័ស៕SRP

អភិបាលខេត្តបាត់ដំបង ជំរុញឱ្យអាជ្ញាធរភូមិឃុំ ត្រូវយកចិត្តទុកដាក់ក្នុងការរំដោះ និងទប់ស្កាត់ការរំលោភដីចំណីផ្លូវ

ឯកឧត្តម សុខ លូ អភិបាលខេត្តបាត់ដំបងបានជំរុញឱ្យអាជ្ញាធរ ភូមិ ឃុំ ត្រូវយកចិត្តទុកដាក់ក្នុងការរំដោះ និងទប់ស្កាត់ការរំលោភដីចំណីផ្លូវ បើកផ្លូវឱ្យបានធំទូលាយដើម្បីលើកសោភ័ណភាព ជំរុញកំណើនសេដ្ឋកិច្ច និងការអភិវឌ្ឍសង្គមកាន់តែរីកចម្រើនសម្រាប់កូនចៅជំនាន់ក្រោយ និងកាត់បន្ថយគ្រោះថ្នាក់ចរាចរណ៍តាមដងផ្លូវ។

ឯកឧត្តម ក៏បានអំពាវនាវដល់ប្រជាពលរដ្ឋដែលរស់នៅជាប់តាមដងផ្លូវទាំងអស់សូមបញ្ឈប់ការរំលោភបំពានយកដីចំណីផ្លូវធ្វើជាកម្មសិទ្ធិដើម្បីសាងសង់សំណង់រឹងផ្សេងៗដោយខុសច្បាប់។

ឯកឧត្តមអភិបាលខេត្ត ក៏បានបន្តក្រើនរំលឹកដល់បងប្អូនប្រជាពលរដ្ឋអំពីបញ្ហាអនាម័យបរិស្ថាន ហាមឃាត់ដាត់ខាតការដុតសំរាមកាកសំណល់គ្រប់ប្រភេទ ត្រូវចេះវេចខ្ចប់ទុកដាក់ឱ្យបានត្រឹមត្រូវ និងចេះកែច្នៃកាកសំណល់ជុំវិញផ្ទះជាជីកំប៉ុស្តិ៍អាចប្រើប្រាស់បានឡើងវិញតាមលទ្ធភាព។

ឯកឧត្តម បន្តណែនាំប្រជាពលរដ្ឋ កាត់បន្ថយការចាក់គ្រឿងរំពងសំឡេងឮខ្លាំងរំខានការរស់នៅដល់អ្នកជិតខាងនិងភ្ញៀវទេសចរ ព្រមទាំងអប់រំកូនចៅឱ្យចៀឆ្ងាយពីគ្រឿងញៀន និងគោរពច្បាប់ចរាចរណ៍។

ឯកឧត្តមមានប្រសាសន៍យ៉ាងដូច្នេះក្នុងឱកាសអញ្ជើញជាគណៈអធិបតីក្នុងពិធីបើកការដ្ឋានជួសជុលពង្រីកទទឹង ផ្លូវខេត្តលេខ១៥៧១ និងក្រាលកម្រាលកៅស៊ូDBST បន្ថែមពីលើ(Reseal) ប្រវែង ២,០០០ម៉ែត្រ ទទឹង ១០ម៉ែត្រ ស្ថិតក្នុងឃុំឈើទាល ស្រុកបាណន់ ខេត្តបាត់ដំបង នៅព្រឹកថ្ងៃទី២ ខែកុម្ភៈ ឆ្នាំ២០២៦នេះ៕SRP

កម្ពុជាសូមស្វាគមន៍ ប្រធានព្រឹទ្ធសភា នៃសាធារណរដ្ឋឥស្លាមប៉ាគីស្ថាន ក្នុងឱកាសបំពេញទស្សនកិច្ចផ្លូវការនៅព្រះរាជាណាចក្រកម្ពុជា

នៅអាកាសយានដ្ឋានអន្តរជាតិតេជោ នាព្រឹកថ្ងៃទី២ ខែកុម្ភៈ ឆ្នាំ២០២៦ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានអញ្ជើញទទួលបដិសណ្ឋារកិច្ចស្វាគមន៍ឯកឧត្តម ស៊ីយ៉េដ យូសាហ្វ រ៉ាសា ហ្គីឡានី (Syed Yusuf Raza Gillani) ប្រធានព្រឹទ្ធសភា នៃសាធារណរដ្ឋឥស្លាមប៉ាគីស្ថាន និងជាប្រធានស្ថាបនិក នៃសន្និសីទប្រធានសភានៃអន្តរសភា (ISC) ដឹកនាំគណៈប្រតិភូព្រឹទ្ធសភាប៉ាគីស្ថាន អញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា តបតាមការអញ្ជើញរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ចាប់ពីថ្ងៃទី២ ដល់ថ្ងៃទី៥ ខែកុម្ភៈ ឆ្នាំ២០២៦។

ក្នុងដំណើរទស្សនកិច្ចផ្លូវការនេះ ឯកឧត្តមប្រធានព្រឹទ្ធសភា និងគណៈប្រតិភូ នឹងអញ្ជើញចូលក្រាបបង្គំគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រមទាំងអញ្ជើញជួបទ្វេភាគីជាមួយ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជួបសម្ដែងការគួរសមចំពោះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ដំណើរទស្សនកិច្ចផ្លូវការរបស់ ឯកឧត្តមប្រធានព្រឹទ្ធសភាប៉ាគីស្ថាន នៅកម្ពុជា នឹងជំរុញការរឹតចំណងមិត្តភាព ទំនាក់ទំនងទ្វេភាគី និងកិច្ចសហប្រតិបត្តិការសភាកម្ពុជា-ប៉ាគីស្ថានឱ្យកាន់តែជិតស្និទ្ធ និងជាពិសេស រួមចំណែកដល់ការលើកកម្ពស់របៀបវារៈការទូតសភារបស់កម្ពុជា ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ក្នុងការកសាងនិងរក្សាសន្តិភាព ព្រមទាំងការអភិវឌ្ឍប្រកបដោយចីរភាពនៅក្នុងតំបន់ និងពិភពលោក តាមរយៈកិច្ចសន្ទនា និងកិច្ចសហប្រតិបត្តិការអន្តរជាតិ៕SRP

ក្រុមមន្ត្រីបច្ចេកទេស ក្រសួងសាធារណការ និងដឹកជញ្ជូន ចុះពិនិត្យ នឹងសិក្សាច្រាំងទន្លេមេគង្គនៅទីក្រុងកំពង់ចាម

ក្រុមមន្ត្រីការងារបច្ចេកទេស ក្រសួងសាធារណការ និងដឹកជញ្ជូន រួមមាន អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ និងមន្ទីរសាធារណការ និងដឹកជញ្ជូនខេត្តកំពង់ចាម នៅថ្ងៃអាទិត្យ ទី១ ខែ កុម្ភៈ ឆ្នាំ២០២៦ បានចុះពិនិត្យ និងសិក្សាច្រាំងទន្លេមេគង្គដែលបានបាក់ស្រុតនៅទីក្រុងកំពង់ចាម ដោយមានការចូលរួមពីអាជ្ញាធរពាក់ព័ន្ធ នៅក្រុងកំពង់ចាម។

ក្រុមមន្ត្រីការងារបច្ចេកទេសបានប្រើប្រាស់ដ្រូនស្កេនរយៈកម្ពស់ដី និងប្រើប្រាស់ឧបករណ៍ Echo Sounder សំរាប់វាស់ស្ទង់ជម្រៅទឹក ដើម្បីប្រមូលទិន្នន័យសម្រាប់វិភាគនៅជុំវិញទីតាំងបាក់ស្រុត។ ក្រុមការងារបានប្រមូលទិន្នន័យលើគ្រប់ទិដ្ឋភាពបច្ចេកទេស និងធ្វើការវិភាគវាយតម្លៃលើបញ្ហាបាក់ស្រុតខាងលើឱ្យបានលម្អិត។

គួរបញ្ជាក់ថា ច្រាំងទន្លេមេគង្គទីតាំងខាងលើ បានស្រុតបាក់ កាលពីយប់ថ្ងៃទី៣០ ខែមករា ឆ្នាំ២០២៦ ដែលមានបណ្តោយប្រវែង ៧៥ម៉ែត្រ និងបាក់ចូលប្រមាណពី ១៥ម៉ែត្រទៅ២០ម៉ែត្រ។ ទីតាំងច្រាំងនេះមានសភាពទ្រុឌទ្រោម និងប្រឈមហានិភ័យបាក់ស្រុតប្រវែងសរុបប្រមាណ៤០០ម៉ែត្រ៕SRP